సిద్దిపేట ఐటీ టవర్ను సందర్శించిన మాజీ మంత్రి హరీష్ రావు
మాజీ మంత్రి, సిద్దిపేట ఎమ్మెల్యే తన్నీరు హరీష్ రావు బుధవారం సిద్దిపేటలోని ఐటీ టవర్ను సందర్శించారు. ఈ సందర్భంగా టవర్లోని నాలుగు అంతస్తులను కలియతిరిగిన ఆయన, అక్కడ వివిధ కంపెనీల్లో ఉద్యోగాలు చేస్తున్న యువతతో సరదాగా ముచ్చటించారు. ఐటీ టవర్లో కల్పిస్తున్న సౌకర్యాలు, పని వాతావరణంపై ఆరా తీశారు. ముఖ్యంగా సెక్యూరిటీ సిబ్బంది, ఇతర వర్కర్లకు జీతాలు ఆలస్యంగా వస్తున్నాయని తెలిసి, వెంటనే చెల్లింపులు జరగాలని అధికారులను ఆదేశించారు.
ఈ సందర్భంగా హరీష్ రావు మాట్లాడుతూ, సొంతూరులోనే చదువుకొని అదే ప్రాంతంలో ఉద్యోగ అవకాశాలు పొందాలనే యువత ఆకాంక్షలను దృష్టిలో పెట్టుకొని గత బీఆర్ఎస్ ప్రభుత్వం హయాంలో సిద్దిపేటలో ఐటీ టవర్ను ఏర్పాటు చేసినట్లు తెలిపారు. గ్రామీణ ప్రాంతాల యువత నగరాలకు వలస వెళ్లకుండా, తమ ప్రాంతంలోనే ఉపాధి అవకాశాలు పొందాలనే లక్ష్యంతో ఈ ప్రాజెక్ట్ను తీసుకువచ్చినట్లు చెప్పారు.
ప్రస్తుతం సిద్దిపేట ఐటీ టవర్లో 17 కంపెనీలు కార్యకలాపాలు నిర్వహిస్తున్నాయని, సుమారు 350 మంది యువత ఉద్యోగాలు చేస్తున్నారని ఆయన పేర్కొన్నారు. స్థానిక యువత నైపుణ్యాలను పెంపొందించేందుకు టాస్క్ ట్రైనింగ్ సెంటర్ను కూడా ఏర్పాటు చేసినట్లు తెలిపారు. ఈ కేంద్రంలో నిరంతరం శిక్షణ కార్యక్రమాలు జరుగుతున్నాయని, యువత ఈ అవకాశాలను సద్వినియోగం చేసుకొని తమ భవిష్యత్తును మెరుగుపరుచుకోవాలని ఆయన సూచించారు.
ఐటీ టవర్లోని నాలుగు అంతస్తులను సందర్శించిన హరీష్ రావు, అక్కడి వాతావరణం, సౌకర్యాలపై ఉద్యోగుల అభిప్రాయాలను తెలుసుకున్నారు. సిద్దిపేటలో మరిన్ని ఉద్యోగ అవకాశాలు సృష్టించేందుకు కృషి కొనసాగుతుందని ఆయన తెలిపారు. స్థానిక యువతకు ఉపాధి కల్పనలో ఐటీ టవర్ కీలక పాత్ర పోషిస్తుందని ఆయన అభిప్రాయపడ్డారు.