‘స్పేస్’ డేటా సెంటర్ల దిశగా ప్రపంచం: సిస్కో

ప్రపంచవ్యాప్తంగా ఆర్టిఫిషియల్ ఇంటెలిజెన్స్ (ఏఐ) విప్లవం పెను మార్పులకు దారితీస్తోంది. పెరుగుతున్న డేటా అవసరాలు, విద్యుత్ కొరత దృష్ట్యా భవిష్యత్తులో భూమి మీద కాకుండా అంతరిక్షంలో 'డేటా సెంటర్లను' నిర్మించాల్సిన అవసరం ఉందని టెక్ దిగ్గజం 'సిస్కో' పేర్కొంది. దావోస్‌లో జరుగుతున్న ప్రపంచ ఆర్థిక సదస్సులో సిస్కో ప్రెసిడెంట్, చీఫ్ ప్రొడక్ట్ ఆఫీసర్ జీతూ పటేల్ మాట్లాడుతూ.. రాబోయే కొద్ది సంవత్సరాల్లోనే 'స్పేస్ డేటా సెంటర్లు' సాకారం కానున్నాయని సంచలన విషయాలు వెల్లడించారు.

అంతరిక్షమే ఎందుకు?

సాధారణంగా భూమిపై ఉండే డేటా సెంటర్లలో కంప్యూటర్ల కంటే వాటిని చల్లబరచడానికి వాడే 'కూలింగ్' వ్యవస్థల బరువే 90 శాతం ఉంటుంది. దీనికి భారీగా విద్యుత్ అవసరమవుతుంది. అయితే అంతరిక్షంలో సూర్యరశ్మి తీవ్రత ఎక్కువగా ఉండటం వల్ల సోలార్ విద్యుత్ పుష్కలంగా లభిస్తుందని, అలాగే అక్కడి వాతావరణం వల్ల కూలింగ్ ప్రక్రియ ఆర్థికంగా ఎంతో లాభదాయకంగా ఉంటుందని జీతూ పటేల్ వివరించారు. భూమిపై ఉన్న మౌలిక సదుపాయాల కొరతను అధిగమించేందుకు అంతరిక్షం ఒక అద్భుతమైన ప్రత్యామ్నాయమని ఆయన పేర్కొన్నారు.

ఏఐతో ప్రతి ఉద్యోగం మారుతుంది!

ఆర్టిఫిషియల్ ఇంటెలిజెన్స్ గురించి మాట్లాడుతూ, ఇది మానవ చరిత్రలోనే అత్యంత లోతైన మార్పు అని జీతూ పటేల్ అభివర్ణించారు. ఏఐ వల్ల ప్రతి ఉద్యోగం, పని చేసే విధానం పూర్తిగా మారిపోతాయని చెప్పారు. అయితే మౌలిక సదుపాయాల కొరత, భద్రత, డేటా లభ్యత అనే మూడు ప్రధాన సవాళ్లు దీని ముందు ఉన్నాయని ఆయన హెచ్చరించారు. ముఖ్యంగా సైబర్ దాడుల నుంచి రక్షణ పొందాలంటే, మనం కూడా ఏఐ టెక్నాలజీని వాడటం తప్పనిసరని, దాడులు చేసే వారు కూడా అదే తరహా అత్యాధునిక సాధనాలను ఉపయోగిస్తున్నారని ఆయన ఆందోళన వ్యక్తం చేశారు.

భారత్‌కు పెద్దపీట

ఇక భారతదేశం గురించి మాట్లాడుతూ, సిస్కో సంస్థకు భారత్ అత్యంత కీలకమైన మార్కెట్ అని పటేల్ స్పష్టం చేశారు. అమెరికా వెలుపల సిస్కోకు చెందిన అత్యధిక సంఖ్యలో ఉద్యోగులు ఉన్నది భారతదేశంలోనేనని ఆయన తెలిపారు. చెన్నైలో ఏడాది క్రితమే తమ తయారీ కేంద్రాన్ని ప్రారంభించామని, భవిష్యత్తులో భారత్‌లో పెట్టుబడులను మరింత పెంచుతామని వెల్లడించారు. భారత ప్రభుత్వంతో కలిసి పనిచేయడం తమకు ఎంతో సంతోషాన్నిస్తోందని, భారతదేశం తమ వ్యూహాత్మక భాగస్వామిగా కొనసాగుతుందని ఆయన పేర్కొన్నారు.