స్థానిక ఎన్నికలపై తలోమాట!

స్థానిక ఎన్నికల నిర్వహణకు సంబంధించి కాంగ్రెస్ పార్టీలో గందరగోళం నెలకొన్నట్టు కనిపిస్తోంది. ముఖ్యమంత్రి, మంత్రుల అభిప్రాయాలు వేర్వేరుగా ఉండటమే ఇందుకు కారణం. స్థానిక ఎన్నికలు సెప్టెంబర్ 30లోగా నిర్వహించలేమని.. ఈ విషయంపై తాము అవసరమైతే సుప్రీం కోర్టుకు వెళతామని ముఖ్యమంత్రి రేవంత్ రెడ్డి ఢిల్లీలో వ్యాఖ్యానించారు. మరోవైపు మంత్రులు మాత్రం ఈ ఎన్నికలు వీలైనంత తొందరగా నిర్వహించాలని భావిస్తున్నారు. ఈ మేరకు వారు ముఖ్యమంత్రి రేవంత్ రెడ్డికి ఎన్నికలు త్వరలో నిర్వహించాలని సూచించారు.

సొంత పార్టీలోనే భిన్నాభిప్రాయాలు

ముఖ్యమంత్రి, మంత్రుల మధ్య స్థానిక ఎన్నికల నిర్వహణ విషయంలో భిన్నాభిప్రాయాలు ఉన్నట్టు తెలుస్తోంది. ప్రస్తుతం రాష్ట్రంలో యూరియా కొరత, గ్రామీణ ప్రాంతాల్లో ప్రభుత్వ వ్యతిరేకత ఉండటంతో సీఎం రేవంత్ రెడ్డి ఎన్నికల విషయంలో కాస్త వెనక్కి తగ్గినట్టు తెలిసింది. కానీ మంత్రులు మాత్రం ఈ విషయంలో దూకుడుగా ఉన్నారు. స్థానిక ఎన్నికల నిర్వహణ ఆలస్యమయ్యే కొద్దీ పార్టీకి మరింత నష్టం జరుగుతుందని వారు అభిప్రాయపడుతున్నారు. ఈ నేపథ్యంలో ఇటీవల జ - రిగిన సమావేశంలో వీలైనంత త్వరగా ఎన్నికలు నిర్వహించాలని వారు అభిప్రాయపడ్డారు.

సీఎం ఢిల్లీలో ఏమన్నారు?

ముఖ్యమంత్రి రేవంత్‌ రెడ్డి ఢిల్లీ పర్యటనలో స్థానిక ఎన్నికలపై కీలక వ్యాఖ్యలు చేశారు. సెప్టెంబర్‌ 30లోగా ఎన్నికలు నిర్వహించడం సాధ్యం కాదని, అవసరమైతే సుప్రీంకోర్టుకు వెళ్లి సమయం తీసుకుంటామని ఆయన ప్రకటించారు. రాష్ట్రంలో ప్రస్తుతం యూరియా కొరత, గ్రామీణ ప్రాంతాల్లో ప్రభుత్వంపై వ్యతిరేకత వంటి సమస్యలు ఉన్నాయని, ఇవి ఎన్నికల ఫలితాలపై ప్రభావం చూపవచ్చని సీఎం భావిస్తున్నట్టు పార్టీ వర్గాలు చెబుతున్నాయి. ఈ సమస్యలను పరిష్కరించకుండా ఎన్నికలకు వెళ్తే పార్టీకి నష్టం జరుగుతుందనేది ఆయన ఆందోళన. మరోవైపు, మంత్రులు మాత్రం భిన్నమైన ధోరణి ప్రదర్శిస్తున్నారు.

గతంలోనూ భిన్నాభిప్రాయాలు

కాంగ్రెస్‌ పార్టీలో ముఖ్యమంత్రి, మంత్రుల మధ్య భిన్నాభిప్రాయాలు బహిర్గతమవడం ఇది మొదటిసారి కాదు. గతంలోనూ కొన్ని నిర్ణయాల్లో ముఖ్యమంత్రి, మంత్రుల నిర్ణయాలు భిన్నంగానే ఉన్నాయి. కొందరు మంత్రుల ఒత్తిడి వల్లే ముఖ్యమంత్రి రేవంత్ రెడ్డి రైతు భరోసా పథకం అమలు చేయాలని నిర్ణయం తీసుకున్నట్టు గతంలో వార్తలు వచ్చాయి. రాష్ట్రంలో గ్రామీణ ప్రాంతాల్లో ప్రభుత్వంపై అసంతృప్తి పెరుగుతున్న నేపథ్యంలో సీఎం రేవంత్‌ ఎన్నికల విషయంలో జాగ్రత్తగా వ్యవహరిస్తున్నారు. యూరియా కొరత వంటి వ్యవసాయ సమస్యలు రైతుల్లో అసంతృప్తి పెంచుతున్నాయి. ఇవి స్థానిక ఎన్నికల్లో ప్రతికూలంగా మారవచ్చని ఆయన ఆందోళన చెందుతున్నారు. మరోవైపు, మంత్రులు ఎన్నికల ఆలస్యాన్ని పార్టీకి నష్టంగా చూస్తున్నారు. స్థానిక సంస్థలు ఖాళీగా ఉండటం వల్ల ప్రజల్లో అసంతృప్తి పెరిగి, విపక్షాలు దాన్ని రాజకీయంగా వినియోగించుకోవచ్చని వారి వాదన.

స్థానిక ఎన్నికలు.. ముఖ్యమంత్రి, మంత్రులకు పరీక్ష

రాష్ట్రంలో త్వరలో నిర్వహించబోయే స్థానిక సంస్థల ఎన్నికలు అటు ముఖ్యమంత్రికి.. ఇటు మంత్రులకు కూడా పరీక్షగా మారబోతున్నాయి. మంత్రులకు సంబంధించిన జిల్లాల్లో మెరుగైన ఫలితాలు రాకపోతే వారి పని తీరు మీద ప్రభావం పడుతుంది. ఒక వేళ ముఖ్యమంత్రి సొంత జిల్లాలో మెరుగైన ఫలితాలు రాకపోతే ఆయన మీద కూడా ప్రభావం పడే అవకాశం ఉంది. నల్లగొండకు చెందిన మంత్రులు కోమటిరెడ్డి వెంకట్ రెడ్డి, ఉత్తమ్ కుమార్ వీరితో పాటు ఖమ్మం జిల్లాకు చెందిన పొంగులేటి స్థానిక సంస్థ ఎన్నికల విషయంలో ఆత్మవిశ్వాసంతో ఉన్నారు. ఆయా జిల్లాలో కాంగ్రెస్ పార్టీ బలంగా ఉండటమే కారణం. రాష్ట్ర వ్యాప్తంగా ప్రభుత్వ పనితీరుకు కూడా ఈ ఎన్నికలు కీలకం కానున్నాయి. ప్రజల్లో ప్రభుత్వం మీద వ్యతిరేకత ఉందన్న నిఘా వర్గాల సమాచారం మేరకే ముఖ్యమంత్రి స్థానిక సంస్థల ఎన్నికల విషయంలో కాస్త వెనక్కి తగ్గినట్టుగా తెలుస్తోంది. కానీ మంత్రులు మాత్రం అందుకు విరుద్ధంగా ఎన్నికలకు సిద్ధంగా ఉన్నామని ప్రకటించడం గమనార్హం.

42 శాతం రిజర్వేషన్ల పరిస్థితి ఏమిటి?

స్థానిక ఎన్నికల నిర్వహణకు మరో కీలక అంశం 42 శాతం రిజర్వేషన్లు. ఇప్పటికే దీనికి సంబంధించిన జీవో జారీకి ప్రభుత్వం కసరత్తు చేస్తోంది. ఇది ఎన్నికల ప్రక్రియను మరింత సంక్లిష్టం చేస్తుంది. రిజర్వేషన్లు పూర్తిస్థాయిలో అమలు చేయకుండా ఎన్నికలు జరిపితే బీసీ వర్గాల నుంచి వ్యతిరేకత వచ్చే అవకాశం ఉంది. ముఖ్యమంత్రి సుప్రీంకోర్టుకు వెళ్లాలని చెప్పడం వెనుక ఈ రిజర్వేషన్ల సమస్య కూడా ఉందని విశ్లేషకులు అంచనా వేస్తున్నారు. మరోవైపు, మంత్రులు రిజర్వేషన్లను త్వరగా పరిష్కరించి ఎన్నికలకు మార్గం సుగమం చేయాలని భావిస్తున్నారు. హైకోర్టు మార్గదర్శకాల ప్రకారం స్థానిక సంస్థల ఎన్నికలు నిర్దేశిత కాలంలోపు జరగాలి. కానీ రిజర్వేషన్లు, ఓటర్ల జాబితా సవరణ వంటి సాంకేతిక సమస్యలు ఆలస్యానికి కారణమవుతాయి. రాజకీయంగా చూస్తే, ఎన్నికలు త్వరగా జరిగితే కాంగ్రెస్‌కు లాభమా, నష్టమా అనేది ప్రజా మనోగతంపై ఆధారపడి ఉంది. గ్రామీణ ప్రాంతాల్లో వ్యతిరేకత ఉన్నప్పుడు ఆలస్యం చేయడం సీఎం వ్యూహాత్మక నిర్ణయమని కొందరు అభిప్రాయపడుతుండగా, మంత్రులు పార్టీ బలోపేతానికి ఎన్నికలు అవసరమని వాదిస్తున్నారు. స్థానిక ఎన్నికల విషయం కాంగ్రెస్‌ పార్టీకి పరీక్షా సమయంగా మారింది. ముఖ్యమంత్రి, మంత్రుల భిన్నాభిప్రాయాలు పరిష్కారం కాని పక్షంలో పార్టీ ఐక్యతపై ప్రభావం చూపవచ్చు. రాబోయే రోజుల్లో ఈ అంశంపై మరిన్ని చర్చలు జరిగే అవకాశం ఉంది.