సంక్రాంతి నుంచి అన్ని ప్రభుత్వ సేవలు ఆన్లైన్లోనే: సీఎం
పాలనలో వినూత్న మార్పులు తీసుకువచ్చే దిశగా ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు కీలక నిర్ణయం తీసుకున్నారు. వచ్చే సంక్రాంతి నుంచి రాష్ట్రంలో ప్రజలకు అందించే అన్ని ప్రభుత్వ సేవలను పూర్తిగా ఆన్లైన్లోనే అందుబాటులోకి తీసుకురావాలని ఆయన అధికారులను ఆదేశించారు.
మంగళవారం రియల్ టైమ్ గవర్నెన్స్ సిస్టమ్ (ఆర్ టి జి ఎస్ )పై సమీక్ష నిర్వహించిన సందర్భంగా ముఖ్యమంత్రి మాట్లాడుతూ, ఆన్లైన్ సేవలు పారదర్శకతను పెంచుతాయని, తద్వారా ప్రభుత్వ పనితీరుపై ప్రజల సంతృప్తి స్థాయి పెరుగుతుందని స్పష్టం చేశారు. ఇప్పటికీ భౌతికంగా (ఆఫ్లైన్లో) సేవలు అందిస్తున్న శాఖలన్నీ వెంటనే తమ విధానాలను మార్చుకోవాలని ఆయన పిలుపునిచ్చారు.
' మనమిత్ర'తో సులభమైన పాలన
కార్యాలయాల చుట్టూ తిరగాల్సిన అవసరం లేకుండా, అన్ని ప్రభుత్వ సేవలను 'మనమిత్ర వాట్సాప్ గవర్నెన్స్' ద్వారా వర్చువల్గా అందించాలని సీఎం నిర్దేశించారు. ఈ యాప్ గురించి ప్రజల్లో విస్తృత ప్రచారం చేయాలని ఆయన సూచించారు.
కొరియర్ ద్వారా పత్రాలు: రిజిస్ట్రేషన్ ప్రక్రియ పూర్తయిన తర్వాత డాక్యుమెంట్లను కొరియర్ సేవలను ఉపయోగించి నేరుగా లబ్ధిదారుల నివాసాలకు పంపేలా ఏర్పాట్లు చేయాలని అధికారులను ఆదేశించారు. అదేవిధంగా ఆర్టీసీ బస్టాండ్లలో పరిశుభ్రతకు, ముఖ్యంగా టాయిలెట్ల వద్ద శుభ్రతకు ప్రాధాన్యత ఇవ్వాలని, ప్రయాణికులకు మెరుగైన సౌకర్యాలు కల్పించాలని సీఎం ఆదేశించారు.పారిశుధ్య నిర్వహణను మెరుగుపరచడం ద్వారా వ్యాధులు వ్యాప్తి చెందకుండా నివారించవచ్చని తెలిపారు.
డ్రోన్ టెక్నాలజీపై దృష్టి
భవిష్యత్తులో డ్రోన్ల వినియోగం విపరీతంగా పెరుగుతుందని డ్రోన్ సేవలను మరింతగా విస్తృతం చేయడానికి ఒక మాస్టర్ ప్లాన్ను రూపొందించాలని అధికారులను ఆదేశించారు. వ్యవసాయంలో పురుగుమందుల వాడకాన్ని తగ్గించడానికి డ్రోన్లను ఎలా ఉపయోగించాలి ఇతర సాంకేతిక మార్గదర్శకాలపై రైతులకు అవగాహన కల్పించాలని సూచించారు. పారిశుధ్య నిర్వహణను మెరుగుపరచడం ద్వారా వ్యాధులు వ్యాప్తి చెందకుండా నివారించవచ్చని తెలిపారు.
కొన్ని జిల్లాల్లో అధికారులు విజయవంతంగా అమలు చేస్తున్న మంచి కార్యక్రమాలను, విధానాలను గుర్తించి, వాటిని రాష్ట్రంలోని మిగిలిన జిల్లాల్లోనూ అమలు చేయాలని సీఎం ఆదేశించారు.ప్రభుత్వ ప్రధాన కార్యదర్శి విజయానంద్ సహా పలువురు ఉన్నతాధికారులు ఈ సమీక్షా సమావేశంలో పాల్గొన్నారు.
మనమిత్ర వాట్సాప్ గవర్నెన్స్
“మనమిత్ర వాట్సాప్ గవర్నెన్స్” అనేది ఆంధ్రప్రదేశ్ ప్రభుత్వం ప్రజలకు మరింత దగ్గరగా ఉండేందుకు ప్రవేశపెట్టిన నూతన డిజిటల్ సేవా విధానం. ఈ వ్యవస్థ ద్వారా ప్రజలు ప్రభుత్వంతో నేరుగా వాట్సాప్ ద్వారా తమ సమస్యలు, ఫిర్యాదులు, సేవల కోసం అభ్యర్థనలు సులభంగా పంపగలరు. వాట్సాప్ నంబర్కు సందేశం పంపితే, ఆటోమేటెడ్ చాట్బాట్ ద్వారా వివిధ శాఖల సేవలు అందుబాటులోకి వస్తాయి. రేషన్, విద్యుత్, మున్సిపల్ సేవలు, పోలీస్ కంప్లైంట్లు, ఆరోగ్యం, పౌరసేవలు, సంక్షేమ పథకాల వివరాలు వంటి అనేక సేవలను ఈ ప్లాట్ఫారమ్లోనే పొందవచ్చు. ప్రజలు కార్యాలయాలకు వెళ్లాల్సిన అవసరం లేకుండా, తమ ఫిర్యాదుల స్థితిని రియల్టైమ్లో ట్రాక్ చేయగలగడం ఈ విధానానికి ముఖ్య విశేషం. సమయం, డబ్బు ఆదా కావడంతో పాటు అవినీతి, మధ్యవర్తుల జోక్యం తగ్గి సేవల్లో పారదర్శకత పెరుగుతుందనే ఉద్దేశంతో ప్రభుత్వం ఈ సర్వీస్ను రూపొందించింది. మొత్తంగా, మనమిత్ర వాట్సాప్ గవర్నెన్స్ ప్రజలకు వేగవంతమైన, సులభమైన, స్మార్ట్ డిజిటల్ సేవలను అందించడానికి ప్రభుత్వం వేసిన కీలక ముందడుగు.