సైబరాబాద్లో డ్రైనేజీ పనులపై కమిషనర్ల సంయుక్త తనిఖీ
సైబరాబాద్లో వర్షాకాలాన్ని దృష్టిలో ఉంచుకుని నగరంలో ముంపు సమస్యలను నివారించేందుకు చేపడుతున్న స్టార్మ్ వాటర్ డ్రైనేజీ పనులను అధికారులు సంయుక్తంగా పరిశీలించారు. సైబరాబాద్ మున్సిపల్ కార్పొరేషన్ (సీఎంసీ) కమిషనర్ జి. సృజన, సైబరాబాద్ పోలీస్ కమిషనర్తో కలిసి ఎఫ్డీడీఐ బాక్స్ డ్రెయిన్, మల్కం చెరువు, సీఓడీ జంక్షన్, బాటా జంక్షన్ ప్రాంతాలను సందర్శించి పనుల పురోగతిని సమీక్షించారు.
ఈ సందర్భంగా ఆయా ప్రాంతాల్లో వర్షపు నీటి పారుదల వ్యవస్థను మరింత సమర్థవంతంగా తీర్చిదిద్దేందుకు పలువురు అధికారులకు కీలక ఆదేశాలు జారీ చేశారు. ఎఫ్డీడీఐ సమీపంలోని లోతట్టు ప్రాంతాల్లో దీర్ఘచతురస్రాకార డక్ట్ సెక్షన్లతో క్యాచ్ పిట్లను నిర్మించాలని సూచించారు. సీఓడీ జంక్షన్ వద్ద ఏర్పాటు చేసే క్యాచ్ పిట్లపై ఎంఎస్ గ్రిల్లులను అమర్చాలని ఆదేశించారు. అలాగే బావర్చి రెస్టారెంట్ ఎదుట ఉన్న ఆర్సీసీ క్యాచ్ పిట్ కవర్ల స్థానంలో ఎంఎస్ గ్రిల్లులను ఏర్పాటు చేయాలని సూచించారు.
ఎంకే ఎటర్నల్ మాల్ నుంచి బాటా నాలా వరకు ప్రస్తుతం ఉన్న స్టార్మ్ వాటర్ డ్రెయిన్ను బాక్స్ కల్వర్ట్గా పునర్నిర్మించాలని అధికారులను ఆదేశించారు. మెట్రో కారిడార్ వెంట ఉన్న ఓవర్హెడ్ విద్యుత్ తీగలను మెట్రో పిల్లర్లకు మార్చే అవకాశాలను కూడా పరిశీలించాలని సంబంధిత శాఖలకు సూచించారు.
అన్ని శాఖలు పరస్పర సమన్వయంతో పనిచేసి నిర్దేశించిన గడువులోపు పనులను పూర్తి చేయాలని కమిషనర్ స్పష్టం చేశారు. ఈ సంయుక్త తనిఖీలో సైబరాబాద్ కమిషనరేట్ జాయింట్ కమిషనర్ ఆఫ్ పోలీస్ (ట్రాఫిక్), జోనల్ కమిషనర్, డిప్యూటీ కమిషనర్, సూపరింటెండింగ్ ఇంజినీర్తో పాటు సీఎంసీ ఇంజినీరింగ్ విభాగం, పోలీస్ శాఖకు చెందిన అధికారులు పాల్గొన్నారు.