విశాఖ ఉక్కు, నష్టాల నుంచి లాభాల బాటలోకి !
విశాఖ స్టీల్ ప్లాంట్ పురోగతిపై ముఖ్యమంత్రి నారా చంద్రబాబు నాయుడు బుధవారం సచివాలయంలో ఉన్నత స్థాయి సమీక్ష నిర్వహించారు. ఈ సమావేశంలో కేంద్ర స్టీల్ సెక్రటరీ సందీప్ పౌండ్రిక్, వైజాగ్ స్టీల్ ప్లాంట్ సీఎండీ మనీష్ రాజ్ గుప్తా, రాష్ట్ర ప్రభుత్వ ప్రధాన కార్యదర్శి నీరబ్ కుమార్ ప్రసాద్తో పాటు ఇతర కీలక అధికారులు పాల్గొన్నారు.
అనూహ్య ప్రగతి: అంకెల్లో విశాఖ ఉక్కు జోరు
కేంద్ర, రాష్ట్ర ప్రభుత్వాల సమన్వయంతో గత ఏడాదిన్నర కాలంలో విశాఖ ఉక్కు అనూహ్యమైన వృద్ధిని కనబరిచిందని సమీక్షలో వెల్లడించారు. ముఖ్యంగా ఉత్పత్తి సామర్థ్యంలో ప్లాంట్ సరికొత్త రికార్డులను సృష్టించింది.
2024-25 రెండో త్రైమాసికంలో రోజుకు కేవలం 9,215 టన్నులుగా ఉన్న ఉక్కు ఉత్పత్తి, ప్రస్తుతం 19,401 టన్నులకు చేరుకుంది. గతంలో 45 శాతానికే పరిమితమైన ప్లాంట్ కెపాసిటీ యుటిలైజేషన్, ఇప్పుడు రికార్డు స్థాయిలో 94 శాతానికి పెరిగింది. ప్రస్తుతం ప్లాంట్లోని మూడు బ్లాస్ట్ ఫర్నేస్ లు పూర్తిస్థాయిలో పనిచేస్తుండటమే ఈ భారీ ఉత్పత్తికి ప్రధాన కారణమని అధికారులు తెలిపారు.
రూ. 486 కోట్ల నష్టాల నుంచి.. రూ. 54 కోట్ల లాభాల్లోకి!
ఆర్ధికంగా పీకల్లోతు కష్టాల్లో ఉన్న విశాఖ ఉక్కును గట్టెక్కించేందుకు కేంద్రం అందించిన రూ. 11 వేల కోట్ల ప్యాకేజీ అద్భుత ఫలితాలను ఇచ్చిందని, 2024 సెప్టెంబర్ నాటికి రూ.486 కోట్ల నష్టాల్లో ఉన్న ప్లాంట్, 2026 జనవరి నాటికి రూ. 54 కోట్ల నికర లాభాన్ని ఆర్జించిందని, దీనివల్ల మార్కెట్లో సంస్థ యొక్క క్రెడిట్ రేటింగ్ కూడా మెరుగుపడిందని అధికారులు ముఖ్యమంత్రికి వివరించారు.
సింగరేణి తరహా సంస్కరణలు అవసరం: సీఎం చంద్రబాబు
ఈ సందర్భంగా ముఖ్యమంత్రి మాట్లాడుతూ, యాజమాన్యం, కార్మికులు, ప్రభుత్వాలు సమన్వయంతో పనిచేస్తే అసాధ్యమైనది ఏదీ లేదని పేర్కొన్నారు. ఉమ్మడి ఆంధ్రప్రదేశ్లో సింగరేణి సంస్థను సంస్కరణల ద్వారా ఎలా లాభాల్లోకి తెచ్చామో, అదే స్ఫూర్తితో విశాఖ ఉక్కును మరింత బలోపేతం చేయాలని సూచించారు.
"కార్మికుల, ఉద్యోగుల శ్రమశక్తిని సమర్థవంతంగా వినియోగించుకుంటే మరిన్ని మెరుగైన ఫలితాలు వస్తాయి. రాష్ట్ర ప్రభుత్వం తరపున విశాఖ ఉక్కుకు పూర్తి స్థాయి సహకారం అందిస్తాం." అని సీఎం హామీ ఇచ్చారు. చివరగా, ప్లాంట్లోని అన్ని విభాగాల్లో అత్యాధునిక సాంకేతికతను, కొత్త విధానాలను ప్రవేశపెట్టి అంతర్జాతీయ ప్రమాణాలతో పోటీ పడేలా తీర్చిదిద్దాలని అధికారులను చంద్రబాబు ఆదేశించారు.