వీసా హక్కు కాదు.. అది కేవలం ఒక అనుమతి మాత్రమే: మార్కో రూబియో

అమెరికా వీసా పొందడం అనేది ఎవరికీ దక్కే ప్రాథమిక హక్కు కాదని, అది కేవలం తమ దేశంలోకి రావడానికి ఇచ్చే ఒక అనుమతి (ప్రివిలేజ్) మాత్రమేనని అమెరికా విదేశాంగ మంత్రి మార్కో రూబియో స్పష్టం చేశారు. హంగేరీ పర్యటనలో ఉన్న ఆయన, అక్కడి ప్రధాని విక్టర్ ఓర్బన్‌తో కలిసి ఏర్పాటు చేసిన మీడియా సమావేశంలో వీసా నిబంధనలపై కీలక వ్యాఖ్యలు చేశారు. అమెరికా జాతీయ భద్రతకు, ప్రయోజనాలకు భంగం కలిగించేలా ప్రవర్తించే విదేశీయుల వీసాలను తక్షణమే రద్దు చేస్తామని ఆయన హెచ్చరించారు. గత ఏడాది కాలంగా ఇటువంటి అనేక కేసుల్లో తాము కఠినంగా వ్యవహరించి, వీసాలను రద్దు చేశామని ఆయన గుర్తు చేశారు.

అందరికీ వర్తించే నిబంధనలు

పర్యాటకులు, విద్యార్థులు, జర్నలిస్టులు.. ఎవరైనా సరే అమెరికాలో అడుగుపెట్టిన తర్వాత దేశ వ్యతిరేక కార్యకలాపాలకు పాల్పడితే వారిని ఉపేక్షించేది లేదని రూబియో పేర్కొన్నారు. "వీసా అనేది రాజ్యాంగం కల్పించిన హక్కు కాదు. మీరు పర్యాటకులుగా వచ్చినా, చదువుకోవడానికి వచ్చినా.. అమెరికా ప్రయోజనాలకు విరుద్ధంగా వ్యవహరిస్తే మీ వీసాను వెనక్కి తీసుకుంటాం. ఒకవేళ ఎవరైనా ఇటువంటి పనులకు పాల్పడతారని మాకు ముందే తెలిస్తే, అసలు వీసానే జారీ చేయం" అని ఆయన కుండబద్దలు కొట్టినట్లు చెప్పారు. ఈ నిబంధనలు పారదర్శకంగా అమలు చేస్తామని, ఇందులో ఎవరికీ ప్రత్యేక మినహాయింపులు ఉండవని స్పష్టం చేశారు.

75 దేశాల వలసలపై అమెరికా బ్రేక్

వలసల విషయంలో ఇప్పటికే అమెరికా కఠిన వైఖరి అవలంబిస్తోంది. అమెరికా ప్రజల సంక్షేమ పథకాలను అవాంఛనీయ స్థాయిలో వాడుకుంటున్నారని భావిస్తున్న సుమారు 75 దేశాలకు చెందిన పౌరులకు గతేడాది నుంచి వలస వీసాల జారీని నిలిపివేసింది. ముఖ్యంగా సోమాలియా, హైతీ, ఇరాన్, క్యూబా, ఎరిట్రియా వంటి దేశాల నుంచి వచ్చే వలసదారులు అమెరికాపై ఆర్థిక భారాన్ని మోపుతున్నారని స్టేట్ డిపార్ట్‌మెంట్ పేర్కొంది. అయితే, ప్రభుత్వం తీసుకున్న ఈ నిర్ణయాన్ని సవాలు చేస్తూ పలువురు న్యాయవాదులు, వలసదారుల హక్కుల సంఘాలు న్యూయార్క్‌లోని ఫెడరల్ కోర్టులో దావా వేశాయి. ఈ నేపథ్యంలో రూబియో చేసిన వ్యాఖ్యలు అంతర్జాతీయంగా ప్రాధాన్యత సంతరించుకున్నాయి.