స్థానిక ఎన్నికల్లో జనసేన బలాన్ని చాటుకుంటాం: మంత్రి నాదెండ్ల మనోహర్

రాబోయే స్థానిక సంస్థల ఎన్నికల్లో ఎన్డీయే కూటమి విజయమే లక్ష్యంగా జనసేన పార్టీ కార్యాచరణ రూపొందిస్తోందని జనసేన పార్టీ పీఏసీ ఛైర్మన్, రాష్ట్ర ఆహార, పౌర సరఫరాల శాఖ మంత్రి నాదెండ్ల మనోహర్ తెలిపారు. 2024 సార్వత్రిక ఎన్నికల్లో కూటమి విజయాన్ని దృష్టిలో పెట్టుకుని జనసేన త్యాగాలు చేసినప్పటికీ, అదే ఫార్ములా స్థానిక సంస్థల ఎన్నికల్లో కూడా అమలవుతుందని భావించడం సరైనది కాదని స్పష్టం చేశారు.

శుక్రవారం తెనాలి నియోజకవర్గంలోని చెంచుపేటలో మీడియాతో మాట్లాడిన ఆయన, పార్టీ బలంగా ఉన్న ప్రాంతాల్లో జనసేన తప్పనిసరిగా పోటీ చేస్తుందని చెప్పారు. నాయకులు, జనసైనికులు, వీరమహిళలకు తగిన అవకాశాలు కల్పించేలా పార్టీ ప్రణాళికలు రూపొందిస్తున్నట్లు వెల్లడించారు. అదే సమయంలో కూటమి భాగస్వామ్య పక్షాల పట్ల గౌరవం కొనసాగిస్తూ సమన్వయంతో ముందుకు సాగుతామని పేర్కొన్నారు.

ప్రజల మేలు కోసం ఎన్డీయే కూటమిని బలోపేతం చేయాలనే లక్ష్యంతో 2024 ఎన్నికల సమయంలో జనసేన నాలుగు అడుగులు వెనక్కి వేసిందని నాదెండ్ల గుర్తు చేశారు. ప్రభుత్వ వ్యతిరేక ఓటు చీలకుండా ఉండాలనే ఉద్దేశంతో పార్టీ అధ్యక్షుడు పవన్ కళ్యాణ్ తీసుకున్న నిర్ణయాలకు కట్టుబడి పనిచేశామని తెలిపారు. అయితే ఆ పరిస్థితులను ప్రస్తుత స్థానిక ఎన్నికలతో ముడిపెట్టి ప్రచారం చేయడం వాస్తవాలకు విరుద్ధమని అన్నారు.

క్షేత్రస్థాయిలో పార్టీ నాయకులు, కార్యకర్తలు, వీరమహిళల అభిప్రాయాలు, ఆకాంక్షలు, ఆవేదనలను పార్టీ నాయకత్వం పూర్తిగా అర్థం చేసుకుందని చెప్పారు. స్థానిక పరిస్థితులు, బలాబలాలను సమగ్రంగా అంచనా వేసుకుని ఎన్నికల్లో వ్యూహాత్మకంగా ముందుకు సాగుతామని వెల్లడించారు. ఇటీవల జరిగిన ఎన్డీయే భాగస్వామ్య పార్టీల సమన్వయ సమావేశంలో కూటమిలోని చిన్నచిన్న లోపాలు, సమన్వయ సమస్యలను సరిదిద్దుకోవాలని నిర్ణయించినట్లు తెలిపారు. యువత, మహిళలకు అధిక ప్రాధాన్యం కల్పించడంతో పాటు క్షేత్రస్థాయిలో పనిచేసిన కార్యకర్తలకు తగిన గుర్తింపు, అవకాశాలు కల్పించేందుకు మూడు పార్టీలూ కలిసి పనిచేస్తాయని చెప్పారు.

కూటమి సమన్వయాన్ని మరింత బలోపేతం చేసేందుకు ప్రతి జిల్లాతో పాటు పార్లమెంట్ నియోజకవర్గ స్థాయిలో ప్రత్యేక సమన్వయ కమిటీలను ఏర్పాటు చేస్తున్నట్లు వెల్లడించారు. స్థానిక సంస్థల ఎన్నికల్లో అభ్యర్థుల ఎంపిక, సీట్ల కేటాయింపు వంటి అంశాలపై భాగస్వామ్య పార్టీల మధ్య పరస్పర చర్చల ద్వారా నిర్ణయాలు తీసుకుంటామని నాదెండ్ల మనోహర్ స్పష్టం చేశారు.