సునీల్ అమృత్‌కు బ్రిటిష్ అకాడమీ బుక్ ప్రైజ్

భారతీయ మూలాలున్న ప్రముఖ చరిత్రకారుడు సునీల్ అమృత్ ప్రతిష్టాత్మక 2025 బ్రిటిష్ అకాడమీ బుక్ ప్రైజ్‌ను గెలుచుకున్నారు. ఆయన రాసిన పుస్తకం "ది బర్నింగ్ ఎర్త్: యాన్ ఎన్విరాన్‌మెంటల్ హిస్టరీ ఆఫ్ ది లాస్ట్ 500 ఇయర్స్" ఈ అవార్డును దక్కించుకుంది. మానవ చరిత్ర, పర్యావరణ పరివర్తనల మధ్య ఉన్న లోతైన సంబంధాన్ని తెలియజేసే అద్భుతమైన నాన్-ఫిక్షన్ రచనలకు ఈ అవార్డును ఏటా అందిస్తారు. ఈ ప్రైజ్ కింద విజేతకు 25 వేల పౌండ్ల నగదు బహుమతి లభిస్తుంది.

సునీల్ అమృత్ పుస్తకం గురించి

సునీల్ అమృత్ యేల్ యూనివర్సిటీలో హిస్టరీ ప్రొఫెసర్‌గా పనిచేస్తున్నారు. ఆయనకు అవార్డు తెచ్చిపెట్టిన "ది బర్నింగ్ ఎర్త్" పుస్తకం గత 500 ఏళ్ల పర్యావరణ చరిత్రను సమగ్రంగా వివరిస్తుంది. ఈ పుస్తకం మానవ చరిత్ర, సామ్రాజ్యాలు, పరిశ్రమలు, వలసల కారణంగా భూగోళం ఎలా రూపాంతరం చెందిందో, నేటి వాతావరణ సంక్షోభానికి ఎలా దారితీసిందో వివరిస్తుంది.

వలస పాలన, పారిశ్రామికీకరణ, మారుతున్న మానవ ఆవాసాల నమూనాలు ఆధునిక ప్రపంచాన్ని ఎలా తీర్చిదిద్దాయి, తద్వారా నేటి వాతావరణ సంక్షోభానికి దారితీశాయి అనే అంశాలను అమృత్ తన పరిశోధనల ద్వారా వివరించారు. ఈ పుస్తకం వందల సంవత్సరాల పాటు ఖండాలను కలుపుతూ విస్తరించింది. పెరూలో పోర్చుగీస్ వెండి తవ్వకాలు మొదలుకుని, దక్షిణాఫ్రికాలో బ్రిటిష్ బంగారు తవ్వకాలు, కాలనీల రైల్వేలు, మధ్య ఆసియాలోని చమురు పైప్‌లైన్‌ల వరకు దోపిడీ, సామ్రాజ్యం ఆధునిక ప్రపంచాన్ని ఎలా రూపొందించాయో అమృత్ పరిశోధించారు. మానవ చరిత్రను భూగోళ చరిత్ర నుండి విడదీయలేమని ఆయన వాదించారు. పర్యావరణ వినాశనం అనేది రాజకీయ శక్తి, లాభాపేక్ష, అసమానత వంటి శక్తుల ద్వారా ప్రేరేపించబడిందని ఆయన తెలిపారు. న్యాయ నిర్ణేతలు ఈ పుస్తకాన్ని "అద్భుతమైనది"గా ప్రశంసించారు. నేటి వాతావరణ సంక్షోభ మూలాలను అర్థం చేసుకోవాలనుకునే ప్రతి ఒక్కరికీ ఇది ముఖ్యమైన పఠనం అని న్యాయ నిర్ణేతలు పేర్కొన్నారు.

సునీల్ అమృత్ నేపథ్యం

సునీల్ అమృత్ భారతీయ మూలాలున్న తల్లిదండ్రులకు కెన్యాలో జన్మించారు, సింగపూర్‌లో పెరిగారు. కేంబ్రిడ్జ్ యూనివర్సిటీ నుండి పట్టభద్రులైన ఆయన ప్రస్తుతం అమెరికాలోని యేల్ యూనివర్సిటీలో హిస్టరీ ప్రొఫెసర్‌గా పనిచేస్తున్నారు. ఈయన ముఖ్యంగా ఆసియా చరిత్ర, వలసలు, పర్యావరణ చరిత్ర, ప్రజారోగ్యం వంటి అంశాలపై పరిశోధన చేస్తారు. ఈ అవార్డు ద్వారా నేటి క్లిష్టమైన సమస్యలను అర్థం చేసుకోవడంలో మానవీయ శాస్త్రాలు, సామాజిక శాస్త్రాల పరిశోధన ఎంత ముఖ్యమో బ్రిటిష్ అకాడమీ మరోసారి చాటిచెప్పింది.

బ్రిటిష్ అకాడమీ బుక్ ప్రైజ్ గురించి..

బ్రిటిష్ అకాడమీ బుక్ ప్రైజ్‌ను 2013లో స్థాపించారు. ఈ అవార్డును మానవీయ శాస్త్రాలు, సామాజిక శాస్త్రాల రంగాల్లో అసాధారణ పరిశోధన ఆధారంగా రాసిన రచనలకు అందిస్తారు. విజేతకు 25 వేల పౌండ్లు, షార్ట్‌లిస్ట్ అయిన మిగిలిన ఐదుగురు రచయితలకు ఒక్కొక్కరికి వెయ్యి పౌండ్లు చొప్పున నగదు బహుమతి అందిస్తారు. ఈ అవార్డుకు అర్హత పొందాలంటే నాన్-ఫిక్షన్ పుస్తకం తప్పనిసరిగా యూకేలో ప్రచురించబడి, ఆంగ్ల భాషలో అందుబాటులో ఉండాలి. రచయిత ఏ జాతీయత వారైనా, ప్రపంచంలో ఎక్కడ నివసిస్తున్నవారైనా పర్వాలేదు.

బ్రిటిష్ అకాడమీ బుక్ ప్రైజ్‌ను సునీల్ అమృత్ కంటే ముందు ప్రముఖ భారత సంతతి రచయిత్రి నందిని దాస్ 2023లో గెలుచుకున్నారు. "కోర్టింగ్ ఇండియా: ఇంగ్లండ్, మొఘల్ ఇండియా అండ్ ది ఆరిజిన్స్ ఆఫ్ ఎంపైర్” అనే పుస్తకానికి గానూ ఈ అవార్డు ఆమెను వరించింది. భారతదేశంలో జన్మించిన నందిని దాస్ ఆక్స్‌ఫర్డ్ యూనివర్సిటీలో ఇంగ్లీష్ ప్రొఫెసర్‌గా పనిచేస్తున్నారు. ఆమె రాసిన ఈ పుస్తకం 17వ శతాబ్దంలో మొఘల్ ఆస్థానానికి మొట్టమొదటి ఆంగ్ల రాయబారి సర్ థామస్ రో రాక ద్వారా బ్రిటన్, భారతదేశ సామ్రాజ్య మూలాలను కొత్త దృక్పథంతో విశ్లేషిస్తుంది.