లడ్డూ కల్తీ వాస్తవాలను గోప్యంగా ఉంచితే అది అపరాధమే అవుతుంది: సీఎం

తిరుమల శ్రీవారి లడ్డూ ప్రసాదం కల్తీ వ్యవహారంపై నిజాలను బహిర్గతం చేయడం తన ప్రభుత్వ బాధ్యత అని ఆంధ్రప్రదేశ్ ముఖ్యమంత్రి నారా చంద్రబాబు నాయుడు పునరుద్ఘాటించారు. శుక్రవారం శాసనసభలో ఈ అంశంపై జరిగిన చర్చలో ఆయన మాట్లాడుతూ.. ఇంతటి సున్నితమైన విషయాన్ని దాచిపెట్టడం భక్తులకు చేసే ద్రోహం మాత్రమే కాదు, అది ఒక పెద్ద 'అపరాధం' అవుతుందని పేర్కొన్నారు.

వాస్తవాలను దాచలేం

గత వైఎస్ జగన్ మోహన్ రెడ్డి ప్రభుత్వ హయాంలో తిరుపతి లడ్డూ తయారీలో జంతువుల కొవ్వును వినియోగించారనే అంశంపై ముఖ్యమంత్రి తీవ్రంగా స్పందించారు. కల్తీ జరిగినట్లు ఆధారాలు ఉన్నప్పుడు దానిని ప్రజలకు చెప్పకపోతే భవిష్యత్తులో వచ్చే పరిణామాలకు ఈ ప్రభుత్వమే బాధ్యత వహించాల్సి ఉంటుంది. రేపు ఎవరైనా మమ్మల్ని ప్రశ్నిస్తే ఏం సమాధానం చెప్పాలి? అందుకే పవిత్రమైన లడ్డూ ప్రసాదం విషయంలో జరిగిన అపచారాన్ని ధైర్యంగా బయటపెట్టాం" అని సీఎం పేర్కొన్నారు.

పవిత్రతకు భంగం కలిగించారు

సెప్టెంబర్ 2024లో ఎన్డీయే శాసనసభా పక్ష సమావేశంలో ముఖ్యమంత్రి తొలిసారిగా ఈ ఆరోపణలు చేసిన సంగతి తెలిసిందే. గత పాలకులు పవిత్ర వేంకటేశ్వరాలయాన్ని కూడా వదిలిపెట్టలేదని నాణ్యత లేని పదార్థాలతో భక్తుల మనోభావాలను దెబ్బతీశారని ఆయన మండిపడ్డారు. ఈ వ్యవహారం దేశవ్యాప్తంగా పెను సంచలనం సృష్టించడమే కాకుండా హిందూ సమాజంలో పెద్ద ఎత్తున ఆగ్రహావేశాలకు దారితీసింది.

దేవాలయాల ప్రక్షాళన పూర్తి

రాష్ట్రంలోని అన్ని దేవాలయాల పవిత్రతను కాపాడే బాధ్యతను తమ ప్రభుత్వం తీసుకుందని చంద్రబాబు సభకు తెలియజేశారు. ప్రస్తుతం రాష్ట్రంలో అన్ని ఆలయాలను శుద్ధి చేశాం. భక్తులు ఎటువంటి ఆందోళన చెందాల్సిన అవసరం లేదు. ప్రతి ఆలయం ఆధ్యాత్మిక వైభవాన్ని, పవిత్రతను కాపాడతామని నేను ప్రజలకు హామీ ఇస్తున్నాను అని ఆయన ప్రకటించారు. అదేవిధంగా కాగా ఎవరి మనోభావాలను దెబ్బతీయాలనే ఉద్దేశ్యం ప్రభుత్వానికి లేదని కేవలం ధర్మాన్ని రక్షించాలనే సంకల్పంతోనే ఈ నిజాలను వెల్లడించినట్లు ముఖ్యమంత్రి స్పష్టం చేశారు.