విరాట్ కోహ్లీ ఐపీఎల్ ప్రాక్టీస్ షురూ
క్రికెట్ అభిమానులు ఎప్పుడెప్పుడా అని ఎదురుచూస్తున్న ఇండియన్ ప్రీమియర్ లీగ్ (ఐపీఎల్) 2026 సీజన్కు తెరలేవబోతోంది. ఈ క్రమంలో టీమిండియా స్టార్ బ్యాటర్, ఆర్సీబీ మాజీ కెప్టెన్ విరాట్ కోహ్లీ తన సన్నాహాలను వేగవంతం చేశారు. నెట్స్లో కోహ్లీ తీవ్రంగా శ్రమిస్తున్న వీడియోలు ప్రస్తుతం సామాజిక మాధ్యమాల్లో వైరల్ అవుతున్నాయి. 37 ఏళ్ల వయసులోనూ అదే ఫిట్నెస్, పట్టుదలతో బ్యాటింగ్ ప్రాక్టీస్ చేస్తున్న తీరు చూసి అభిమానులు మురిసిపోతున్నారు.
రికార్డుల రారాజు.. గత సీజన్లో మెరుపులు
ఐపీఎల్ చరిత్రలోనే అత్యధిక పరుగుల వీరుడిగా కోహ్లీ కొనసాగుతున్నారు. ఇప్పటివరకు 267 మ్యాచ్ల్లో 8,661 పరుగులు సాధించిన ఆయన ఖాతాలో 8 సెంచరీలు, 63 అర్ధసెంచరీలు ఉన్నాయి. ముఖ్యంగా 2025 సీజన్లో కోహ్లీ అద్భుత ఫామ్ను కనబరిచారు. 15 మ్యాచ్ల్లోనే 54.75 సగటుతో 657 పరుగులు చేసి, ఆర్సీబీ తొలిసారి ఐపీఎల్ ట్రోఫీని గెలవడంలో కీలక పాత్ర పోషించారు. గతేడాది 144.71 స్ట్రైక్ రేట్తో ఎనిమిది హాఫ్ సెంచరీలు బాదిన కోహ్లీ, అదే ఊపును ఈసారి కూడా కొనసాగించాలని పట్టుదలగా ఉన్నారు.
మార్చి 28న ప్రారంభం.. చిన్నస్వామి స్టేడియంలో ఫైనల్
అధికారిక బ్రాడ్కాస్టర్ స్టార్ స్పోర్ట్స్ సమాచారం ప్రకారం.. ఐపీఎల్ 2026 సీజన్ మార్చి 28 నుంచి ప్రారంభం కానుంది. అయితే పూర్తిస్థాయి షెడ్యూల్ ఇంకా వెలువడాల్సి ఉంది. మరోవైపు కర్ణాటక రాష్ట్ర క్రికెట్ అసోసియేషన్ కార్యదర్శి సంతోష్ మీనన్ కీలక ప్రకటన చేశారు. బెంగళూరులోని ఎం. చిన్నస్వామి స్టేడియం ఈసారి ఐపీఎల్ ఫైనల్తో పాటు ఒక ప్లే-ఆఫ్ మ్యాచ్కు ఆతిథ్యం ఇవ్వనుంది. అలాగే ఆర్సీబీ ఆడే 7 హోమ్ మ్యాచ్లలో 5 మ్యాచ్లు ఇక్కడే జరగనున్నాయి. మిగిలిన రెండు హోమ్ మ్యాచ్లను ఛత్తీస్గఢ్లోని రాయ్పూర్ స్టేడియంలో నిర్వహించనున్నారు.
విషాదం నుంచి కోలుకుని..
గతేడాది ఐపీఎల్ టైటిల్ వేడుకల సమయంలో చిన్నస్వామి స్టేడియంలో జరిగిన తొక్కిసలాటలో 11 మంది మరణించిన సంగతి తెలిసిందే. ఈ విషాద ఘటన నేపథ్యంలో గతేడాది జూన్ నుంచి ఈ స్టేడియంపై నిషేధం విధించారు. దీనివల్ల మహిళల ప్రపంచకప్, పురుషుల టీ20 ప్రపంచకప్తో పాటు దేశవాళీ టోర్నీలకు ఈ వేదిక దూరమైంది. తాజాగా భద్రతా పరమైన మార్పులు చేపట్టిన తర్వాత, మళ్లీ ఐపీఎల్ మ్యాచ్లకు అనుమతి లభించడం ప్రాధాన్యత సంతరించుకుంది. డిఫెండింగ్ ఛాంపియన్గా బరిలోకి దిగుతున్న ఆర్సీబీ, అహ్మదాబాద్లో జరిగిన గత ఫైనల్లో పంజాబ్ కింగ్స్ను ఓడించి విజేతగా నిలిచింది.