శాంతి పునరుద్ధరణకు భారత్ సంపూర్ణ మద్దతు :మోడీ

ప్రపంచవ్యాప్తంగా అస్థిర పరిస్థితులు నెలకొన్న తరుణంలో భారత ప్రధాని నరేంద్ర మోడీ గురువారం ఇండో-పసిఫిక్, పశ్చిమ ఆసియా, ఉక్రెయిన్ సంఘర్షణలలో శాంతిని పునరుద్ధరించడానికి భారతదేశం సంపూర్ణంగా కట్టుబడి ఉందని పునరుద్ఘాటించారు. గాజా సమస్యతో సహా ప్రతి సంఘర్షణను కేవలం సంభాషణ, దౌత్యం ద్వారా మాత్రమే పరిష్కరించాలని భారత్ బలంగా విశ్వసిస్తోందని ఆయన స్పష్టం చేశారు. ముంబైలో బ్రిటన్ ప్రధానమంత్రి కీర్ స్టార్మర్‌తో జరిగిన ద్వైపాక్షిక చర్చల అనంతరం నిర్వహించిన సంయుక్త విలేకరుల సమావేశంలో ప్రధాని మోడీ ఈ కీలక వ్యాఖ్యలు చేశారు.

భారత్-యూకే సహజ భాగస్వామ్యం

భారత్, యూకే సహజ భాగస్వాములు అని, ప్రజాస్వామ్యం, స్వేచ్ఛ, చట్టపాలన వంటి ఉమ్మడి విలువలపై ఇరు దేశాలకు పరస్పర విశ్వాసం ఉందని ప్రధాని మోడీ పేర్కొన్నారు. ఉక్రెయిన్, గాజా సమస్యలపై శాంతిని పునరుద్ధరించేందుకు సంభాషణ, దౌత్యం ద్వారా జరిగే ప్రతి ప్రయత్నానికి భారతదేశం అండగా ఉంటుందని ఆయన ప్రకటించారు. ముఖ్యంగా ఇండో-పసిఫిక్ ప్రాంతంలో సముద్ర భద్రతా సహకారాన్నిపెంపొందించేందుకు కూడా భారతదేశం సిద్ధంగా ఉందని తెలిపారు.

భారత్-యూకే మరింత బలోపేతం

ప్రస్తుత ప్రపంచ అస్థిరత యుగంలో భారత్-యూకే భాగస్వామ్యం ప్రపంచ స్థిరత్, ఆర్థిక పురోగతికి కీలకమైన ఆధారంగా మారుతోందని ప్రధాని మోడీ వివరించారు. ఈ సందర్భంగా కీలక ఖనిజాలపై సహకారం కోసం ఇండస్ట్రీ గిల్డ్, సప్లై చైన్ అబ్జర్వేటరీని ఏర్పాటు చేయడానికి రెండు దేశాలు అంగీకరించాయని, దీని సాటిలైట్ క్యాంపస్ ఐఎస్‌ఎం ధన్‌బాద్‌లో ఉంటుందని వెల్లడించారు. అలాగే యూకే నుంచి తొమ్మిది విశ్వవిద్యాలయాలు భారతదేశంలో క్యాంపస్‌లను ఏర్పాటు చేయనున్నాయని, సౌతాంప్టన్ విశ్వవిద్యాలయం గురుగ్రామ్ క్యాంపస్‌లో మొదటి బ్యాచ్ విద్యార్థులు చేరడం సంతోషకరమని ఆయన ఆనందం వ్యక్తం చేశారు. బుధవారం జరిగిన బిజినెస్ లీడర్స్ సమ్మిట్‌ను ప్రశంసిస్తూ ఇండియా-యూకే సీఈఓ ఫోరమ్ గ్లోబల్ ఫిన్‌టెక్ ఫెస్టివల్‌లో రెండు దేశాల సహకారం భారత్-యూకే సంబంధాలను మరింత బలోపేతం చేస్తుందని ప్రధాని ఆశాభావం వ్యక్తం చేశారు.

గాజా శాంతి ప్రణాళికపై ప్రపంచ స్పందన

మరోవైపు అమెరికా అధ్యక్షుడు డొనాల్డ్ ట్రంప్ శాంతి ప్రణాళిక యొక్క మొదటి దశ ఒప్పందాన్ని ప్రధాని మోదీ స్వాగతించారు. ఈ పురోగతి ఇజ్రాయెల్ ప్రధానమంత్రి బెంజమిన్ నెతన్యాహు యొక్క బలమైన నాయకత్వాన్ని ప్రతిబింబిస్తుందని ఆయన అన్నారు. బందీల విడుదల గాజా ప్రజలకు మానవతా సహాయం పెంపొందించడం దీర్ఘకాలిక శాంతికి మార్గం సుగమం చేస్తుందని మోడీ ఆశాభావం వ్యక్తం చేశారు.ఖతార్ ప్రధానమంత్రి, విదేశాంగ శాఖ అధికార ప్రతినిధి మాజెద్ అల్ అన్సారీ గురువారం మాట్లాడుతూ గాజా కాల్పుల విరమణ ఒప్పందం యొక్క మొదటి దశకు సంబంధించిన అన్ని నిబంధనలు అమలు విధానాలపై ఒప్పందం కుదిరిందని ప్రకటించారు. ఈ ఒప్పందం ఇజ్రాయెల్ బందీలు, పాలస్తీనా ఖైదీల విడుదల, సహాయం ప్రవేశంతో యుద్ధాన్ని ముగించే లక్ష్యం ఉందన్నారు.

భిన్నాభిప్రాయాలు

ప్రపంచవ్యాప్తంగా ప్రధాన దేశాలు, కూటములు మోడీ ప్రకటనపై గాజా, ఉక్రెయిన్ సమస్యలపై భిన్నమైన అభిప్రాయాలు వ్యక్తం చేశాయి. అమెరికా విదేశాంగ మంత్రి గాజాలో శాంతి ప్రణాళిక పురోగతిని స్వాగతిస్తూ ఇది రెండు-రాజ్యాల పరిష్కారం వైపు పయనించడానికి మొదటి మెట్టు కావాలని ఆకాంక్షించారు. ఉక్రెయిన్‌లో శాంతి స్థాపనకు రష్యాపై మరింత ఒత్తిడి తీసుకురావాలని, దౌత్య మార్గాలను బలోపేతం చేయాలని అమెరికా పట్టుబడుతోంది. యూరోపియన్ యూనియన్ గాజాలో మానవతా సహాయాన్ని తక్షణమే పెంచాలని, అంతర్జాతీయ మానవతా చట్టాలను గౌరవించాలని పదేపదే నొక్కి చెప్పింది. ఉక్రెయిన్ విషయంలో రష్యా దాడులను ఖండిస్తూ ఉక్రెయిన్ సార్వభౌమత్వానికి మద్దతుగా కఠినమైన ఆంక్షలు విధించింది.

ప్రపంచ శాంతికి పిలుపు

చైనా విదేశాంగ శాఖ అధికార ప్రతినిధి గాజా సంక్షోభంపై తక్షణ కాల్పుల విరమణ జరగాలని, శాంతి చర్చలకు వేదిక ఏర్పాటు చేయాలని ప్రపంచ దేశాలకు పిలుపునిచ్చారు. ఉక్రెయిన్ సమస్యను కూడా చర్చల ద్వారా పరిష్కరించాలని, పశ్చిమ దేశాలు ఉద్రిక్తతలను పెంచవద్దని సూచించారు. రష్యా అధ్యక్ష భవనం (క్రెమ్లిన్) ప్రతినిధి ఉక్రెయిన్ సంఘర్షణ తమ జాతీయ భద్రతా ప్రయోజనాల కోసం అని పునరుద్ఘాటించారు. గాజా విషయంలో తక్షణ కాల్పుల విరమణ జరగాలని, పాలస్తీనా సమస్యకు సమగ్ర పరిష్కారం అవసరమని రష్యా మద్దతు తెలిపింది.

ప్రధాని మోడీ ప్రకటన ప్రపంచ వేదికపై భారతదేశ నిష్పాక్షికమైన, శాంతి-కేంద్రీకృత వైఖరిని మరోసారి స్పష్టం చేసింది. బహుళ-రంగాల భాగస్వామ్యాల ద్వారా ఆర్థిక స్థిరత్వాన్ని పెంచుకుంటూనే ప్రపంచ సంఘర్షణలను దౌత్యపరంగా పరిష్కరించడానికి భారత్ కృషి చేస్తుందనే సందేశాన్ని అందించింది.