శభాష్ రేవంత్… కాంగ్రెస్ అధిష్టానం

తెలంగాణ రాష్ట్రాన్ని వృద్ధి పథంలో అగ్రగామిగా నిలపాలనే పట్టుదలతో ముఖ్యమంత్రి రేవంత్ రెడ్డి తన మంత్రివర్గ సహచరులతో కలిసి ఢిల్లీలో పర్యటించారు. రాష్ట్రంలో పాలనను మరింత వేగవంతం చేయడం, ప్రజా సంక్షేమ పథకాల అమలు తీరును వివరించడం, భవిష్యత్ కార్యాచరణపై జాతీయ నాయకత్వం నుంచి మార్గనిర్దేశం పొందడం ఈ పర్యటన ప్రధాన ఉద్దేశ్యం.

ఈ పర్యటనలో భాగంగా, ముఖ్యమంత్రి రేవంత్ రెడ్డి నేతృత్వంలోని బృందం ఏఐసీసీ అధ్యక్షుడు మల్లికార్జున ఖర్గే, లోక్‌సభ ప్రతిపక్ష నాయకుడు రాహుల్ గాంధీలను మర్యాదపూర్వకలగా కలిశారు. ఈ సమావేశంలో రాష్ట్ర రాజకీయ పరిణామాలు, పాలనాపరమైన విజయాలు, రాబోయే రోజుల్లో చేపట్టబోయే కీలక ప్రాజెక్టుల గురించి ముఖ్యమంత్రి సుదీర్ఘంగా చర్చించారు.

తెలంగాణ రైజింగ్ 2047 విజన్

రాష్ట్ర ప్రభుత్వం ప్రతిష్టాత్మకంగా తీసుకున్న ' తెలంగాణ రైజింగ్ 2047 విజన్ ' విజన్ డాక్యుమెంట్‌ను సీఎం ఈ సందర్భంగా ప్రస్తావించారు. 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా మార్చాలనే లక్ష్యంతో రూపొందించిన వ్యూహాత్మక ప్రణాళికను అధిష్టానానికి వివరించగా, వారు ఈ దార్శనికతను అభినందించారు.

డిసెంబర్ 2023లో అధికారంలోకి వచ్చిన నాటి నుండి అమలు చేస్తున్న ఆరు గ్యారెంటీల పురోగతిని ముఖ్యమంత్రి వివరించారు. ముఖ్యంగా మహిళలకు ఉచిత బస్సు ప్రయాణం, రైతు భరోసా, గృహజ్యోతి వంటి పథకాల ద్వారా ప్రజల్లో ప్రభుత్వంపై ఉన్న సానుకూలతను జాతీయ నేతలకు వివరించారు.

తెలంగాణలో కొనసాగుతున్న 'ఇందిరమ్మ ప్రజా ప్రభుత్వం' అన్ని వర్గాల ప్రజలకు అండగా నిలుస్తోందని రేవంత్ రెడ్డి తెలిపారు. రైతులు, మహిళలు, యువత సాధికారతే లక్ష్యంగా ప్రభుత్వం పని చేస్తోందని, దీనివల్ల క్షేత్రస్థాయిలో కాంగ్రెస్ పార్టీ పట్ల ప్రజల్లో నమ్మకం మరింత బలపడిందని ఆయన పేర్కొన్నారు.

ఇటీవల జరిగిన మున్సిపల్ ఎన్నికల ఫలితాలు, మండల, జిల్లా పరిషత్ ఎన్నికల సన్నద్ధతపై కూడా చర్చలు జరిగాయి. మూసీ పునరుజ్జీవన ప్రాజెక్ట్, స్కిల్ యూనివర్సిటీ ఏర్పాటు, హైదరాబాద్‌ను అంతర్జాతీయ హబ్‌గా మార్చేందుకు చేపట్టిన పనుల గురించి సీఎం ఈ సమావేశంలో వివరించారు.

సామాజిక న్యాయం, సమ్మిళిత అభివృద్ధికి తమ ప్రభుత్వం కట్టుబడి ఉందని సీఎం స్పష్టం చేశారు. బలహీన వర్గాల అభివృద్ధికి తీసుకుంటున్న చర్యలు, విద్య, ఉపాధి రంగాల్లో కల్పిస్తున్న అవకాశాల గురించి జాతీయ నాయకత్వం ప్రశంసలు కురిపించింది.

జాతీయ నాయకత్వంతో జరిగిన ఈ భేటీ రాష్ట్ర ప్రభుత్వానికి కొత్త ఉత్సాహాన్ని ఇచ్చింది. హైకమాండ్ ఇచ్చిన సూచనలు, స్ఫూర్తితో తెలంగాణను ఒక నమూనా రాష్ట్రంగా తీర్చిదిద్దేందుకు ప్రభుత్వం మరింత దృఢ సంకల్పంతో ముందుకు సాగాలని నిర్ణయించుకుంది.