సాగునీటి సంక్షోభంపై అప్రమత్తం కావాలి.. రైతులకు పవన్ సూచనలు!
రాష్ట్రంలో సూపర్ ఎల్నినో ప్రభావంతో ఏర్పడుతున్న సాగునీటి సంక్షోభాన్ని సమర్థవంతంగా ఎదుర్కోవాలంటే రైతుల్లో విస్తృత స్థాయిలో అవగాహన కల్పించాలని రాష్ట్ర ఉప ముఖ్యమంత్రి పవన్ కళ్యాణ్ అధికారులకు, ప్రజాప్రతినిధులకు సూచించారు. కేవలం ప్రభుత్వ చర్యలతోనే కాకుండా ప్రజాప్రతినిధులు కూడా రైతులకు అండగా నిలిచి, ప్రస్తుత పరిస్థితులను వివరించి, ప్రత్యామ్నాయ సాగు విధానాలపై అవగాహన కల్పిస్తే సంక్షోభాన్ని కొంతవరకు అధిగమించవచ్చని ఆయన అభిప్రాయపడ్డారు.
గురువారం మంగళగిరిలోని తన క్యాంపు కార్యాలయంలో రాష్ట్ర జలవనరుల శాఖ మంత్రి నిమ్మల రామానాయుడుతో పవన్ కళ్యాణ్ సమావేశమయ్యారు. రాష్ట్రంలో నెలకొన్న సూపర్ ఎల్నినో పరిస్థితులు, సాగునీటి కొరత, రైతులకు ప్రభుత్వం అందిస్తున్న సహాయం, భవిష్యత్ కార్యాచరణపై ఇద్దరూ విస్తృతంగా చర్చించారు.
సమావేశంలో మంత్రి నిమ్మల రామానాయుడు మాట్లాడుతూ కాకినాడ జిల్లా పిఠాపురం, పెద్దాపురం, జగ్గంపేట తదితర ప్రాంతాల్లో సాగునీటి అవసరాలను దృష్టిలో ఉంచుకుని ఉప ముఖ్యమంత్రి సూచనల మేరకు ఏలేరు ప్రాజెక్టు నుంచి వెంటనే 1,000 క్యూసెక్కుల నీటిని విడుదల చేయడం జరిగిందని తెలిపారు. రైతుల సమస్యలను వెంటనే పరిష్కరించేలా స్పందించినందుకు ఉప ముఖ్యమంత్రి పవన్ కళ్యాణ్కు ఆయన కృతజ్ఞతలు తెలియజేశారు.
అలాగే కాకినాడ జిల్లా, పిఠాపురం పరిసర ప్రాంతాల్లో నెలకొన్న నీటి కొరత పరిస్థితులను స్వయంగా పరిశీలించేందుకు ఏలేరు ఆయకట్టు ప్రాంతాల్లో క్షేత్రస్థాయి పర్యటన చేపట్టనున్నట్లు మంత్రి వెల్లడించారు. రైతుల నుంచి నేరుగా సమస్యలను తెలుసుకుని అవసరమైన చర్యలు తీసుకుంటామని చెప్పారు.
ఈ సందర్భంగా పవన్ కళ్యాణ్ మాట్లాడుతూ, సూపర్ ఎల్నినో ప్రభావం రాష్ట్ర వ్యవసాయ రంగంపై తీవ్ర ప్రభావం చూపే అవకాశం ఉన్నందున రైతులను ముందుగానే అప్రమత్తం చేయాల్సిన అవసరం ఉందన్నారు. అధికారులు, ప్రజాప్రతినిధులు గ్రామాల వారీగా రైతులతో ప్రత్యక్ష సమావేశాలు నిర్వహించి, ప్రస్తుతం నెలకొన్న వాతావరణ పరిస్థితులు, నీటి లభ్యత, ప్రభుత్వం చేపడుతున్న చర్యల గురించి వివరించాలని సూచించారు.
ప్రకృతి వైపరీత్యాల వల్ల రైతులు నష్టపోకుండా ఉండేందుకు ప్రతి రైతు ప్రధానమంత్రి ఫసల్ బీమా యోజన కింద పంటల బీమా నమోదు చేసుకునేలా ప్రత్యేక అవగాహన కార్యక్రమాలు నిర్వహించాలని ఆయన ఆదేశించారు. బీమా పథకం ద్వారా కలిగే ప్రయోజనాలను రైతులకు సులభంగా అర్థమయ్యేలా వివరించాలని సూచించారు.
ప్రస్తుతం రాష్ట్రంలో ప్రతి నీటి బొట్టు అత్యంత విలువైనదని పేర్కొన్న ఉప ముఖ్యమంత్రి, అందుబాటులో ఉన్న నీటిని అత్యంత సమర్థవంతంగా వినియోగించాల్సిన అవసరం ఉందన్నారు. కాలువల్లో పేరుకుపోయిన పూడికను తొలగించడం, గట్లలో లీకేజీలను నివారించడం, నీటి వృథాను అరికట్టే చర్యలను వేగవంతం చేయాలని జలవనరుల శాఖ అధికారులకు సూచించారు. నీటి నిర్వహణలో ఎలాంటి నిర్లక్ష్యానికి తావు లేకుండా చర్యలు చేపట్టాలని చెప్పారు.
ముఖ్యంగా కాకినాడ జిల్లా, పిఠాపురం నియోజకవర్గంలో సాగునీటి సమస్య తీవ్రంగా ఉన్నందున ఆ ప్రాంతంపై ప్రత్యేక దృష్టి పెట్టాలని పవన్ కళ్యాణ్ స్పష్టం చేశారు. రైతులకు అవసరమైన సహాయ సహకారాలు అందేలా సమన్వయంతో పనిచేయాలని, ప్రత్యామ్నాయ పంటల సాగు, నీటి పొదుపు పద్ధతులపై కూడా అవగాహన కల్పించాలని సూచించారు.
సమావేశంలో సూపర్ ఎల్నినో ప్రభావాన్ని ఎదుర్కొనేందుకు ప్రభుత్వం తీసుకోవాల్సిన దీర్ఘకాలిక చర్యలు, నీటి వనరుల సమర్థ వినియోగం, రైతుల ఆర్థిక భద్రత, పంటల బీమా నమోదు, క్షేత్రస్థాయి పర్యటనల ద్వారా ప్రజల్లో చైతన్యం పెంపొందించే అంశాలపై కూడా చర్చ జరిగింది.
సమావేశానికి ముందు భుజానికి శస్త్రచికిత్స చేయించుకున్న ఉప ముఖ్యమంత్రి పవన్ కళ్యాణ్ను మంత్రి నిమ్మల రామానాయుడు పరామర్శించారు. ఆయన ఆరోగ్య పరిస్థితిని అడిగి తెలుసుకుని, త్వరగా పూర్తిగా కోలుకుని తిరిగి ప్రజా సేవలో మరింత చురుకుగా పాల్గొనాలని ఆకాంక్షించారు. ఈ సందర్భంగా ఇద్దరూ రాష్ట్ర అభివృద్ధి, రైతు సంక్షేమం, సాగునీటి నిర్వహణకు సంబంధించి పలు అంశాలపై కూడా చర్చించినట్లు అధికారులు తెలిపారు.