వందేమాతరం సర్క్యులర్పై పిటిషన్.. సుప్రీం తిరస్కారం
భారత ఉన్నత న్యాయస్థానమైన సుప్రీం కోర్టు కీలక అంశాలపై బుధవారం రెండు ముఖ్య నిర్ణయాలు వెలువరించింది. వందేమాతరం సర్క్యులర్పై దాఖలైన పిటిషన్ను తిరస్కరించడంతో పాటు, గురుగ్రామ్ బాలిక లైంగిక దాడి కేసులో నిర్లక్ష్యంపై అధికారులకు నోటీసులు జారీ చేసింది.
వందే మాతరం సర్క్యులర్పై పిటిషన్ తిరస్కారం
ప్రధాన న్యాయమూర్తి సూర్యకాంత్ నేతృత్వంలోని బెంచ్ (న్యాయమూర్తులు జోయ్మాల్య బాగ్చి, విపుల్ ఎం.పంచోలి) కేంద్ర హోంమంత్రిత్వ శాఖ జారీ చేసిన వందే మాతరం మార్గదర్శకాలపై దాఖలైన పిటిషన్ను విచారణకు స్వీకరించలేదు. పిటిషన్ ముందస్తుగా (ప్రీమెచ్యూర్) దాఖలైందని పేర్కొన్న కోర్టు, ఈ సర్క్యులర్ వల్ల ఎలాంటి శిక్షార్హ పరిణామాలు ఉన్నాయో స్పష్టత లేదని అభిప్రాయపడింది. సర్క్యులర్ను పాటించకపోతే ఎవరినైనా శిక్షిస్తున్నారా? మీ పిటిషన్ ఊహాగానాలపై ఆధారపడింది. శిక్షలు ఉంటే అప్పుడే కోర్టును ఆశ్రయించవచ్చు అని వ్యాఖ్యానించింది. హోం మంత్రిత్వ శాఖ జనవరి 28న జారీ చేసిన మార్గదర్శకాల ప్రకారం, అధికారిక కార్యక్రమాల్లో జాతీయ గీతంతో పాటు వందే మాతరం ప్రదర్శించినప్పుడు, పూర్తి ఆరు చరణాలు ముందుగా ఆలపించాలని సూచించింది.
వివాదం ఎందుకు?
చాలామంది వందేమాతరం తొలి రెండు చరణాలనే ఆలపించడం సరైందని భావిస్తున్నారు. 1950లో రాజ్యాంగ సభ కూడా అదే రెండు చరణాలను జాతీయ గీతంగా స్వీకరించింది. ఈ నేపథ్యంలో ఆల్ ఇండియా ముస్లిం పర్సనల్ లా బోర్డు ఈ నిర్ణయాన్ని వెనక్కి తీసుకోవాలని డిమాండ్ చేసింది. బోర్డు ప్రధాన కార్యదర్శి మౌలానా మహ్మద్ ఫజ్లుర్ రహీమ్ ముజద్దిది ఈ నిర్ణయం రాజ్యాంగ విరుద్ధమని, మత స్వేచ్ఛకు వ్యతిరేకమని విమర్శించారు. అలాగే జమియాత్ ఉలేమా హింద్ అధ్యక్షుడు మౌలానా అర్షద్ మదనీ కూడా కేంద్ర నిర్ణయాన్ని తీవ్రంగా తప్పుబట్టారు. ఇది మత స్వేచ్ఛపై ప్రత్యక్ష దాడి అని అన్నారు. మొత్తానికి, ప్రస్తుతం ఈ సర్క్యులర్పై ఎలాంటి శిక్షా చర్యలు లేవని, కేవలం మార్గదర్శకాల స్థాయిలో మాత్రమే ఉన్నందున పిటిషన్ను సుప్రీంకోర్టు తిరస్కరించింది.