స్మృతి మంధాన నెం.1

టీమిండియా స్టార్ క్రికెటర్ స్మృతి మంధాన ఐసీసీ తాజాగా ప్రకటించిన వన్డే బ్యాటింగ్ ర్యాంకింగ్స్‌లో మరోసారి అగ్రస్థానాన్ని కైవసం చేసుకున్నారు. అయితే ఇండియా, శ్రీలంకల్లో జరుగుతున్న ఐసీసీ మహిళల ప్రపంచ కప్‌లో ఆమె ఆశించిన స్థాయిలో రాణించకపోవడంతో, ఇతర క్రీడాకారులతో పోలిస్తే ఆమె పాయింట్ల ఆధిక్యం స్వల్పంగా తగ్గింది.

791 రేటింగ్ పాయింట్లతో మంధాన నంబర్ 1 స్థానంలో నిలిచారు. రెండో స్థానంలో ఉన్న ఇంగ్లాండ్ క్రీడాకారిణి నాట్ సీవర్-బ్రంట్ కంటే ఆమె 60 పాయింట్ల ఆధిక్యంలో ఉన్నారు. ప్రపంచ కప్‌కు ముందు ఆస్ట్రేలియాపై జరిగిన మూడు వన్డే మ్యాచ్‌ల సిరీస్‌లో వరుస సెంచరీలు నమోదు చేసిన మంధాన, ఈ ప్రపంచకప్ టోర్నీలో శ్రీలంకపై 8, పాకిస్థాన్‌పై 23 పరుగులే చేశారు.

ఆస్ట్రేలియాకు చెందిన బెత్ మూనీ 713 రేటింగ్ పాయింట్లతో మూడో స్థానంలో ఉన్నారు. దక్షిణాఫ్రికాకు చెందిన టాజ్మిన్ బ్రిట్స్ (706), ఆస్ట్రేలియాకు చెందిన ఆష్లీ గార్డ్‌నర్ (697) ప్రపంచ కప్‌లో న్యూజిలాండ్‌పై సెంచరీలు సాధించి మెరుగైన ర్యాంకులు సాధించారు. టాజ్మిన్ రెండు స్థానాలు ఎగబాకి నాలుగో స్థానానికి చేరుకోగా, గార్డ్‌నర్ ఏకంగా ఏడు స్థానాలు మెరుగుపర్చుకుని ఐదో స్థానానికి చేరుకుని తన కెరీర్‌లోనే అత్యుత్తమ ర్యాంక్‌ను నమోదు చేశారు. న్యూజిలాండ్ కెప్టెన్ సోఫీ డివైన్ కూడా ఏడు స్థానాలు ఎగబాకి ఎనిమిదో ర్యాంక్‌కు చేరుకున్నారు. అలాగే కొలంబోలో భారత్‌పై 81 పరుగులు చేసిన పాకిస్థాన్ లెఫ్ట్ హ్యాండ్ బ్యాటర్ సిద్రా అమీన్ తన కెరీర్‌లో అత్యుత్తమ ర్యాంక్ అయిన పదవ స్థానాన్ని దక్కించుకున్నారు.

ఇక బౌలింగ్ ర్యాంకింగ్స్ విషయానికి వస్తే, ఇంగ్లాండ్‌కు చెందిన సోఫీ ఎక్లెస్టోన్ 792 రేటింగ్ పాయింట్లతో అగ్రస్థానంలో కొనసాగుతున్నారు. భారత స్పిన్నర్ దీప్తి శర్మ (640) ఒక స్థానం పడిపోయి ఆరో స్థానంలో నిలిచారు. బౌలింగ్ ర్యాంకింగ్స్‌లో టాప్-10లో ఉన్న ఏకైక భారతీయ క్రీడాకారిణి దీప్తి శర్మ మాత్రమే.

మొత్తం మీద టోర్నమెంట్‌లో నిలకడగా రాణించకపోయినా, గత సిరీస్‌లలోని మెరుగైన ప్రదర్శన కారణంగానే మంధాన ఇప్పటికీ నంబర్ 1 బ్యాటర్‌గా నిలిచారు. ప్రపంచ కప్‌లో కీలక దశకు చేరుకుంటున్న తరుణంలో మంధాన తిరిగి తన ఫామ్‌ను అందిపుచ్చుకోవడం భారత జట్టుకు చాలా కీలకం.

స్మృతి మంధాన తన అంతర్జాతీయ క్రికెట్ ప్రస్థానాన్ని 2013లో బంగ్లాదేశ్‌తో జరిగిన అంతర్జాతీయ టీ20 మ్యాచ్‌తో ప్రారంభించారు. ఆమె ఇప్పటివరకు 7 టెస్టులు, 108 వన్డేలు, 153 టీ20లు ఆడారు. టెస్టుల్లో 629 పరుగులు, వన్డేల్లో 4,888 పరుగులు, టీ20ల్లో 3,982 పరుగులు చేశారు. వన్డేల్లో ఆమె అత్యధిక స్కోరు 136 పరుగులు కాగా, టీ20ల్లో 112 పరుగులు.