సింగరేణి సీఎండీగా కృష్ణ భాస్కర్ బాధ్యతలు స్వీకరణ

సీనియర్ ఐఏఎస్ అధికారి డీ. కృష్ణ భాస్కర్ మంగళవారం రాష్ట్ర ప్రభుత్వ రంగ బొగ్గు సంస్థ సింగరేణి కొలియరీస్ కంపెనీ లిమిటెడ్ (ఎస్‌సీసీఎల్) చైర్మన్ అండ్ మేనేజింగ్ డైరెక్టర్ (సీఎండీ)గా బాధ్యతలు స్వీకరించారు. ప్రస్తుతం తెలంగాణ ట్రాన్స్‌మిషన్ కార్పొరేషన్ (ట్రాన్స్‌కో) సీఎండీగా పనిచేస్తున్న కృష్ణ భాస్కర్‌కు సింగరేణి సీఎండీగా పూర్తి అదనపు బాధ్యతలు అప్పగిస్తూ తెలంగాణ ప్రభుత్వం ఉత్తర్వులు జారీ చేసింది.

ప్రస్తుత సీఎండీ ఎన్. బాలారాం (ఐఆర్‌ఎస్ అధికారి) తన మాతృ కేడర్‌కు తిరిగి వెళ్లడంతో ఈ నియామకం జరిగింది. 2012 బ్యాచ్‌కు చెందిన ఐఏఎస్ అధికారి అయిన కృష్ణ భాస్కర్, తెలంగాణ ఉప ముఖ్యమంత్రి మల్లు భట్టి విక్రమార్కకు ప్రత్యేక కార్యదర్శిగా కూడా సేవలందిస్తున్నారు. ఇంతకు ముందు ఆయన రాజన్న సిరిసిల్లా, సిద్దిపేట జిల్లాల కలెక్టర్‌గా పనిచేశారు. సింగరేణి కొలియరీస్ కంపెనీ లిమిటెడ్ తెలంగాణ ప్రభుత్వం, కేంద్ర ప్రభుత్వాలు కలిసి 51:49 ఈక్విటీ వాటాతో నిర్వహిస్తున్న ప్రభుత్వ రంగ బొగ్గు గనుల సంస్థ.