సెమీ ఫైనల్స్‌కు సాత్విక్‍‍-చిరాగ్ జోడీ

భారత పురుషుల డబుల్స్ జోడీ సాత్విక్ సాయిరాజ్ రంకిరెడ్డి, చిరాగ్ శెట్టి చైనా మాస్టర్స్ సెమీఫైనల్‌లోకి ప్రవేశించారు. శుక్రవారం షెన్‌జెన్ అరేనాలో జరిగిన క్వార్టర్ ఫైనల్ పోరులో ఈ ద్వయం చైనా జోడీ రెన్ జియాంగ్ యూ, జి హావోనాన్‌లను వరుస గేమ్స్‌లో ఓడించింది. కేవలం 37 నిమిషాలు సాగిన ఈ మ్యాచ్‌లో భారత ఆటగాళ్లు 21-14, 21-14 తేడాతో విజయం సాధించారు. ఈ విజయంతో సాత్విక్-చిరాగ్ ఈ ఏడాదిలో ఏడోసారి సెమీ ఫైనల్‌కు చేరుకున్నారు.

ఇటీవలే హాంగ్ కాంగ్ ఓపెన్ ఫైనల్‌లో ఈ జోడీ చైనాకు చెందిన ఒలింపిక్ రజత పతక విజేతలు లియాంగ్ వీ కెంగ్, వాంగ్ చాంగ్‌తో తలపడింది. 61 నిమిషాల పాటు ఉత్కంఠగా సాగిన ఆ పోరులో 21-19, 14-21, 17-21 తేడాతో ఓటమి పాలయ్యారు. హాంగ్ కాంగ్ టోర్నమెంట్‌కు ముందు ఈ భారత డబుల్స్ జోడీ ప్రపంచ ఛాంపియన్‌షిప్‌లో కాంస్య పతకాన్ని సాధించింది.

ప్చ్.. సింధు ఓటమి

భారత స్టార్ షట్లర్ పి.వి. సింధు చైనా మాస్టర్స్ టోర్నమెంట్‌లో నిరాశపరిచారు. మహిళల సింగిల్స్ క్వార్టర్ ఫైనల్స్‌లో ప్రపంచ నంబర్ వన్ క్రీడాకారిణి, దక్షిణ కొరియాకు చెందిన ఆన్ సె యంగ్ చేతిలో ఓడి టోర్నమెంట్ నుంచి నిష్క్రమించారు. శుక్రవారం జరిగిన ఈ మ్యాచ్‌లో సింధు 14-21, 13-21 తేడాతో వరుస గేమ్స్‌లో పరాజయం పాలయ్యారు. మొత్తం 38 నిమిషాల పాటు సాగిన ఈ పోరులో ఆన్ సె యంగ్ వేగం, కచ్చితమైన షాట్‌ల ముందు సింధు నిలవలేకపోయారు. సింధు తనదైన శైలిలో కొన్ని అద్భుతమైన క్రాస్-కోర్టు డ్రాప్‌లు, రౌండ్-ది-హెడ్ స్మాష్‌లను ప్రదర్శించినప్పటికీ, ఆన్ సె యంగ్ నిరంతర దాడిని ఎదుర్కోవడంలో ఆమె ఇబ్బందులు పడ్డారు.

మొదటి గేమ్ ప్రారంభంలోనే సింధు 1-6తో వెనుకబడ్డారు. కొంత పాయింట్ల తేడాను తగ్గించినప్పటికీ, ఆన్ సె యంగ్ తన దూకుడైన ఆటతో ఆధిక్యాన్ని కొనసాగించారు. ఇక రెండో గేమ్ మొదట్లో సింధు 3-2తో స్వల్ప ఆధిక్యం సాధించినా, దానిని ఎక్కువసేపు నిలబెట్టుకోలేకపోయారు. ఆన్ సె యంగ్ తన టెక్నిక్స్, శక్తివంతమైన షాట్‌లతో స్కోరును పెంచుకుంటూ విజయం సాధించారు. ఈ ఓటమితో ఆన్ సె యంగ్‌పై సింధుకి వరుసగా ఎనిమిదో పరాజయం నమోదైంది.

పారిస్ ఒలింపిక్స్‌లో తొలి రౌండ్‌లోనే నిష్క్రమించిన సింధు, అగ్రశ్రేణి క్రీడాకారిణులపై ఆమె ఫామ్ కోల్పోవడంపై ఇప్పుడు చర్చ జరుగుతోంది. రాబోయే టోర్నమెంట్ల కోసం ఆమె సిద్ధమవుతూ, అంతర్జాతీయ స్థాయిలో తిరిగి తన స్థిరత్వాన్ని సాధించాల్సిన అవసరం ఉందని క్రీడా విశ్లేషకులు అభిప్రాయపడుతున్నారు.