స్థానిక సంస్థల ఎన్నికలకు సిద్ధం కావాలి: వైఎస్ జగన్
రానున్న స్థానిక సంస్థల ఎన్నికలకు వైఎస్సార్సీపీ నాయకులు, కార్యకర్తలు ఇప్పటి నుంచే సిద్ధం కావాలని ఆ పార్టీ అధినేత, మాజీ ముఖ్యమంత్రి వైఎస్ జగన్మోహన్రెడ్డి పిలుపునిచ్చారు. ఎన్నికల్లో భారీ విజయం సాధించడమే లక్ష్యంగా పనిచేయాలని సూచించారు. రాజమండ్రి రూరల్ అసెంబ్లీ నియోజకవర్గానికి చెందిన స్థానిక సంస్థల నాయకులు, ముఖ్య కార్యకర్తలతో బుధవారం జగన్ సమావేశమయ్యారు. ఈ సందర్భంగా ఆయన మాట్లాడుతూ.. ఎన్డీయే కూటమి ప్రభుత్వం అన్ని రంగాల్లో విఫలమైందని ఆరోపించారు. ముఖ్యమంత్రి చంద్రబాబు నాయుడు పాలనపై ప్రజల్లో తీవ్ర అసంతృప్తి నెలకొందని, ఏ వర్గం కూడా సంతోషంగా లేదని అన్నారు.
పోలీసు వ్యవస్థ దుర్వినియోగానికి అవకాశం: జగన్
స్థానిక సంస్థల ఎన్నికల్లో ప్రజల్లో ఉన్న ప్రభుత్వ వ్యతిరేకత బయటపడకుండా అడ్డుకునేందుకు ప్రభుత్వం పోలీసు వ్యవస్థను దుర్వినియోగం చేసే అవకాశం ఉందని జగన్ ఆరోపించారు. ఎలాంటి సవాళ్లు ఎదురైనా ఎదుర్కొనేందుకు పార్టీ శ్రేణులు సిద్ధంగా ఉండాలని, పట్టుదలతో పోరాడాలని పిలుపునిచ్చారు. రాష్ట్రంలో శాంతిభద్రతలు పూర్తిగా దిగజారిపోయాయని జగన్ ఆరోపించారు. ఇసుక, మట్టి, మద్యం మాఫియాలు యథేచ్ఛగా పనిచేస్తున్నాయని అన్నారు. గంజాయి తరలిస్తూ పోలీసు సిబ్బంది పట్టుబడుతున్న ఘటనలు కూడా ఉన్నాయని, ప్రజల దృష్టిని మళ్లించేందుకు కుట్రలు జరుగుతున్నాయని ఆరోపించారు. చంద్రబాబు ప్రభుత్వం ఎన్నికలకు ముందు ఇచ్చిన హామీల్లో ఒక్కదానినీ పూర్తిగా అమలు చేయలేదని జగన్ విమర్శించారు. విద్యార్థులు, రైతులు, మహిళలు, వృద్ధులు, ఉద్యోగులు, వ్యాపారులు సహా అన్ని వర్గాల్లో ప్రభుత్వంపై అసంతృప్తి పెరిగిందన్నారు. రెండేళ్లలోనే కూటమి ప్రభుత్వంపై తీవ్ర ప్రజావ్యతిరేకత ఏర్పడిందని, వైఎస్సార్సీపీ ఐదేళ్ల పాలనతో ప్రస్తుత ప్రభుత్వ పాలనను ప్రజలు పోల్చుకుంటున్నారని తెలిపారు. దీంతో వైఎస్సార్సీపీకి ప్రజల మద్దతు పెరుగుతోందని జగన్ పేర్కొన్నారు. మరో ఏడాదిలో తన పాదయాత్ర ప్రారంభమవుతుందని, ఆ తర్వాత ఏడాది ఎన్నికలు వస్తాయని తెలిపారు. ఎన్నికలు ఎప్పుడు జరిగినా వైఎస్సార్సీపీ విజయం సాధిస్తుందని ధీమా వ్యక్తం చేశారు.
ఎస్ఐఆర్ పూర్తయ్యాకే స్థానిక ఎన్నికలు నిర్వహించాలి
మరోవైపు మున్సిపల్ కార్పొరేషన్లు, మున్సిపాలిటీలు, నగర పంచాయతీలకు ఎన్నికలను ప్రస్తుత ప్రత్యేక సమగ్ర ఓటర్ల జాబితా సవరణ (సర్) ప్రక్రియ పూర్తయి తుది ఓటర్ల జాబితాలు ప్రచురించిన తర్వాతే నిర్వహించాలని వైఎస్సార్సీపీ ఎమ్మెల్సీ ఎల్.అప్పిరెడ్డి రాష్ట్ర ఎన్నికల కమిషనర్ అనిల్చంద్ర పునేఠాకు వినతిపత్రం సమర్పించారు. సెప్టెంబర్ 3 నాటికి వార్డుల వారీగా ఫొటో ఓటర్ల జాబితాలను సిద్ధం చేసి ప్రచురించాలని ఎన్నికల కమిషన్ ఆదేశించిందని ఆయన తెలిపారు. అయితే జనవరి 1, 2026ను అర్హత తేదీగా తీసుకుని రూపొందిస్తున్న ఈ జాబితాల కంటే.. ఎస్ఐఆర్ పూర్తయిన తర్వాత తాజాగా నవీకరించిన ఓటర్ల సమాచారాన్ని ఆధారంగా చేసుకోవాలని వైసీపీ కోరింది.
ఓటరు జాబితా ఆధారంగానే వార్డుల విభజన చేయాలి
175 అసెంబ్లీ నియోజకవర్గాలకు సంబంధించిన ముసాయిదా ఓటర్ల జాబితాలను జూలై 31న ప్రచురించారని, విస్తృత స్థాయిలో పరిశీలన అనంతరం సుమారు 42 లక్షల ఎంట్రీలు పరిశీలనలో ఉన్నాయని, 44.89 లక్షల ఎంట్రీలను తొలగించారని అప్పిరెడ్డి పేర్కొన్నారు. తొలగించిన వాటిలో సుమారు 15.22 లక్షల మంది మృతుల ఓట్లు, 7.37 లక్షల వరకు డూప్లికేట్ లేదా బహుళ నమోదులు ఉన్నాయని తెలిపారు. అయితే ముసాయిదా జాబితాలపై అభ్యంతరాలు, క్లెయిమ్ల పరిష్కారం ఇంకా పూర్తికాలేదని, తుది ఓటర్ల జాబితాలు అక్టోబర్ 3, 2026న ప్రచురించాల్సి ఉందని చెప్పారు. ఎస్ఐఆర్ పూర్తికాకముందే మున్సిపల్ ఓటర్ల జాబితాలను సిద్ధం చేస్తే పేర్ల చేర్పు, తొలగింపు, సవరణ, పునరుద్ధరణ విషయంలో గందరగోళం ఏర్పడే అవకాశం ఉందని వైసీపీ పేర్కొంది. అందువల్ల సెప్టెంబర్ 3 గడువును సవరించి, ఎస్ఐఆర్ పూర్తయిన తర్వాత రూపొందే నవీకరించిన ఓటర్ల జాబితాల ఆధారంగానే వార్డుల వారీగా తుది జాబితాలను సిద్ధం చేయాలని రాష్ట్ర ఎన్నికల కమిషన్ను కోరింది.