వెనిజులా నుంచి అమెరికాకు 3-5 కోట్ల బ్యారెళ్ల చమురు: ట్రంప్

వెనిజులాలో రాజకీయ ఉత్కంఠ కొనసాగుతున్న నేపథ్యంలో అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. వెనిజులాలోని ప్రస్తుత మధ్యంతర ప్రభుత్వం అమెరికాకు 3 కోట్ల నుండి 5 కోట్ల బ్యారెళ్ల అత్యున్నత నాణ్యత కలిగిన ముడిచమురును సరఫరా చేయనున్నట్లు ఆయన వెల్లడించారు. ఈ చమురును ప్రస్తుత అంతర్జాతీయ మార్కెట్ ధరకే కొనుగోలు చేయనున్నట్లు ట్రంప్ తన సోషల్ మీడియా వేదిక ‘ట్రూత్ సోషల్’ ద్వారా స్పష్టం చేశారు.

సైనిక చర్య తర్వాత చమురు ఒప్పందం

వెనిజులా అధ్యక్షుడు నికోలస్ మదురోను పట్టుకోవడానికి అమెరికా సైన్యం ఇటీవల కరాకాస్‌లో ఒక భారీ ఆపరేషన్ నిర్వహించింది. మదురోపై ఉన్న డ్రగ్స్ స్మగ్లింగ్ ఆరోపణల నేపథ్యంలో అతడిని అమెరికాకు తరలించారు. ఈ సైనిక చర్య జరిగిన కొద్ది రోజులకే చమురు సరఫరాపై ప్రకటన రావడం గమనార్హం. ఈ చమురును నేరుగా అమెరికాలోని ఓడరేవులకు తరలించి, దాని ద్వారా వచ్చే డబ్బును ఇరు దేశాల ప్రజల ప్రయోజనాల కోసం ఖర్చు చేస్తామని ట్రంప్ పేర్కొన్నారు.

భారీ ప్రాణ నష్టం.. యుద్ధ నేరమని ఆరోపణ

అమెరికా జరిపిన ఈ మెరుపు దాడిలో భారీ ప్రాణనష్టం జరిగినట్లు వెనిజులా అధికారులు వెల్లడించారు. కనీసం 24 మంది వెనిజులా భద్రతా సిబ్బంది, పదుల సంఖ్యలో పౌరులు మరణించారని ఆ దేశ అటార్నీ జనరల్ తారెక్ విలియం సాబ్ తెలిపారు. ఈ దాడిని ఆయన "యుద్ధ నేరం"గా అభివర్ణించారు. మరణించిన వారి గౌరవార్థం వెనిజులా సైన్యం సామాజిక మాధ్యమాల్లో నివాళులు అర్పించింది.

క్యూబా అధికారుల మృతి

వెనిజులాలో పనిచేస్తున్న క్యూబాకు చెందిన 32 మంది సైనిక, పోలీసు అధికారులు కూడా ఈ దాడిలో మరణించినట్లు క్యూబా ప్రభుత్వం ధృవీకరించింది. వీరంతా వెనిజులా భద్రతా సంస్థలకు సహకరిస్తున్నారని క్యూబా తెలిపింది. మరోవైపు, ఈ ఆపరేషన్‌లో ఏడుగురు అమెరికా సైనికులు కూడా గాయపడ్డారని, వారిలో ఇద్దరు కోలుకుంటున్నారని పెంటగాన్ ప్రకటించింది.

డెల్సీ రోడ్రిగ్జ్ హెచ్చరికలు

వెనిజులా తాత్కాలిక అధ్యక్షురాలు డెల్సీ రోడ్రిగ్జ్‌కు ట్రంప్ గతంలోనే హెచ్చరికలు జారీ చేశారు. అమెరికా ప్రయోజనాలకు అనుగుణంగా వెనిజులాను మార్చకపోతే మదురో కంటే ఘోరమైన పరిస్థితి ఎదుర్కోవాల్సి ఉంటుందని ఆయన అన్నారు. దీనిపై ఆమె స్పందిస్తూ.. తన విధిని దేవుడు నిర్ణయిస్తాడని, ఎవరి బెదిరింపులకు భయపడబోనని తెగేసి చెప్పారు.

అమెరికా చమురు దిగ్గజాలతో భేటీ

వెనిజులా చమురు నిల్వలను అమెరికా కంపెనీలకు అందుబాటులోకి తీసుకురావాలని ట్రంప్ ప్రభుత్వం భావిస్తోంది. దీనిపై చర్చించేందుకు ఎక్సాన్, చెవ్రాన్, కోనోకో ఫిలిప్స్ వంటి దిగ్గజ కంపెనీల ప్రతినిధులతో వైట్ హౌస్‌లో ఒక కీలక సమావేశం నిర్వహించనున్నారు. వెనిజులాలోని అపారమైన చమురు నిల్వలను ఎలా ఉపయోగించుకోవాలనే దానిపై ఈ భేటీలో నిర్ణయం తీసుకోనున్నారు.

డెమొక్రాట్లపై ట్రంప్ అసహనం

మదురో అరెస్ట్ విషయంలో డెమొక్రాట్లు తనకు తగిన గుర్తింపు ఇవ్వడం లేదని ట్రంప్ అసహనం వ్యక్తం చేశారు. గతంలో జో బైడెన్ కూడా మదురోను అరెస్ట్ చేయాలని కోరారని, ఇప్పుడు తాను ఆ పని చేసి చూపిస్తే ప్రశంసించడం లేదని ఆయన విమర్శించారు. మదురోను పట్టుకోవడానికి గత ప్రభుత్వం ప్రకటించిన రివార్డును ట్రంప్ ప్రభుత్వం 50 మిలియన్ డాలర్లకు పెంచిన సంగతి తెలిసిందే.

ప్రస్తుతం అంతర్జాతీయ మార్కెట్‌లో చమురు ధర బారెల్‌కు 56 డాలర్లుగా ఉంది. ఈ లెక్కన వెనిజులా ఇవ్వబోతున్న చమురు విలువ సుమారు 280 కోట్ల డాలర్లు (రూ. 23,000 కోట్లకు పైగా) ఉంటుంది. అమెరికాకు ఒక రోజుకు సగటున 2 కోట్ల బారెళ్ల చమురు అవసరం. వెనిజులా నుండి వచ్చే ఈ నిల్వలు అమెరికాకు సుమారు రెండున్నర రోజుల అవసరాలను తీర్చగలవు. వెనిజులాలో మదురో శకం ముగిసినట్లు కనిపిస్తున్నా, ఆ దేశంలో ఉద్రిక్తతలు మాత్రం ఇంకా కొనసాగుతున్నాయి. చమురు ఒప్పందాలు, ప్రాణనష్టానికి సంబంధించిన విచారణలు ఇరు దేశాల మధ్య ఉన్న సంబంధాలను ఏ మలుపు తిప్పుతాయో వేచి చూడాలి.