సైబర్ నేరగాళ్లపై 'ఆపరేషన్ క్రాక్‌డౌన్ 1.0': 208 మంది అరెస్ట్

దేశవ్యాప్తంగా జరుగుతున్న సైబర్ మోసాలకు అడ్డుకట్ట వేసేందుకు తెలంగాణ పోలీసులు భారీ ఎత్తున 'ఆపరేషన్ క్రాక్‌డౌన్ 1.0' నిర్వహించారు. ఫిబ్రవరి 25న రాష్ట్రవ్యాప్తంగా ఏకకాలంలో జరిగిన ఈ తనిఖీల్లో సైబర్ నేరగాళ్లకు సహకరిస్తున్న 'మ్యూల్ బ్యాంక్ ఖాతాల' నెట్‌వర్క్‌ను పోలీసులు ధ్వంసం చేశారు. దేశవ్యాప్తంగా నమోదైన సైబర్ మోసాల వివరాలను నేషనల్ సైబర్ క్రైమ్ రిపోర్టింగ్ పోర్టల్ ద్వారా విశ్లేషించి తెలంగాణలో తెరవబడిన అనుమానాస్పద బ్యాంక్ ఖాతాలను గుర్తించారు.

ఈ ఆపరేషన్‌లో భాగంగా రాష్ట్రంలోని 137 బ్యాంక్ శాఖల్లో ఒకేసారి సడెన్ తనిఖీలు చేపట్టారు. మొత్తం 137 ప్రత్యేక పోలీసు బృందాలు, 512 మంది సిబ్బంది ఈ డ్రైవ్‌లో పాల్గొన్నారు. తనిఖీల సందర్భంగా 1,888 అనుమానాస్పద మ్యూల్ ఖాతాలను పరిశీలించారు. ఇవి దేశవ్యాప్తంగా నమోదైన 9,451 సైబర్ క్రైమ్ కేసులతో సంబంధం ఉన్నట్లు గుర్తించారు. ఈ కేసుల వల్ల సుమారు రూ.100 కోట్ల వరకు ఆర్థిక నష్టం జరిగినట్లు అధికారులు అంచనా వేశారు.

అరెస్టయిన వారిలో ప్రభుత్వ ఉద్యోగులు

ఈ చర్యల ఫలితంగా మొత్తం 549 ఎఫ్‌ఐఆర్‌లు నమోదు చేయబడగా, 626 మంది అనుమానితులను గుర్తించారు. అందులో 208 మందిని పోలీసులు అరెస్టు చేశారు. అరెస్టయిన వారిలో ప్రభుత్వ ఉద్యోగులు ఉన్నారు. 15 మంది మహిళలు, ఏడుగురు విద్యార్థులు, ఇద్దరు లెక్చరర్లు, ఒక విద్యుత్ శాఖ ఉద్యోగి ఉన్నారు. విచారణలో వీరిలో చాలామంది సైబర్ మోసగాళ్లకు సహకరిస్తూ తమ బ్యాంక్ ఖాతాలను ఉపయోగించేందుకు అనుమతించినట్లు తెలిసింది. ప్రతి మోసపూరిత లావాదేవీపై సుమారు 5 శాతం వరకు కమిషన్ తీసుకున్నట్లు పోలీసులు వెల్లడించారు.

పోలీసులు దర్యాప్తులో భాగంగా 63 మొబైల్ ఫోన్లు, 208 బ్యాంక్ పాస్‌బుక్లు, చెక్‌బుక్లు స్వాధీనం చేసుకున్నారు. ఈ నేరాల్లో పాల్గొన్న వ్యక్తులు బ్యాంక్ ఉద్యోగులు, సాఫ్ట్‌వేర్ ఇంజనీర్లు, వ్యాపారులు, ప్రైవేట్ ఉద్యోగులు, ఆరోగ్య రంగ కార్మికులు, విద్యార్థులు, రోజువారీ కూలీలు వంటి విభిన్న వృత్తులకు చెందినవారిగా గుర్తించారు. వారి వయసు 19 నుంచి 45 సంవత్సరాల మధ్య ఉంది.

కొంతమంది నకిలీ గుర్తింపులతో ఆన్‌లైన్ లేదా వర్చువల్ బ్యాంక్ ఖాతాలు తెరిచి, తప్పుడు కేవైసీ పత్రాలు, ప్రాక్సీ మొబైల్ నంబర్లను ఉపయోగించి మోసగాళ్లకు సహకరించినట్లు దర్యాప్తులో బయటపడింది. వరంగల్‌లో ఒక కేసులో, ఒక వ్యక్తి తన కుటుంబ సభ్యుల బ్యాంక్ ఖాతాలను కూడా మోసపూరిత డబ్బు బదిలీలకు ఉపయోగించినట్లు పోలీసులు గుర్తించారు. దర్యాప్తులో మరో 52 మంది సహాయకులను కూడా పోలీసులు గుర్తించారు. వీరు కొత్తగా బ్యాంక్ ఖాతాలు తెరవడానికి వ్యక్తులను రిక్రూట్ చేయడం, సిమ్ కార్డులు సమకూర్చడం, ఏటీఎం కార్డులు మరియు పిన్ వివరాలు సేకరించడం, మోసపూరిత డబ్బు జమ అయిన తర్వాత ఉపసంహరణలు లేదా బదిలీలు చేయడం వంటి పనులు చేసినట్లు తెలిసింది.

అద‌నంగా బ్యాంక్ ఆఫ్ మహారాష్ట్ర, జూబ్లీహిల్స్ మర్చంట్ కోఆపరేటివ్ బ్యాంక్‌కు చెందిన ఇద్దరు బ్యాంక్ ఉద్యోగులను కూడా అరెస్టు చేశారు. వీరు సరైన కేవైసీ ప్రక్రియలను పాటించకుండా అనుమానాస్పద ఖాతాల ప్రారంభానికి సహకరించినట్లు ఆరోపణలు ఉన్నాయి. మొత్తం 19 బ్యాంక్ శాఖల్లో 20 కంటే ఎక్కువ మ్యూల్ ఖాతాలు ఉన్నట్లు పోలీసులు గుర్తించారు. దీనితో బ్యాంకులు కేవైసీ ధృవీకరణను మరింత కట్టుదిట్టం చేయాల్సిన అవసరం ఉందని అధికారులు తెలిపారు. ఇతర రాష్ట్రాల్లో నమోదైన సైబర్ మోసాల కేసులతో ఈ ఖాతాలు సంబంధం ఉన్నందున, భారతీయ న్యాయ సంహిత సెక్షన్ 112 కింద కేసులు నమోదు చేశారు.

సైబర్ నేరాలకు రాష్ట్రాన్ని వేదికగా ఉపయోగించుకునే వారిపై జీరో టాలరెన్స్ విధానాన్ని అమలు చేస్తామని తెలంగాణ పోలీసులు స్పష్టం చేశారు. అలాగే ప్రజలు తమ బ్యాంక్ ఖాతాలు, ఏటీఎం కార్డులు, పిన్ నంబర్లు, ఓటీపీలు ఇతరులతో పంచుకోవద్దని హెచ్చరించారు. ఇతరులకు ఖాతాలను ఉపయోగించేందుకు అనుమతించడం కూడా చట్టపరమైన నేరమే అవుతుందని అధికారులు తెలిపారు. ప్రస్తుతం ఈ కేసులో మరిన్ని లింకులను ఛేదించేందుకు, నిధులు ఎక్కడికి మళ్లుతున్నాయో గుర్తించేందుకు దర్యాప్తు కొనసాగుతోంది.