సుక్మాలో 26 మంది నక్సలైట్ల లొంగుబాటు

ఛత్తీస్‌గఢ్‌లోని సుక్మా జిల్లాలో బుధవారం 26 మంది నక్సలైట్లు లొంగిపోయారు. వీరిలో 13 మందిపై మొత్తం రూ.65 లక్షల బహుమతులు ఉన్నాయని జిల్లా ఎస్పీ కిరణ్ చవాన్ తెలిపారు. ఏడుగురు మహిళలు సహా ఈ నక్సలైట్లు ‘పూనా మార్గెం’ (పునరావాసం నుంచి సామాజిక పునఃసమాఖ్య వరకు) పథకం కింద సీనియర్ పోలీసు, సీఆర్పీఎఫ్ అధికారుల సమక్షంలో లొంగిపోయారని ఆయన చెప్పారు. లొంగిపోయిన వారు మావోయిస్టుల పీపుల్స్ లిబరేషన్ గెరిల్లా ఆర్మీ (పీఎల్జీఏ), దక్షిణ బస్తర్ డివిజన్, మాడ్ డివిజన్, ఆంధ్ర–ఒడిశా సరిహద్దు డివిజన్లలో క్రియాశీలకంగా పనిచేసిన వారని తెలిపారు. అబుజ్‌మాడ్, సుక్మా (ఛత్తీస్‌గఢ్)తో పాటు ఒడిశా సరిహద్దు ప్రాంతాల్లో జరిగిన పలు హింసాత్మక ఘటనల్లో వీరి పాత్ర ఉందన్నారు. రాష్ట్ర ప్రభుత్వ లొంగుబాటు–పునరావాస విధానం తమను ప్రభావితం చేసిందని లొంగిపోయిన నక్సలైట్లు వెల్లడించినట్లు ఎస్పీ తెలిపారు.

లొంగిపోయిన వారిలో లాలి అలియాస్ ముచాకి ఆయితే లఖ్ము (35) అనే కంపెనీ పార్టీ కమిటీ సభ్యురాలిపై రూ.10 లక్షల బహుమతి ఉంది. 2017లో ఒడిశాలోని కోరాపుట్ రోడ్డుపై వాహనాన్ని లక్ష్యంగా చేసుకుని జరిగిన ఐఈడీ పేలుడులో 14 మంది భద్రతా సిబ్బంది మృతి చెందిన ఘటన సహా పలు ప్రధాన దాడుల్లో ఆమె పాల్గొన్నట్లు పోలీసులు తెలిపారు. అలాగే హెమ్లా లఖ్మా (41), ఆస్మిత అలియాస్ కమ్లు సన్ని (20), రంబతి అలియాస్ పదం జోగి (21), సుందం పాలే (20) లపై తలా రూ.8 లక్షల బహుమతి ఉంది. హెమ్లా లఖ్మా 2020లో సుక్మా జిల్లా మిన్పా అంబుష్‌లో 17 మంది భద్రతా సిబ్బంది మృతి చెందిన ఘటనలో పాత్రధారి అని అధికారులు తెలిపారు. ఇతర లొంగిపోయిన వారిలో ముగ్గురిపై తలా రూ.5 లక్షలు, ఒకరిపై రూ.3 లక్షలు, ఒకరిపై రూ.2 లక్షలు, ముగ్గురిపై తలా రూ.1 లక్ష బహుమతి ఉందని వెల్లడించారు. లొంగిపోయిన ప్రతి నక్సలైట్‌కు తక్షణ సాయంగా రూ.50,000 అందజేసి, ప్రభుత్వ విధానాల ప్రకారం పూర్తి పునరావాసం కల్పిస్తామని అధికారులు తెలిపారు. హింసను విడిచిపెట్టి లొంగిపోతే భద్రతతో పాటు గౌరవప్రదమైన జీవితం అందిస్తామని ఎస్పీ కిరణ్ చవాన్ మావోయిస్టులకు విజ్ఞప్తి చేశారు.