వాయనాడ్ ‘విపత్తు’ వీరనారి లెఫ్టినెంట్ కల్నల్ షెల్కేకు ‘సుభాష్ చంద్రబోస్ ఆపద ప్రబంధన్’ పురస్కారం

కేరళలోని వాయనాడ్ జిల్లాను కుదిపేసిన భారీ కొండచరియల విపత్తు సమయంలో ప్రాణాలకు తెగించి పోరాడిన భారత సైన్యానికి చెందిన లెఫ్టినెంట్ కల్నల్ సీతా అశోక్ షెల్కేకు కేంద్ర ప్రభుత్వం సమున్నత గౌరవాన్ని ప్రకటించింది. 2026 సంవత్సరానికి గాను వ్యక్తిగత విభాగంలో ప్రతిష్టాత్మకమైన 'సుభాష్ చంద్రబోస్ ఆపద ప్రబంధన్ పురస్కార్' ఆమెను వరించింది. నేతాజీ సుభాష్ చంద్రబోస్ జయంతిని పురస్కరించుకుని ఈ అవార్డును ప్రభుత్వం అధికారికంగా ప్రకటించింది.

సాహసానికి నిలువుటద్దం షెల్కే:

2024లో వాయనాడ్‌లో సంభవించిన ప్రకృతి ప్రకోపం సమయంలో లెఫ్టినెంట్ కల్నల్ షెల్కే ప్రదర్శించిన తెగువ అసామాన్యం. విపరీతమైన వర్షాలు, బురదతో నిండిన ప్రమాదకర పరిస్థితుల్లో ఆమె రెస్క్యూ ఆపరేషన్లను ముందుండి నడిపించారు. ముఖ్యంగా చూరల్మల ప్రాంతంలో బాహ్య ప్రపంచంతో సంబంధాలు తెగిపోయిన వేళ, కేవలం నాలుగు గంటల వ్యవధిలో 190 అడుగుల ‘బైలీ వంతెన'ను నిర్మించి రికార్డు సృష్టించారు.

వినూత్న ఆలోచనతో విజయం:

వంతెన నిర్మాణ సమయంలో ఎదురైన ఇంజనీరింగ్ సవాళ్లను అధిగమించడానికి ఆమె 'కొమాట్సు PC210' ఎక్స్‌కవేటర్‌ను కౌంటర్ వెయిట్‌గా ఉపయోగించారు. ఈ వినూత్న ఆలోచన వల్ల వంతెన నిర్మాణం వేగంగా పూర్తయి, మారుమూల గ్రామాలకు సహాయక సామగ్రి చేరడానికి మార్గం సుగమమైంది. ఆమె పర్యవేక్షణలో సుమారు 150 టన్నుల భారీ పరికరాలను తరలించి, వందలాది మంది బాధితులను సురక్షిత ప్రాంతాలకు తరలించారు.

సంస్థాగత విభాగంలో సిక్కింకు అవార్డు:

ఇదే అవార్డు సంస్థాగత విభాగంలో సిక్కిం రాష్ట్ర విపత్తు నిర్వహణ సంస్థకు లభించింది. 2005 నుండి సిక్కిం ప్రభుత్వం 'ఆపద మిత్ర' పేరుతో 1,185 మందికి శిక్షణ ఇచ్చి, విపత్తుల సమయంలో ప్రాణనష్టాన్ని తగ్గించడంలో అద్భుత ఫలితాలు సాధించింది. 2023 తీస్తా వరదల సమయంలో వీరు 2,500 మందికి పైగా బాధితులను రక్షించడంలో కీలక పాత్ర పోషించారు.

విపత్తు నిర్వహణలో నిరుపమాన సేవలు అందించే వారిని గుర్తించేందుకు ఈ అవార్డును కేంద్రం నెలకొల్పింది. "లెఫ్టినెంట్ కల్నల్ షెల్కే ప్రదర్శించిన నాయకత్వ లక్షణాలు, ఆపదలో ఉన్న పౌరుల పట్ల ఆమె చూపిన నిబద్ధత దేశంలోని మహిళా అధికారులకు స్పూర్తిదాయకం" అని కేంద్ర హోం మంత్రిత్వ శాఖ కొనియాడింది.