వర్షం కారణంగా కోల్కతా, పంజాబ్ మ్యాచ్ రద్దు
ఐపీఎల్ 2026లో భాగంగా సోమవారం కోల్కతాలోని ఈడెన్ గార్డెన్స్ వేదికగా కోల్కతా నైట్ రైడర్స్, పంజాబ్ కింగ్స్ మధ్య జరగాల్సిన మ్యాచ్ వర్షం కారణంగా రద్దయ్యింది. ఎడతెరిపి లేకుండా కురిసిన వర్షం, తడిసిన మైదానం కారణంగా అంపైర్లు మ్యాచ్ను అర్ధాంతరంగా నిలిపివేస్తూ నిర్ణయం తీసుకున్నారు. దీంతో ఇరు జట్లకు చెరో పాయింట్ లభించింది. వరుసగా రెండు ఓటములతో డీలా పడ్డ కేకేఆర్కు ఈ పాయింట్ ద్వారా కాస్త ఊరట లభించినట్లయింది.
తడబడిన కోల్కతా బ్యాటర్లు
టాస్ గెలిచిన కోల్కతా కెప్టెన్ అజింక్య రహానే మొదట బ్యాటింగ్ ఎంచుకున్నాడు. అయితే స్వల్ప వ్యవధిలోనే నైట్ రైడర్స్కు గట్టి షాక్లు తగిలాయి. పంజాబ్ పేసర్ జేవియర్ బార్ట్లెట్ నిప్పులు చెరిగే బంతులతో విరుచుకుపడటంతో రెండో ఓవర్లోనే కేకేఆర్ కీలక వికెట్లు కోల్పోయింది. ఓపెనర్ ఫిన్ అలెన్ (6), కెమెరూన్ గ్రీన్ (4) వెంటవెంటనే పెవిలియన్ చేరడంతో కోల్కతా 16 పరుగులకే రెండు వికెట్లు కోల్పోయి కష్టాల్లో పడింది.
ముంచెత్తిన వాన.. ఆట నిలిపివేత
కష్టాల్లో ఉన్న జట్టును ఆదుకునేందుకు కెప్టెన్ రహానే (8 నాటౌట్), వికెట్ కీపర్ బ్యాటర్ అంగ్క్రిష్ రఘువంశీ (7 నాటౌట్) క్రీజులో పోరాడుతున్న సమయంలో వాన మొదలైంది. కేకేఆర్ స్కోరు 3.4 ఓవర్లలో 2 వికెట్ల నష్టానికి 25 పరుగులు ఉన్నప్పుడు మ్యాచ్ నిలిచిపోయింది. మైదానాన్ని సిద్ధం చేసేందుకు సిబ్బంది ప్రయత్నించినప్పటికీ, వర్షం ఏమాత్రం తగ్గకపోవడంతో చివరకు మ్యాచ్ను రద్దు చేస్తున్నట్లు అధికారులు ప్రకటించారు.
గురువారం మ్యాచ్పైనా నీలినీడలు
కేకేఆర్ తన తదుపరి మ్యాచ్ను ఇదే మైదానంలో లక్నో సూపర్ జెయింట్స్తో గురువారం ఆడాల్సి ఉంది. అయితే ఆ రోజు కూడా వర్షం కురిసే అవకాశం ఉందని వాతావరణ శాఖ హెచ్చరించడం అభిమానులను ఆందోళనకు గురిచేస్తోంది. గత ఏడాది ఐపీఎల్లో కూడా కేకేఆర్-పంజాబ్ మ్యాచ్ వర్షం కారణంగానే రద్దు కావడం గమనార్హం. దాదాపు 29,358 మంది ప్రేక్షకులు ఈ పోరును చూసేందుకు వచ్చినప్పటికీ, ఆట సాగకపోవడంతో నిరాశతో వెనుదిరిగారు.