వీసా తనిఖీలు కఠినతరం చేసిన అమెరికా.. ఇంటర్వ్యూలు ఆలస్యం!
అమెరికా ప్రభుత్వం విదేశీయులకు ఇచ్చే వీసాల విషయంలో తనిఖీలను ఇప్పుడు మరింత కఠినం చేసింది. దీనివల్ల వీసా ఇంటర్వ్యూలు దొరకడంలో చాలా ఆలస్యం జరుగుతోంది. ప్రభుత్వం తీసుకున్న ఈ నిర్ణయంతో అమెరికా వెళ్లాలనుకునే సాఫ్ట్వేర్ ఉద్యోగులు, విద్యార్థులు, పరిశోధకులు తీవ్ర ఆందోళన చెందుతున్నారు. గతంలో కంటే ఇప్పుడు దరఖాస్తుదారుల బ్యాక్గ్రౌండ్ చెక్లను మరింత విస్తృతంగా నిర్వహిస్తున్నారు.
ప్రముఖ ఇమ్మిగ్రేషన్ న్యాయవాది అపర్ణా దేవ్ ప్రకారం, ఈ కొత్త నిబంధనల ప్రభావం ఇప్పటికే మొదలైంది. హెచ్-1బి, ఎఫ్-1, జే-1 వంటి రకరకాల వీసాల కోసం దరఖాస్తు చేసుకున్న వారు అనేక ఇబ్బందులు ఎదుర్కొంటున్నారు. అమెరికా రాయబార కార్యాలయాలు దరఖాస్తుదారుల వివరాలను క్షుణ్ణంగా తనిఖీ చేస్తున్నాయి. ఈ ప్రక్రియ వల్ల ఇప్పటికే ఖరారైన ఇంటర్వ్యూలను కూడా అధికారులు చివరి నిమిషంలో వాయిదా వేస్తున్నారు.
మూడో దేశాల్లో స్టాంపింగ్ ఇక కష్టం
ఇప్పటివరకు చాలామంది భారతీయులు మన దేశంలో వీసా స్లాట్లు దొరకకపోతే.. కెనడా, యూఏఈ, మెక్సికో, థాయ్లాండ్, సింగపూర్ వంటి 'మూడో దేశాలకు' వెళ్లి అక్కడ అమెరికా వీసా స్టాంపింగ్ చేయించుకునేవారు. కానీ ఇప్పుడు ఈ పద్ధతికి అమెరికా దాదాపు స్వస్తి పలికింది. ఇప్పుడు దరఖాస్తుదారులు తమ సొంత దేశంలోనే స్టాంపింగ్ చేయించుకోవాల్సి ఉంటుంది. దీనివల్ల అత్యవసరంగా అమెరికా వెళ్లాల్సిన వారికి పెద్ద అడ్డంకి ఏర్పడింది.
సోషల్ మీడియాపై నిఘా
మరో ముఖ్యమైన మార్పు ఏమిటంటే.. ఇప్పుడు మీ సోషల్ మీడియా ఖాతాలపై అమెరికా ప్రభుత్వం నిఘా ఉంచుతుంది. ఫేస్బుక్, ఇన్స్టాగ్రామ్, ఎక్స్ (ట్విట్టర్) వంటి ప్లాట్ఫార్ముల్లో చేసే పోస్టులు, కామెంట్లు, అభిప్రాయాలను అధికారులు పరిశీలిస్తారు. అవసరమైతే మీ ప్రైవేట్ అకౌంట్లను కూడా 'పబ్లిక్' చేయాలని కోరవచ్చు. మీరు ఆన్లైన్లో చేసే యాక్టివిటీ ఆధారంగానే వీసా ఇవ్వాలా వద్దా అనేది నిర్ణయిస్తారు.
ప్రస్తుతం అమెరికా ప్రభుత్వం వీసా తనిఖీలను కఠినతరం చేసిన నేపథ్యంలో, ఇప్పటికే చేతిలో వీసా ఉన్నవారు కూడా విదేశీ ప్రయాణాలు చేసేటప్పుడు జాగ్రత్తగా ఉండాలని నిపుణులు హెచ్చరిస్తున్నారు. ఒకసారి అమెరికా సరిహద్దు దాటి బయటకు వెళ్తే, తిరిగి రావడానికి అవసరమైన అనుమతులు పొందడంలో ఊహించని ఆలస్యం జరగవచ్చు లేదా ఇతర సాంకేతిక సమస్యలు ఎదురుకావచ్చని చెబుతున్నారు. దీనివల్ల ప్రయాణ ప్రణాళికలు తలకిందులై, అమెరికాలోకి మళ్లీ ప్రవేశించడం కష్టంగా మారే ప్రమాదం ఉందని ముందే హెచ్చరిస్తున్నారు. అందుకే అత్యవసరమైతే తప్ప ఈ సమయంలో అంతర్జాతీయ ప్రయాణాలు పెట్టుకోకపోవడమే మంచిదని వారు సూచిస్తున్నారు.