లెబనాన్తో చర్చలకు మేం సిద్ధం: ఇజ్రాయెల్
లెబనాన్తో నేరుగా మాట్లాడేందుకు ఇజ్రాయెల్ ఒప్పుకుంది. ఈ చర్చలను ఎంత తొందరగా వీలైతే అంత తొందరగా మొదలుపెట్టాలని ఇజ్రాయెల్ ప్రధాని నెతన్యాహు అధికారులను ఆదేశించారు. లెబనాన్ పదేపదే కోరడం వల్లే తాము ఈ నిర్ణయం తీసుకున్నామని ఆయన తెలిపారు. ముఖ్యంగా హిజ్బుల్లా నిరాయుధీకరణ, సరిహద్దు దేశాల మధ్య శాంతి స్థాపనే ప్రధాన అజెండాగా ఈ చర్చలు సాగుతాయని స్పష్టం చేశారు. బీరూట్ను సైనిక రహిత ప్రాంతంగా మార్చాలన్న లెబనాన్ ప్రధాని ప్రతిపాదనను ఆయన స్వాగతించడం గమనార్హం.
బీరూట్లో మరణ మృదంగం
ఒకవైపు చర్చల ప్రక్రియకు మొగ్గు చూపుతూనే, మరోవైపు ఇజ్రాయెల్ తన ప్రతాపాన్ని చూపిస్తోంది. బుధవారం బీరూట్పై ఇజ్రాయెల్ జరిపిన వైమానిక దాడులు యుద్ధం మొదలైనప్పటి నుంచి అత్యంత భీకరమైనవిగా నమోదయ్యాయి. ఈ దాడుల్లో 203 మంది ప్రాణాలు కోల్పోగా, వెయ్యి మందికి పైగా గాయపడ్డారని లెబనాన్ ఆరోగ్య శాఖ వెల్లడించింది. హిజ్బుల్లా అగ్రనేత నయీమ్ కస్సేం ప్రధాన అనుచరుడు అలీ యూసుఫ్ హర్షీని హతమార్చినట్లు ఇజ్రాయెల్ ప్రకటించింది. కాల్పుల విరమణ ఒప్పందం ఇరాన్తో మాత్రమేనని, హిజ్బుల్లాపై తమ వేట ఆగదని నెతన్యాహు కుండబద్దలు కొట్టారు.
హోర్ముజ్ జలసంధిలో 'మైన్ల' భయం
ప్రపంచ చమురు రవాణాకు ఆయువుపట్టైన హోర్ముజ్ జలసంధిలో ఇరాన్ పారామిలటరీ దళాలు సముద్రపు మైన్లను అమర్చినట్లు వెలువడుతున్న వార్తలు అంతర్జాతీయంగా కలకలం రేపుతున్నాయి. ఇరాన్ వార్తా సంస్థలు విడుదల చేసిన మ్యాప్లో ఈ జలమార్గం గుండా ప్రయాణించే ఓడలకు "ప్రమాదకర ప్రాంతం" అని ఫార్సీ భాషలో హెచ్చరికలు జారీ చేశారు. దీంతో దశాబ్దాలుగా స్వేచ్ఛాయుత రవాణాకు నిలయమైన ఈ అంతర్జాతీయ జలదారి ఇప్పుడు ఇరాన్ గుప్పిట్లోకి వెళ్లే ప్రమాదం కనిపిస్తోంది. యుద్ధం ప్రారంభమైనప్పటి నుంచి ఇక్కడ రాకపోకలు నామమాత్రంగానే సాగుతున్నాయి.
ఆకాశాన్నంటుతున్న చమురు ధరలు
జలసంధి మూసివేత భయాలతో అంతర్జాతీయ మార్కెట్లో చమురు ధరలు మళ్లీ భగ్గుమన్నాయి. బ్రెంట్ క్రూడ్ ధర ఏకంగా 35 శాతం పెరిగి బ్యారెల్కు 98 డాలర్లకు చేరింది. ప్రస్తుతం చమురుతో నిండిన సుమారు 230 ఓడలు జలసంధి దాటేందుకు వేచి చూస్తున్నాయని యూఏఈ చమురు సంస్థ ఆందోళన వ్యక్తం చేసింది. షరతులు లేకుండా నౌకలను అనుమతించాలని కోరుతుండగా.. అమెరికా తన దురాక్రమణ ఆపితేనే అంతర్జాతీయ నిబంధనల ప్రకారం నౌకలను వదులుతామని ఇరాన్ ఉప విదేశాంగ మంత్రి సయీద్ ఖతిబ్జాదే మెలిక పెట్టారు.
యురేనియం నిల్వలపై వీడని పీటముడి
మరోవైపు ఇరాన్ వద్ద ఉన్న సుసంపన్నమైన యురేనియం నిల్వల భవితవ్యంపై ఉత్కంఠ నెలకొంది. ఇరాన్ ఎప్పటికీ అణ్వాయుధాలను తయారు చేయకూడదని, ఆ నిల్వలను పూర్తిగా తొలగించాలని అమెరికా పట్టుబడుతోంది. అయితే యురేనియం సుసంపన్నం చేసుకునే హక్కు తమకు ఉందని ఇరాన్ అణు సంస్థ అధిపతి మహమ్మద్ ఇస్లామీ స్పష్టం చేశారు. ఒకవేళ ఇరాన్ ఒప్పందాన్ని ఉల్లంఘిస్తే మునుపటి కంటే తీవ్రంగా దాడి చేస్తామని అమెరికా అధ్యక్షుడు డొనాల్డ్ ట్రంప్ తీవ్రస్థాయిలో హెచ్చరించారు.
ఒప్పందం రద్దయ్యే ఛాన్స్!
న్యూయార్క్కు చెందిన 'సౌఫాన్ సెంటర్' అనే సంస్థ చెబుతున్న దాని ప్రకారం, ఇరాన్-ఇజ్రాయెల్ మధ్య కుదిరిన శాంతి ఒప్పందం మళ్లీ మొదటికే వచ్చేలా ఉంది. ఒకవైపు శాంతి మాటలు వినిపిస్తున్నా, మరోవైపు ఇజ్రాయెల్ భారీ దాడులు చేస్తుండటంతో గొడవలు ఇంకా ఎక్కువవుతాయని నిపుణులు హెచ్చరిస్తున్నారు. ఇరాన్కు, దాని మద్దతుదారులకు మధ్య గొడవలు పెట్టడానికే ఇజ్రాయెల్ ఇలా చేస్తోందని తెలుస్తోంది. తాజాగా దక్షిణ లెబనాన్లో జరిగిన దాడిలో ఏడుగురు చనిపోవడంతో, అక్కడ పరిస్థితులు మళ్లీ యుద్ధం మొదలవ్వకముందు ఉన్నంత భయంకరంగా మారాయి.
కదలని అమెరికా బలగాలు
పరిస్థితి చక్కబడే వరకు తమ యుద్ధనౌకలు, సైనిక బలగాలు ఇరాన్ సరిహద్దుల సమీపంలోనే ఉంటాయని అమెరికా స్పష్టం చేసింది. కుదిరిన ఒప్పందం అక్షరాలా అమలు కావాల్సిందేనని ట్రంప్ తెగేసి చెప్పారు. కాల్పుల విరమణ తర్వాత ఇరాన్ నుంచి నేరుగా దాడులు ఆగిపోయినప్పటికీ, లెబనాన్ వేదికగా సాగుతున్న హింస మాత్రం ఆగడం లేదు. అటు ఇరాన్, ఇటు ఇజ్రాయెల్ రెండు దేశాలు తామే విజయం సాధించామని ప్రకటించుకుంటున్నప్పటికీ, సామాన్య ప్రజలు మాత్రం యుద్ధ భయంతో వణికిపోతున్నారు.