శబరిమల బంగారం కేసు నిందితుడు రాహుల్ ఇంటికి ఎలా చేరాడు?: కేరళం సీఎం

శబరిమల ఆలయంలో బంగారం గల్లంతైన కేసును ఎన్నికల ప్రచారంలో ప్రస్తావిస్తూ వామపక్ష ప్రభుత్వాన్ని విమర్శించిన కాంగ్రెస్ నాయకుడు రాహుల్‌గాంధీ పై కేరళ ముఖ్యమంత్రి పినరయ్‌ విజయన్ తీవ్రంగా స్పందించారు. ఆ కేసులో ప్రధాన నిందితుడు ఎలా రాహుల్ ఇంటికి చేరాడో ఆలోచిస్తే సమాధానం లభిస్తుందని ఆయన ప్రశ్నించారు. శబరిమల బంగారం కేసులో ప్రధాన నిందితుడు ఉన్నికృష్ణన్ పొట్టి కొంతమంది కాంగ్రెస్ నాయకులతో కలిసి సోనియాగాంధీని ఢిల్లీలోని ఆమె నివాసంలో కలిసినట్లు ప్రచారంలో ఉన్న ఒక ఫోటోను ఉద్దేశిస్తూ ముఖ్యమంత్రి వ్యాఖ్యానించారు.

కేరళం అసెంబ్లీ ఎన్నికల ప్రచారంలో భాగంగా పతనం తిట్ట జిల్లాలో జరిగిన సమావేశంలో రాహుల్ గాంధీ శబరిమల బంగారం కేసును ప్రస్తావిస్తూ సీపీఎం నాయకులపై వ్యంగ్యంగా ఒక పాట పాడారు. అయ్యప్ప స్వర్ణం ఎవరు దొంగిలించారు? అనే భావం ఉన్న ఆ పాటను కాంగ్రెస్ నేతృత్వంలోని యూడీఎఫ్ స్థానిక సంస్థల ఎన్నికల సమయంలో కూడా ఉపయోగించింది. రాహుల్ వ్యాఖ్యలకు అక్కడి ప్రజలు హర్షధ్వానాలు చేశారు. రాహుల్ వ్యాఖ్యల అనంతరం సీపీఎం కార్యకర్తలు సోషల్ మీడియాలో ప్రచారం చేస్తూ ఈ కేసుతో సంబంధం ఉందని ఆరోపిస్తూ సోనియా గాంధీపై విమర్శలు చేశారు.

కేరళంలో బీజేపీ–ఎల్‌డీఎఫ్ భాగస్వామ్యం ఉంది.. రాహుల్ ఆరోపణ

కన్నూరులో జరిగిన ఎన్నికల సభలో రాహుల్ గాంధీ మాట్లాడుతూ కేరళంలో సీపీఎం నేతృత్వంలోని ఎల్‌డీఎఫ్, బీజేపీ మధ్య ఒక విధమైన భాగస్వామ్యం ఉందని ఆరోపించారు. ఈ ఎన్నికలు రెండు సిద్ధాంతాల మధ్య పోరాటమని — ఒకటి ఎల్‌డీఎఫ్, మరొకటి కాంగ్రెస్ నేతృత్వంలోని యూడీఎఫ్ — అని ఆయన అన్నారు. కానీ వాస్తవానికి బీజేపీ, ఎల్‌డీఎఫ్ కలిసి పనిచేస్తున్నాయని ఆయన పేర్కొన్నారు. వేదికపై ఉన్న ఇద్దరు మాజీ సీపీఎం నాయకులు వి. కుంహికృష్ణన్, టి.కె. గోవిందన్ ఇప్పుడు యూడీఎఫ్ మద్దతుతో స్వతంత్రులుగా పోటీ చేస్తున్నారని గుర్తుచేస్తూ వారు సీపీఎం తరఫున ప్రచారం చేయకుండా మా వేదికపై ఎందుకు ఉన్నారు? అని రాహుల్ ప్రశ్నించారు. అమెరికాతో కుదిరిన ఒప్పందంపై కూడా రాహుల్ గాంధీ విమర్శలు చేశారు. ఈ ఒప్పందం వల్ల భారత వ్యవసాయం అమెరికాకు తెరుచుకుపోతుందని, చిన్న రైతుల జీవనోపాధి ప్రమాదంలో పడుతుందని అన్నారు. భారతదేశం ఇప్పుడు ఎవరి వద్దనైనా చమురు కొనలేని పరిస్థితి వచ్చిందని, అమెరికా అనుమతి లేకుండా రష్యా, ఇరాన్, ఇరాక్ దేశాల నుంచి చమురు కొనలేమని ఆయన ఆరోపించారు.