"వికసిత కేరళ.. వికసిత భారత్: ప్రధాని మోదీ చేతుల మీదుగా అభివృద్ధి పనుల పండుగ"
కేరళ రాష్ట్ర అభివృద్ధిలో నేడు ఒక చారిత్రాత్మక దినం. ప్రధానమంత్రి నరేంద్ర మోదీ తిరువనంతపురం పర్యటనలో భాగంగా రైల్వే, ఆరోగ్యం, శాస్త్ర సాంకేతిక రంగాలకు సంబంధించి వేల కోట్ల రూపాయల విలువైన అభివృద్ధి పనులకు శంకుస్థాపనలు, ప్రారంభోత్సవాలు చేశారు. "వికసిత కేరళ ద్వారానే వికసిత భారత్ సాధ్యమవుతుంది" అని పిలుపునిస్తూ, రాష్ట్ర ప్రగతికి కేంద్ర ప్రభుత్వం పూర్తి అండగా ఉంటుందని ప్రధాని హామీ ఇచ్చారు.
వీధి వ్యాపారుల కోసం '* *పి.ఎం. స్వనిధి’ (* *ప్రధాన మంత్రి వీధి వ్యాపారుల ఆత్మనిర్భర్ నిధి) క్రెడిట్ కార్డ్
ఈ పర్యటనలో అత్యంత కీలకమైన అంశం 'పి.ఎం. స్వనిధి’ క్రెడిట్ కార్డ్ ప్రారంభం. దేశవ్యాప్తంగా ఉన్న వీధి వ్యాపారులు, తోపుడు బండ్ల మీద వ్యాపారం చేసుకునే పేదల ఆర్థికాభివృద్ధి కోసం ఈ పథకాన్ని ప్రధాని ప్రారంభించారు.
గతంలో క్రెడిట్ కార్డులు కేవలం సంపన్నులకే పరిమితమని, నేడు సామాన్య వీధి వ్యాపారి కూడా దీనిని కలిగి ఉండటం సామాజిక మార్పుకు సంకేతమని ప్రధాని పేర్కొన్నారు. ఇది వారికి కేంద్రం కల్పించే ఆర్థిక భరోసా అన్నారు.
కేరళలో సుమారు 10,000 మందికి, తిరువనంతపురంలో 600 మందికి పైగా లబ్ధిదారులకు ఈ కార్డులను పంపిణీ చేశారు. ఈ కార్డు ద్వారా వ్యాపారులకు తక్షణ నగదు లభ్యతతో పాటు డిజిటల్ లావాదేవీల సౌకర్యం కలుగుతుంది.
రైల్వే కనెక్టివిటీలో విప్లవాత్మక మార్పులు
కేరళ రైల్వే రంగాన్ని బలోపేతం చేస్తూ ప్రధాని నాలుగు కొత్త రైలు సర్వీసులను జెండా ఊపి ప్రారంభించారు. ఇందులో మూడు ప్రతిష్టాత్మకమైన అమృత్ భారత్ ఎక్స్ప్రెస్ రైళ్లు ఉన్నాయి.
నాగర్కోయిల్ - మంగళూరు అమృత్ భారత్
తిరువనంతపురం - తాంబరం అమృత్ భారత్
తిరువనంతపురం - చెర్లపల్లి (హైదరాబాద్) అమృత్ భారత్
తృశూర్ - గురువాయూర్ ప్యాసింజర్ రైలు
ఈ రైళ్లు కేరళను పొరుగు రాష్ట్రాలైన తమిళనాడు, కర్ణాటక, తెలంగాణ, ఆంధ్రప్రదేశ్లతో మరింత వేగంగా అనుసంధానిస్తాయి. ముఖ్యంగా చెర్లపల్లి (హైదరాబాద్) రైలు తెలుగు రాష్ట్రాల్లో నివసించే మలయాళీలకు, కేరళ వెళ్లే పర్యాటకులకు ఎంతో ప్రయోజనకరంగా ఉండనుంది.
శాస్త్ర సాంకేతిక, ఆరోగ్య రంగాలు
తిరువనంతపురాన్ని ఒక ప్రధాన స్టార్టప్, పరిశోధనా కేంద్రంగా మార్చడమే లక్ష్యంగా ప్రధాని కీలక పునాదులు వేశారు
కౌన్సిల్ ఆఫ్ సైంటిఫిక్ అండ్ ఇండస్ట్రియల్ రీసెర్చ్ - నేషనల్ ఇన్స్టిట్యూట్ ఫర్ ఇంటర్ డిసిప్లినరీ సైన్స్ అండ్ టెక్నాలజీ ఇన్నోవేషన్ హబ్ ఏర్పాటుకు 'బయో-360 లైఫ్ సైన్సెస్ పార్క్'లో శంకుస్థాపన చేశారు. ఇది ఆయుర్వేదం వంటి సాంప్రదాయ పద్ధతులను ఆధునిక బయోటెక్నాలజీతో అనుసంధానించి, గ్రీన్ హైడ్రోజన్, స్థిరమైన ప్యాకేజింగ్ రంగాలలో పరిశోధనలు చేస్తుంది.
శ్రీ చిత్ర తిరునాల్ ఇన్స్టిట్యూట్ ఫర్ మెడికల్ సైన్సెస్ అండ్ టెక్నాలజీలో అత్యాధునిక రేడియో సర్జరీ కేంద్రాన్ని ఏర్పాటు చేస్తున్నారు. ఇది మెదడు సంబంధిత సంక్లిష్ట వ్యాధులకు అత్యంత ఖచ్చితమైన, తక్కువ కోతతో కూడిన చికిత్సను అందిస్తుంది.
పట్టణ పేదల సంక్షేమం
గత 11 ఏళ్లలో కేంద్ర ప్రభుత్వం పట్టణ మౌలిక సదుపాయాల కోసం చేసిన కృషిని ప్రధాని వివరించారు. 'ప్రధానమంత్రి ఆవాస్ యోజన' కింద దేశవ్యాప్తంగా 4 కోట్ల ఇళ్లు నిర్మించగా, కేరళలోనే దాదాపు 1.25 లక్షల కుటుంబాలకు పక్కా ఇళ్లు అందాయని ఆయన తెలిపారు. అలాగే ‘పీఎమ్ సూర్య ఘర్ ఉచిత విద్యుత్ పథకం' ద్వారా పేదలకు కరెంటు కష్టాలు తప్పుతాయని ధీమా వ్యక్తం చేశారు.
మొత్తంగా కేరళలో పర్యాటక రంగం, వాణిజ్యం, విద్యకు ఈ ప్రాజెక్టులు కొత్త ఊపిరి పోస్తాయని ప్రధాని ఆశాభావం వ్యక్తం చేశారు. ఈ కార్యక్రమంలో కేరళ గవర్నర్ రాజేంద్ర అర్లేకర్, ముఖ్యమంత్రి పినరయి విజయన్, కేంద్ర మంత్రులు, ఇతర రాష్ట్ర ప్రముఖులు పాల్గొన్నారు. ప్రధాని పర్యటనతో కేరళలో అభివృద్ధి పనులు కొత్త వేగాన్ని పుంజుకున్నాయి.