స్పెయిన్లో 16 ఏళ్లలోపు పిల్లలకు సోషల్ మీడియా బ్యాన్!
సోషల్ మీడియా మాయాజాలం నుంచి చిన్నారులను రక్షించేందుకు స్పెయిన్ ప్రభుత్వం సంచలన నిర్ణయం తీసుకుంది. 16 ఏళ్లలోపు వయసున్న పిల్లలు సోషల్ మీడియా ప్లాట్ఫారమ్లను ఉపయోగించకుండా పూర్తిస్థాయిలో నిషేధం విధించనున్నట్లు ఆ దేశ ప్రధాన మంత్రి పెడ్రో శాంచెజ్ ప్రకటించారు. మంగళవారం దుబాయ్లో జరుగుతున్న 'వరల్డ్ గవర్నమెంట్ సమ్మిట్ 2026'లో ఆయన ఈ కీలక విషయాన్ని వెల్లడించారు. ఆన్లైన్ భద్రత, హానికరమైన డిజిటల్ కంటెంట్ పట్ల ఆందోళన వ్యక్తం చేస్తూ, పిల్లలు ఒంటరిగా ఈ డిజిటల్ ప్రపంచంలో విహరించడం క్షేమదాయకం కాదని ఆయన స్పష్టం చేశారు.
పటిష్టమైన వయసు నిర్ధారణ ఉండాల్సిందే!
ప్రస్తుతం సోషల్ మీడియా సంస్థలు వయసు నిర్ధారణ కోసం కేవలం 'చెక్ బాక్స్ల'ను మాత్రమే వాడుతున్నాయని, ఇకపై అవి సరిపోవని శాంచెజ్ పేర్కొన్నారు. "కేవలం టిక్ మార్క్ పెడితే సరిపోదు.. నిజమైన, పటిష్టమైన వయసు నిర్ధారణ వ్యవస్థలను కంపెనీలు ఏర్పాటు చేయాలి. పిల్లలకు అడ్డుకట్ట వేసేలా అవి పనిచేయాలి" అని ఆయన తేల్చి చెప్పారు. దీనికి సంబంధించిన ప్రతిపాదనలను వచ్చే వారం స్పెయిన్ మంత్రుల మండలి ఆమోదించనుంది. ప్రస్తుతం పార్లమెంటులో చర్చలో ఉన్న బిల్లుకు సవరణలు చేసి, మైనర్లు సోషల్ మీడియాలో రిజిస్టర్ కాకుండా చట్టబద్ధమైన నిషేధం విధించనున్నారు.
ఐరోపా దేశాల్లో పెరుగుతున్న ఆంక్షలు
చిన్నారుల ఆన్లైన్ కార్యకలాపాలపై నియంత్రణ విధించాలన్న ఆలోచన కేవలం స్పెయిన్కే పరిమితం కాలేదు. ఐరోపా అంతటా ఈ దిశగా అడుగులు పడుతున్నాయి. డెన్మార్క్ ఇప్పటికే 15 ఏళ్లలోపు వారికి సోషల్ మీడియాను దూరం చేయాలని నిర్ణయించగా, ఫ్రాన్స్ కూడా ఇదే తరహా ఆంక్షల దిశగా పని చేస్తోంది. ఇక పోర్చుగల్లో 16 ఏళ్లలోపు పిల్లలు సోషల్ మీడియా వాడాలంటే తల్లిదండ్రుల అనుమతి తప్పనిసరి చేస్తూ ముసాయిదా చట్టాన్ని ప్రవేశపెట్టారు.
తప్పుడు ప్రచారంపై ఉక్కుపాదం
డిజిటల్ రంగంలో సమూల సంస్కరణలు తీసుకురావడంలో భాగంగా ఈ నిషేధాన్ని విధిస్తున్నట్లు స్పెయిన్ ప్రధాని తెలిపారు. కేవలం నిషేధమే కాకుండా, విద్వేషపూరిత ప్రసంగాలు, తప్పుడు సమాచారం (డిజిన్ఫర్మేషన్), చిన్నారుల వేధింపులకు సంబంధించిన కంటెంట్ను అరికట్టడంలో విఫలమైతే సదరు సంస్థల ఎగ్జిక్యూటివ్లను బాధ్యులను చేస్తామని హెచ్చరించారు. లాభాల కోసం తప్పుడు వార్తలను వ్యాప్తి చేసే అల్గారిథమ్లను పరిశీలిస్తామని, ఆన్లైన్లో విద్వేషం చిమ్మే వారికి ఆర్థిక, చట్టపరమైన పరిణామాలు తప్పవని హెచ్చరించారు.
నిబంధనలు అతిక్రమిస్తే భారీ జరిమానాలు
యూరోపియన్ యూనియన్ 'డిజిటల్ సర్వీసెస్ యాక్ట్' ప్రకారం హానికరమైన కంటెంట్ను అరికట్టడం సామాజిక మాధ్యమాల బాధ్యత. ఈ విషయంలో విఫలమవుతున్న దిగ్గజ సంస్థలపై ఇప్పటికే చర్యలు మొదలయ్యాయి. గతేడాది డిసెంబర్లో పారదర్శకత నిబంధనలను పాటించనందుకు సామాజిక మాధ్యమ వేదిక 'ఎక్స్' (గతంలో ట్విట్టర్)కు యూరోపియన్ కమిషన్ 120 మిలియన్ యూరోల భారీ జరిమానా విధించింది. అక్రమ కంటెంట్, తప్పుడు ప్రచారాల నిర్వహణపై ఇప్పటికీ ఆ సంస్థపై విచారణ కొనసాగుతోంది.