సూడాన్లో ఘోరం: నిరాశ్రయుల వాహనంపై డ్రోన్ దాడి, 24 మంది మృతి
యుద్ధంతో అతలాకుతలమవుతున్న సూడాన్ దేశంలో మరోసారి నెత్తురు చిందింది. శనివారం సెంట్రల్ సూడాన్లో ఒక పారామిలటరీ దళం జరిపిన డ్రోన్ దాడిలో ప్రాణభయంతో సురక్షిత ప్రాంతాలకు తరలివెళ్తున్న 24 మంది నిరాశ్రయులు ప్రాణాలు కోల్పోయారు. మృతుల్లో ఎనిమిది మంది చిన్నారులు ఉండటం గమనార్హం. ఈ దాడులను స్థానిక వైద్యుల బృందం ధృవీకరిస్తూ, పౌరుల రక్షణ కోసం అంతర్జాతీయ సమాజం తక్షణమే స్పందించాలని విజ్ఞప్తి చేసింది.
ఉత్తర కొర్దోఫాన్ ప్రావిన్స్లోని రహాద్ నగరం సమీపంలో ఈ ఘోర దాడి జరిగింది. దుబైకర్ ప్రాంతంలో జరుగుతున్న భీకర పోరాటం నుండి తప్పించుకుని, సురక్షిత ప్రాంతాలకు వెళ్తున్న నిరాశ్రయుల కుటుంబాల వాహనాన్ని లక్ష్యంగా చేసుకుని ఈ డ్రోన్ దాడి జరిగినట్లు సమాచారం.
సూడాన్ డాక్టర్స్ నెట్వర్క్ అందించిన వివరాల ప్రకారం, మరణించిన ఎనిమిది మంది చిన్నారుల్లో ఇద్దరు పసికందులు కూడా ఉన్నారు. ఈ దాడికి రాపిడ్ సపోర్ట్ ఫోర్సెస్ అనే పారామిలటరీ దళమే బాధ్యత అని వైద్యుల బృందం ఆరోపించింది.
సూడాన్ దేశం గత మూడు ఏళ్లుగా ఆధిపత్య పోరుతో అట్టుడికిపోతోంది. 2023 ఏప్రిల్లో సూడాన్ ఆర్మీ, ఆర్ఎస్ఎఫ్ మధ్య మొదలైన అధికారం కోసం పోరాటం, ఇప్పుడు దేశాన్ని అరాచకంలోకి నెట్టేసింది. రాజధాని ఖార్టూమ్తో పాటు దేశంలోని ప్రధాన ప్రాంతాలన్నీ యుద్ధ క్షేత్రాలుగా మారాయి. తాజాగా జరిగిన ఈ డ్రోన్ దాడిపై ఆర్ఎస్ఎఫ్ నుండి ఇప్పటివరకు ఎటువంటి అధికారిక వివరణ రాలేదు.
ఐక్యరాజ్యసమితి గణాంకాల ప్రకారం, ఈ అంతర్యుద్ధం కారణంగా ఇప్పటివరకు 40,000 మందికి పైగా పౌరులు మరణించారు. అయితే క్షేత్రస్థాయిలో పరిస్థితిని గమనిస్తున్న సహాయక సంస్థలు, మృతుల సంఖ్య అధికారిక అంచనాల కంటే చాలా రెట్లు ఎక్కువగా ఉండవచ్చని హెచ్చరిస్తున్నాయి. ఈ యుద్ధం వల్ల సుమారు 1.4 కోట్ల మంది ప్రజలు తమ ఇళ్లు వాకిలి వదిలి వలస వెళ్ళవలసి వచ్చింది, ఇది ప్రస్తుత ప్రపంచంలోనే అతిపెద్ద మానవతా సంక్షోభంగా నిలిచింది.
యుద్ధం కారణంగా సూడాన్లో ఆరోగ్య వ్యవస్థ పూర్తిగా కుప్పకూలింది. అనేక ప్రాంతాల్లో ఆహార కొరత ఏర్పడి కరువు పరిస్థితులు నెలకొన్నాయి. పౌర ఆస్తులు, ఆసుపత్రులు నిరాశ్రయుల శిబిరాలపై దాడులు పెరుగుతుండటం పట్ల మానవ హక్కుల సంఘాలు తీవ్ర ఆందోళన వ్యక్తం చేస్తున్నాయి. అమాయక పౌరుల ప్రాణాలను కాపాడటానికి, ఈ ఉల్లంఘనలకు పాల్పడుతున్న వారిని బాధ్యులను చేయడానికి ఐక్యరాజ్యసమితి కఠిన చర్యలు తీసుకోవాలని సూడాన్ ప్రజలు కోరుతున్నారు.