సింగరేణి భవన్ ముట్టడికి యత్నం: కవిత అరెస్ట్
నాంపల్లిలోని సింగరేణి భవన్ వద్ద ఆందోళనకు దిగిన తెలంగాణ జాగృతి అధ్యక్షురాలు కవితను పోలీసులు అదుపులోకి తీసుకున్నారు. సింగరేణిలో డిపెండెంట్ ఉద్యోగాలను పునరుద్ధరించాలని, మెడికల్ బోర్డు వెంటనే ఏర్పాటు చేయాలని కోరుతూ తెలంగాణ జాగృతి, హెచ్ఎంఎస్ సంయుక్తంగా సింగరేణి భవన్ ముట్టడికి యత్నించారు.
సింగరేణి ఉద్యోగులకు సంబంధించిన కీలక అంశాలు నెలలుగా పెండింగ్లోనే ఉన్నాయని ఆమె పేర్కొన్నారు. ముఖ్యంగా, డిపెండెంట్ ఉద్యోగాల పునరుద్ధరణ అలాగే వైద్య బోర్డు ఏర్పాటు వంటి అంశాలు వేలాది కుటుంబాల భవిష్యత్తును ప్రభావితం చేస్తున్నాయని గుర్తుచేశారు. ఈ సమస్యలను పరిష్కరించేందుకు ప్రభుత్వం ఆలస్యం చేస్తోందని, కార్మికుల న్యాయమైన డిమాండ్లపై స్పందించాల్సిన బాధ్యత అధికారులదేనని ఆమె పేర్కొన్నారు.
సింగరేణి కార్మికుల హక్కుల కోసం పోరాటం కొనసాగుతుందని ఆమె అన్నారు. ప్రభుత్వం ఎంతటి ఒత్తిడులు తీసుకొచ్చినా వెనక్కి తగ్గబోమని, సింగరేణి ఉద్యోగులకు న్యాయం జరిగే వరకు ప్రజాస్వామ్య మార్గంలో పోరాటం కొనసాగుతుందని ఆమె తెలిపారు. కార్మికుల గౌరవం, ఉపాధి భద్రత, కుటుంబాల భవిష్యత్తు కోసం ఈ పోరాటం మరింత బలంగా కొనసాగుతుందని ఆమె తెలిపారు.ఈక్రమంలో కవితతో పాటు హెచ్ఎంఎస్ ప్రధాన కార్యదర్శి రియాజ్ అహ్మద్, అధ్యక్షుడు తిప్పారపు సారయ్య సహా పలువురు నాయకులను అరెస్ట్ చేసిన పోలీసులు నాంపల్లి పోలీస్ స్టేషన్ కు తరలించారు.
డిపెండెంట్ ఉద్యోగాల పునరుద్ధరణ
సింగరేణిలో పనిచేసే ఉద్యోగి మరణించినప్పుడు లేదా శారీరకంగా పనికిరాని స్థితికి చేరినప్పుడు వారి కుటుంబ సభ్యులకు డిపెండెంట్ ఉద్యోగం ఇవ్వడం అనేది ఎన్నో ఏళ్లుగా అమల్లో ఉన్న విధానం.ఇది ఇటీవల నిలిపివేయబడటం వల్ల వేలాది కుటుంబాలు ఇబ్బందులు ఎదుర్కొంటున్నాయి.అందుకే డిపెండెంట్ ఉద్యోగాలను మళ్లీ అమల్లోకి తేవాలి అనే డిమాండ్ బలంగా పెరుగుతోంది.
మెడికల్ బోర్డు ఏర్పాటు
ఉద్యోగులు పనికి అనర్హులయ్యే ఆరోగ్య సమస్యలు వచ్చినప్పుడు, వారి వైద్య అర్హతను నిర్ణయించే మెడికల్ బోర్డు ఏర్పాటు చేయాలని డిమాండ్ చేస్తున్నారు.ఇది ఏర్పాటు అయితే, అనారోగ్యంతో బాధపడుతున్న కార్మికుల కుటుంబాలకు డిపెండెంట్ ఉద్యోగాలు, లేదా ఇతర ప్రయోజనాలు సులభంగా లభిస్తాయి.