సుప్రీంలో ‘వాంగ్ చుక్’ కేసు విచారణ
వాతావరణ కార్యకర్త, లఢఖ్ కు ప్రత్యేక రాష్ట్ర హోదా ఉద్యమకారుడైన సోనమ్ వాంగ్ చుక్ అరెస్ట్ పై సుప్రీం కోర్టు సోమవారం కీలక వ్యాఖ్యలు చేసింది. జాతీయ భద్రతా చట్టం కింద సోనమ్ ను అరెస్ట్ చేయడాన్ని ఆయన భార్య గీతాంజలి అంగ్మో కోర్టులో సవాల్ చేశారు. అలాగే సుమారు వేయి కిలోమీటర్ల దూరంలో ఉన్న జోధ్ పూర్ జైలుకు తరలించడంపై కూడా ఆమె కోర్టులో పిటిషన్ వేశారు. కనీసం ఆయన అరెస్ట్ గురించి తనకు తెలపలేదని ఆమె కోర్టులో వాపోయారు. దీన్ని విచారణకు స్వీకరించిన జస్టిస్ అరవింద్ కుమార్, ఎన్వీ అంజరియాలతో కూడిన ధర్మాసనం కేంద్ర ప్రభుత్వానికి, రాజస్థాన్, లడఖ్ కేంద్రపాలిత ప్రాంతాల ప్రభుత్వాలకు నోటీసులు జారీ చేసింది. కేసును తదుపరి విచారణను అక్టోబర్ 14 కు వాయిదా వేసింది.
సిబాల్, అడ్వకేట్ జనరల్ మధ్య వాదనలు
సోనమ్ వాంగ్ చుక్ తరపున సీనియర్ న్యాయవాది కపిల్ సిబల్, మరో న్యాయవాది వివేక్ టంఖా వాదించారు. వాంగ్ చుక్ అరెస్ట్ కు సంబంధించి ప్రభుత్వం ఎటువంటి కారణాలు చూపలేదని, రాజ్యాంగంలోని ఆర్టికల్ 22 ప్రకారం ఏ వ్యక్తిని తగిన కారణాలు లేకుండా నిర్భందించడం తగదన్నారు. దీనిపై ప్రభుత్వ తరపు న్యాయవాది సొలిసిటర్ జనరల్ తుషార్ మెహతా సమాధానమిస్తూ ఇప్పటికే వాంగ్ చుక్ అరెస్ట్ కు గల కారణాలు వివరించామని, ఆయన భార్యకు వివరించాల్సిన అవసరం చట్టపరంగా లేదన్నారు. అయినప్పటికీ సాధ్యసాధ్యాలు పరిశీలించి వివరాలు అందించడానికి ప్రయత్నం చేస్తామన్నారు. ఆయన ఆరోగ్యం సరిగా లేదని అందుకుగాను ఆయనకు మధ్యంతర బెయిల్ ఇచ్చి, తాత్కాలిక ఉపశమనం కలిగించాలని సిబల్ కోర్టును కోరారు. అరెస్ట్ సమయంలో ఆయనకు అన్ని రకాల ఆరోగ్య పరీక్షలు చేయించామని, ఆయన ఎలాంటి మందులు తీసుకోవడం లేదని ప్రకటించారని తుషార్ మెహతా వివరించారు. ఆరోగ్యపరంగా ఏమైనా మందులు అవసరమైతే వైద్య సదుపాయాలు కల్పిస్తామన్నారు. కేవలం భావోద్వేగ వాతావారణాన్ని సృష్టించడానికే వాంగ్ చుక్ తరపున ప్రయత్నిస్తున్నారని ఎలాంటి ఆరోగ్య సమస్యలు ఆయనకు లేవని తెలిపారు. భర్తను కలవడానికి అవకాశం ఇవ్వాలని సిబల్ ధర్మాసనాన్ని కోరారు. అయితే అందుకు సంబంధించి పిటిషన్ ఇవ్వాలని పరిశీలిస్తామని మెహతా తెలిపారు. లఢఖ్ లో చెలరేగిన ఆందోళనలకు వాంగ్ చుక్ ను బాధ్యుడిని చేస్తూ సెప్టెంబర్ 26 న ఆయనను అరెస్ట్ చేసి రాజస్థాన్ లోని జోధ్ పూర్ సెంట్రల్ జైలుకు తరలించిన విషయం తెలిసిందే.