సంగారెడ్డిలో మధ్యాహ్న భోజన ఘటనపై టీజీహెచ్ఆర్సీ సుమోటో
సంగారెడ్డి జిల్లాలోని వెంకటాపూర్ ప్రాథమిక పాఠశాలలో మధ్యాహ్న భోజనం తిన్న అనంతరం విద్యార్థులు అనారోగ్యానికి గురైన ఘటనపై తెలంగాణ రాష్ట్ర మానవ హక్కుల కమిషన్ (టీజీహెచ్ఆర్సీ) సుమోటోగా స్పందించింది. ఈ ఘటనలో పాడైన ఆహారం కారణంగా 22 మంది విద్యార్థులు అస్వస్థతకు గురయ్యారని సమాచారం. ఈ విషయాన్ని తీవ్రంగా పరిగణించిన కమిషన్, సంఘటనపై పూర్తి వివరాలతో నివేదిక సమర్పించాలని సంగారెడ్డి జిల్లా కలెక్టర్ను ఆదేశించింది. ఫిబ్రవరి 24లోగా నివేదిక అందజేయాలని సూచించింది.
పోలీసుల తెలిపిన సమాచారం ప్రకారం, వెంకటాపూర్ ప్రాథమిక పాఠశాలలో మధ్యాహ్న సమయంలో విద్యార్థులకు సాంబార్, అన్నం వడ్డించారు. భోజనం చేసిన కొద్దిసేపటికే విద్యార్థులకు కడుపునొప్పి, అసౌకర్యం వంటి లక్షణాలు కనిపించడంతో వెంటనే సమీపంలోని ఆసుపత్రికి తరలించారు. చికిత్స పొందుతున్న 22 మంది విద్యార్థుల ఆరోగ్య పరిస్థితి ప్రస్తుతం నిలకడగా ఉందని, త్వరలోనే వారిని డిశ్చార్జ్ చేయనున్నట్లు అధికారులు తెలిపారు.
నారాయణఖేడ్ పోలీస్ స్టేషన్కు చెందిన ఒక అధికారి మాట్లాడుతూ, మధ్యాహ్న భోజనం చేసిన అనంతరం విద్యార్థులకు కడుపునొప్పి వచ్చింది. వెంటనే ఆసుపత్రికి తరలించాం. అందరూ స్థిరంగా ఉన్నారు. తల్లిదండ్రుల నుంచి ఇప్పటివరకు ఎలాంటి ఫిర్యాదులు అందలేదు అని తెలిపారు.
ఇదిలా ఉండగా, ఇదే తరహాలో ఖమ్మం జిల్లాలో మరో ఘటన చోటుచేసుకుంది. కొణిజర్ల మండలం బొడియా తండా ప్రాథమిక పాఠశాలలో మధ్యాహ్న భోజనం తిన్న 14 మంది విద్యార్థులు అనారోగ్యానికి గురయ్యారు. దాల్, అన్నం తిన్న అనంతరం అస్వస్థతకు లోనైన వారిని ఖమ్మం ప్రభుత్వ ఆసుపత్రికి తరలించి చికిత్స అందించారు. ప్రస్తుతం వారి ఆరోగ్య పరిస్థితి కూడా నిలకడగా ఉందని పోలీసులు తెలిపారు. ఈ రెండు ఘటనలు రాష్ట్రంలో మధ్యాహ్న భోజన పథకంలో ఆహార నాణ్యత, భద్రతపై తీవ్ర ఆందోళనకు దారితీశాయి.