సంక్రాంతికి మరో 11 ప్రత్యేక రైళ్లు నడపనున్న దక్షిణ మధ్య రైల్వే

సంక్రాంతి పండుగ వేళ సొంత ఊళ్లకు వెళ్లే ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే కీలక నిర్ణయం తీసుకుంది. ప్రయాణికుల సౌకర్యార్థం వివిధ ప్రాంతాల మధ్య మ‌రో 11 ప్రత్యేక రైళ్లను నడపనున్నట్లు రైల్వే శాఖ ఒక ప్రకటనలో వెల్లడించింది.

పండుగ వేళ స్వగ్రామాలకు వెళ్లే ప్రయాణికుల సంఖ్య భారీగా పెరిగే అవకాశముండటంతో, సాధారణ రైళ్లపై భారం తగ్గించేందుకు ఈ ప్రత్యేక రైళ్లను ప్రవేశపెట్టినట్లు అధికారులు పేర్కొన్నారు. ఈ ప్రత్యేక రైళ్లు తెలంగాణ, ఆంధ్రప్రదేశ్‌లోని ఇతర ప్రధాన ప్రాంతాలను అనుసంధానించే మార్గాల్లో నడుస్తాయని తెలిపారు.

జనవరి 8 నుంచి 10వ తేదీ మధ్య కాకినాడ టౌన్, వికారాబాద్, పార్వతీపురం, సికింద్రాబాద్ వంటి కీలక ప్రాంతాల మధ్య ఈ రైళ్లు నడవనున్నాయి. వికారాబాద్‌-పార్వతీపురం, పార్వతీపురం-వికారాబాద్‌, పార్వతీపురం-కాకినాడ టౌన్‌, సికింద్రాబాద్‌-పార్వతీపురం, కాకినాడ టౌన్‌-వికారాబాద్‌ మధ్య ఈ రైళ్లు రాకపోకలు సాగించనున్నాయి.

ఈ ప్రత్యేక రైళ్లలో 1ఏసీ, 2ఏసీ, 3ఏసీ, స్లీపర్, సెకండ్ క్లాస్ కోచ్‌లు అందుబాటులో ఉంటాయని రైల్వే శాఖ తెలిపింది. వీటికి సంబంధించిన బుకింగ్స్ ఇప్పటికే ప్రారంభమయ్యాయి. పండుగ రద్దీ దృష్ట్యా ప్రయాణికులు తక్షణమే టిక్కెట్లు రిజర్వ్ చేసుకోవాలని అధికారులు సూచించారు.