శర్వానంద్ ‘జార్జ్ క్రిష్’ షురూ.. ఓపెనింగ్ రోజే రిలీజ్ డేట్ ఖరారు
టాలీవుడ్ కథానాయకుడు శర్వానంద్, దర్శకుడు శ్రీను వైట్ల కాంబినేషన్లో తెరకెక్కనున్న కొత్త చిత్రం ‘జార్జ్ క్రిష్’ పూజా కార్యక్రమాలతో శుక్రవారం అట్టహాసంగా ప్రారంభమైంది. ఏకే ఎంటర్టైన్మెంట్స్ బ్యానర్పై రామబ్రహ్మం సుంకర (అనిల్ సుంకర), అజయ్ సుంకర నిర్మిస్తున్న ఈ కుటుంబ కథా చిత్రానికి ‘జార్జ్ క్రిష్’ అనే ఆసక్తికరమైన టైటిల్ను ఖరారు చేశారు.
ఈ ముహూర్తపు వేడుకకు సినీ, రాజకీయ ప్రముఖులు హాజరయ్యారు. తొలి సన్నివేశానికి ప్రముఖ రాజకీయ నాయకుడు, మాజీ మంత్రి తలసాని శ్రీనివాస్ యాదవ్ క్లాప్ కొట్టగా, ప్రముఖ నిర్మాత సురేశ్ బాబు కెమెరా స్విచ్ ఆన్ చేశారు. శ్రీను వైట్ల మార్క్ కామెడీతో పాటు టైమ్ ట్రావెల్ కాన్సెప్ట్ మేళవించి రూపుదిద్దుకుంటున్న ఈ చిత్రానికి అనూప్ రూబెన్స్ సంగీతాన్ని అందిస్తున్నారు. హీరో శర్వానంద్, ఇతర ప్రధాన తారలు తెలుపు రంగు దుస్తులు ధరించి ఉన్న పోస్టర్లు, అవర్గ్లాస్ డిజైన్ ప్రేక్షకులలో విశేష ఆసక్తిని రేకెత్తిస్తున్నాయి.
సినిమా ప్రారంభోత్సవం రోజే విడుదలకు సంబంధించిన డిస్ట్రిబ్యూటర్ల వివరాలను వెల్లడించి చిత్ర యూనిట్ అందరినీ ఆశ్చర్యపరిచింది. ఈ చిత్రాన్ని 2027, జనవరి 14న సంక్రాంతి కానుకగా ప్రపంచవ్యాప్తంగా ఘనంగా విడుదల చేయనున్నట్లు మేకర్స్ అధికారికంగా ప్రకటించారు. ఈ కాంబినేషన్ ఎంతో ఆనందాన్ని ఇస్తోందని దర్శకుడు శ్రీను వైట్ల పేర్కొన్నారు. ప్రస్తుతం శర్వానంద్ నటించిన ‘భోగి’ చిత్రం త్వరలోనే (ఆగస్టు 28న) ప్రేక్షకుల ముందుకు రాబోతుండగా, వెంటనే ఈ కొత్త ప్రాజెక్ట్ ప్రారంభం కావడంతో అభిమానుల్లో ఉత్సాహం నెలకొంది.