వంట గ్యాస్ కొరతపై ప్రజల్లో భయాందోళనలు: ప్రభుత్వ స్పష్టత అవసరమన్న వీహెచ్

దేశంలో వంట గ్యాస్ కొరత ఉందనే వార్తలతో సామాన్య ప్రజలు తీవ్ర భయాందోళనలకు గురవుతున్నారని, దీనిని నివారించడానికి ప్రభుత్వం తక్షణమే చర్యలు చేపట్టాలని కాంగ్రెస్ సీనియర్ నాయకుడు వి. హనుమంతరావు శనివారం డిమాండ్ చేశారు. పశ్చిమాసియా యుద్ధ ప్రభావం వల్ల ఇంధన సరఫరా నిలిచిపోతుందనే ప్రచారంతో హోటళ్లు మూతపడుతున్నాయని, బ్లాక్ మార్కెట్ పెరిగే ప్రమాదం ఉందని ఆయన ఆందోళన వ్యక్తం చేశారు.

ఈ సంద‌ర్భంగా హనుమంతరావు మాట్లాడుతూ, వంట గ్యాస్ నిల్వలు సరిపడా ఉన్నాయని ప్రభుత్వం చెబుతున్నప్పటికీ, ఆ సమాచారం క్షేత్రస్థాయిలోకి వెళ్లడం లేదని అన్నారు. ఈ సమస్యకు ప్రభుత్వం ప్రాథమిక సమాచారాన్ని అందించడం అత్యవసరం. యుద్ధ పరిస్థితులు దేశంలోని పెట్రోల్, డీజిల్ ధరలపై ప్రభావం చూపుతున్నాయి. పూర్వం కాలంలో బొగ్గు, కట్టెలు వాడేవారు, కానీ ఇప్పుడు పెద్ద ఎత్తున ప్రతి ఒక్కరూ గ్యాస్‌పైనే ఆధారపడుతున్నారు. కొరత ఉందని అనుకోవడంతో ప్రజల్లో భయం కలుగుతోందన్నారు. ప్రజల్లో ఉన్న భయాన్ని పోగొట్టడానికి ప్రభుత్వం విస్తృతమైన ప్రచారం నిర్వహించాలి. అప్పుడే కృత్రిమ కొరత సృష్టించే వారిని అడ్డుకోగలం అని ఆయన పేర్కొన్నారు.

మరోవైపు, బీజేపీ నాయకుడు దిలీప్ ఘోష్ మాట్లాడుతూ.. ప్రధాని మోదీ నాయకత్వంలో దేశం సురక్షితంగా ఉందని, అనవసరంగా ప్రజలను భయపెట్టే ప్రయత్నం చేస్తున్నారని విమర్శించారు. గ్యాస్ కొరత లేదని, ప్రజలు ఆందోళన చెందాల్సిన అవసరం లేదని ఆయన భరోసా ఇచ్చారు.

పెట్రోలియం, సహజ వాయువు మంత్రిత్వ శాఖ సంయుక్త కార్యదర్శి సుజాతా శర్మ కూడా దీనిపై స్పష్టత ఇచ్చారు. మార్చి 5తో పోలిస్తే దేశీయ రిఫైనరీల్లో ఎల్‌పీజీ ఉత్పత్తిని 30 శాతం పెంచినట్లు ఆమె వెల్లడించారు. గృహ అవసరాలకు, ఆసుపత్రులు, విద్యా సంస్థలకు గ్యాస్ సరఫరాలో ఎలాంటి ఆటంకం లేదని స్పష్టం చేశారు. వాణిజ్య సిలిండర్ల పంపిణీ బాధ్యతను రాష్ట్ర ప్రభుత్వాలకు అప్పగించామని, ప్రాధాన్యత క్రమంలో వినియోగదారులకు అందేలా చూడాలని కోరారు. పశ్చిమాసియా ఉద్రిక్తతల వల్ల పెట్రోల్, డీజిల్ లభ్యత తగినంతగా ఉన్నప్పటికీ, ఎల్పీజీ పరిస్థితిని ప్రభుత్వం నిరంతరం సమీక్షిస్తోందని ఆమె తెలిపారు. గందరగోళానికి గురికాకుండా ఉండాలని అధికారులు ప్రజలకు విజ్ఞప్తి చేశారు.