విద్యుదుత్పత్తిలో భారత్‌ సరికొత్త రికార్డు

దేశీయ విద్యుత్ ఉత్పత్తి రంగంలో మునుపెన్నడూ లేని విధంగా భారత్ అద్భుత ప్రగతిని సాధించింది. ప్రస్తుత ఆర్థిక సంవత్సరం (2025-26) ఏప్రిల్ నుంచి జనవరి 31 వరకు కేవలం పది నెలల కాలంలోనే రికార్డు స్థాయిలో 52,537 మెగావాట్ల విద్యుత్ ఉత్పత్తి సామర్థ్యాన్ని కొత్తగా జోడించినట్లు కేంద్ర విద్యుత్ మంత్రిత్వ శాఖ వెల్లడించింది. దేశ మొత్తం విద్యుత్ సామర్థ్యంలో కేవలం పది నెలల్లోనే 11 శాతానికి పైగా వృద్ధి నమోదు కావడం విశేషం. గత ఆర్థిక ఏడాదిలో (2024-25) నమోదైన 34,054 మెగావాట్ల రికార్డును ఈసారి భారీ తేడాతో అధిగమించి, భారత్ తన ఇంధన అవసరాల దిశగా వడివడిగా అడుగులు వేస్తోంది.

పునరుత్పాదక ఇంధనానికే పెద్దపీట

ఈ ఏడాది అదనంగా వచ్చి చేరిన విద్యుత్ సామర్థ్యంలో సుమారు 80 శాతం వాటా పునరుత్పాదక ఇంధన వనరుల నుంచే లభించడం గమనార్హం. మొత్తం 52,537 మెగావాట్లలో 39,657 మెగావాట్లు పర్యావరణహిత వనరుల ద్వారానే సమకూరాయి. ఇందులో సౌర విద్యుత్ (సోలార్) 34,955 మెగావాట్లతో అగ్రస్థానంలో నిలవగా, పవన విద్యుత్ (విండ్) ద్వారా 4,613 మెగావాట్లు లభించాయి. పెరుగుతున్న విద్యుత్ డిమాండ్‌ను తట్టుకోవడంతో పాటు, అంతర్జాతీయ పర్యావరణ ప్రమాణాలకు అనుగుణంగా బొగ్గు ఆధారిత విద్యుత్ నుంచి క్రమంగా హరిత ఇంధనం వైపు భారత్ విజయవంతంగా మళ్లుతోందని ఈ గణాంకాలు స్పష్టం చేస్తున్నాయి.

5.20 లక్షల మెగావాట్లకు చేరిక

జనవరి 31, 2026 నాటికి దేశ మొత్తం స్థాపిత విద్యుత్ సామర్థ్యం 5,20,510.95 మెగావాట్లకు చేరుకుంది. అత్యంత కీలకమైన పరిణామం ఏమిటంటే.. దేశ ఇంధన వనరుల్లో శిలాజరహిత వనరుల వాటా, శిలాజ ఇంధనాల కంటే ఎక్కువగా ఉంది. ప్రస్తుతం శిలాజరహిత వనరుల ద్వారా 2,71,969.33 మెగావాట్లు (దీనిలో పునరుత్పాదక ఇంధనం 2.63 లక్షల మెగావాట్లు, అణు విద్యుత్ 8,780 మెగావాట్లు) అందుతుండగా, శిలాజ ఇంధన ఆధారిత (బొగ్గు, గ్యాస్ తదితర) సామర్థ్యం 2,48,541.62 మెగావాట్లుగా ఉంది. పారిశ్రామిక వృద్ధిని కొనసాగిస్తూనే, పర్యావరణ పరిరక్షణలో భారత్ చూపుతున్న ఈ సమతుల్యత పట్ల నిపుణులు హర్షం వ్యక్తం చేస్తున్నారు.