'రోడ్డు భద్రతా ప్రతిజ్ఞ' వెబ్సైట్ను ప్రారంభించిన మంత్రి పొన్నం ప్రభాకర్
తెలంగాణ రాష్ట్రంలో రోడ్డు ప్రమాదాలను అరికట్టి, ప్రాణనష్టాన్ని తగ్గించే లక్ష్యంతో రవాణా శాఖ ఒక వినూత్న కార్యక్రమానికి శ్రీకారం చుట్టింది. సచివాలయంలో మంగళవారం జరిగిన కార్యక్రమంలో రాష్ట్ర రవాణా శాఖ మంత్రి పొన్నం ప్రభాకర్ 'రోడ్డు భద్రతా ప్రతిజ్ఞ' వెబ్సైట్ను అధికారికంగా ప్రారంభించారు.
ఈ వెబ్సైట్ ప్రారంభం తెలంగాణలో బాధ్యతాయుతమైన రహదారి ప్రవర్తన సంస్కృతిని నిర్మించే దిశగా ఒక కీలక అడుగుగా ఆయన అభివర్ణించారు. క్షేత్ర స్థాయిలో ప్రతి మోటార్ సైకిల్ యజమాని వరకు ఆన్లైన్ రోడ్డు భద్రతా ప్రతిజ్ఞ సర్టిఫికెట్ చేరేలా అధికారులు కృషి చేయాలని మంత్రి సూచించారు. రోడ్డు భద్రత అనేది కేవలం చట్టాల అమలు మాత్రమే కాదని, ప్రతి పౌరుడి బాధ్యత అని ఆయన అన్నారు. ముఖ్యంగా విద్యార్థులు తమ తల్లిదండ్రులతో కలిసి రోడ్డు నిబంధనలు పాటిస్తామని హామీ పత్రం ఇవ్వాలని సూచించారు. ఇలా చిన్న వయస్సు నుంచే పిల్లల్లో సురక్షితమైన అలవాట్లు అలవర్చితే భవిష్యత్లో ప్రమాదాలను నివారించవచ్చని తెలిపారు.
రవాణా శాఖ లక్ష్యం పౌరులు, తల్లిదండ్రులు, విద్యార్థులందరిలో రోడ్డు భద్రతపై స్పృహను పెంపొందించడం అని మంత్రి వివరించారు. సురక్షితమైన అలవాట్లు ఇంట్లోనే ప్రారంభమై ప్రతి రహదారిపై కొనసాగాలని ఆయన అన్నారు. ఈ వెబ్సైట్ ద్వారా పౌరులు ట్రాఫిక్ నియమాలను పాటిస్తామని, రోడ్డుపై ఉన్న ప్రతి జీవితం విలువైనదని గౌరవిస్తామని పౌర ప్రతిజ్ఞను తీసుకోవచ్చన్నారు. అలాగే తల్లిదండ్రులు తల్లిదండ్రుల ప్రతిజ్ఞను స్వీకరించి, తమ పిల్లలకు ఆదర్శంగా నిలవవచ్చని తెలిపారు.
రోడ్డు భద్రత అనేది ప్రభుత్వానికి మాత్రమే చెందిన బాధ్యత కాదని, తెలంగాణలోని ప్రతి కుటుంబం, ప్రతి పౌరుడు కలిసి తీసుకునే సమిష్టి వాగ్దానం అని ఈ చొరవ గుర్తు చేస్తుందని మంత్రి పేర్కొన్నారు. ఇది రోడ్డు భద్రత పట్ల ప్రభుత్వం తీసుకుంటున్న బలమైన సంస్థాగత నిబద్ధతకు నిదర్శనమని ఆయన పేర్కొన్నారు.
ప్రతిజ్ఞకే పరిమితమా? మరిన్ని ఫీచర్లపై ప్రజల్లో చర్చ
తెలంగాణ ప్రభుత్వం ప్రారంభించిన రోడ్డు భద్రతా ప్రతిజ్ఞ వెబ్సైట్పై ప్రజల్లో చర్చ మొదలైంది. రోడ్డు ప్రమాదాలను తగ్గించాలనే లక్ష్యంతో ఈ వెబ్సైట్ను ప్రారంభించినప్పటికీ, కేవలం ఆన్లైన్లో ప్రతిజ్ఞ తీసుకోవడం వల్ల వాహనదారుల ప్రవర్తనలో వాస్తవ మార్పు వస్తుందా అనే ప్రశ్నలు వినిపిస్తున్నాయి.
ప్రస్తుతం ఈ వెబ్సైట్ను ప్రధానంగా పౌరులు, తల్లిదండ్రులు రోడ్డు భద్రతకు సంబంధించిన ప్రతిజ్ఞ తీసుకునే వేదికగా మాత్రమే రూపొందించారు. ఇది అవగాహన పెంపొందించడానికి తొలి అడుగు అయినప్పటికీ, రోడ్డు భద్రత వంటి తీవ్రమైన సమస్యకు ఇది సరిపోతుందా అన్న సందేహాలు వ్యక్తమవుతున్నాయి.
అదేవిధంగా ప్రమాదకర రోడ్లు, బ్లాక్ స్పాట్స్, సిగ్నల్ లోపాలు, అక్రమ పార్కింగ్ వంటి అంశాలపై పౌరులు నేరుగా ఫిర్యాదు చేసే అవకాశం ఈ వెబ్సైట్లో లేకపోవడం కూడా విమర్శలకు దారితీస్తోంది. ప్రజలు రోజూ ఎదుర్కొనే సమస్యలను ప్రభుత్వం నేరుగా తెలుసుకునేలా ఒక ఆన్లైన్ ఫిర్యాదు వ్యవస్థ ఉంటే రోడ్డు భద్రతలో వాస్తవ మార్పు సాధ్యమవుతుందని పలువురు అభిప్రాయపడుతున్నారు.
ఈ నేపథ్యంలో ప్రజల్లో కొన్ని కీలక ప్రశ్నలు ఉత్పన్నమవుతున్నాయి. ప్రతిజ్ఞతో పాటు ట్రాఫిక్ నిబంధనలపై శిక్షణను ఎందుకు అందించడం లేదు? ప్రమాదకర రోడ్లపై సూచనలు ఎందుకు కల్పించలేదు? భవిష్యత్తులో ఈ వెబ్సైట్ను సమగ్ర రోడ్డు భద్రతా ప్లాట్ఫామ్గా అభివృద్ధి చేసే ప్రణాళిక ఉందా?
రోడ్డు భద్రత అనేది కేవలం చట్టాల అమలు మాత్రమే కాదని, ప్రజల భాగస్వామ్యంతో సాధించాల్సిన సామాజిక బాధ్యత అని నిపుణులు చెబుతున్నారు. ప్రతిజ్ఞ ఒక మంచి ఆరంభమే అయినా, దాన్ని అవగాహన, శిక్షణ, ఫిర్యాదు వ్యవస్థలతో అనుసంధానిస్తేనే రోడ్డు ప్రమాదాలను గణనీయంగా తగ్గించే అవకాశం ఉందన్న అభిప్రాయం వ్యక్తమవుతోంది.