రైల్వే భద్రత మరింత పటిష్టం: 738 కి.మీ. మార్గంలో 'కవచ్ 4.0'

భారతీయ రైల్వే భద్రత, సాంకేతికత విషయంలో రెండు కీలక ప్రకటనలు చేసింది. ఒకటి దేశీయంగా అభివృద్ధి చేసిన 'కవచ్' రైలు రక్షణ వ్యవస్థ తాజా వెర్షన్‌ను ప్రధాన మార్గాల్లో ప్రవేశపెట్టడం, మరొకటి రైలు పట్టాలపై ఏనుగుల మరణాలను ఆపడానికి ఆర్టిఫిషియల్ ఇంటెలిజెన్స్ ఆధారిత సాంకేతికతను విస్తరించడం. ఈ విషయాలను రైల్వే మంత్రి అశ్విని వైష్ణవ్ రాజ్యసభకు శుక్రవారం లిఖితపూర్వకంగా తెలియజేశారు.

కవచ్

అనేది దేశీయ సాంకేతికతతో అభివృద్ధి చేసిన ఒక ఆటోమేటిక్ ట్రైన్ ప్రొటెక్షన్ వ్యవస్థ. దీన్ని రైళ్లలో ఏర్పాటు చేయడం వల్ల ప్రమాదాలు జరగకుండా నివారించవచ్చు. రైలు డ్రైవర్ (లోకో పైలట్) వేగం పరిమితిని మించినప్పుడు లేదా సిగ్నల్ జంప్ చేసే ప్రమాదం ఉన్నప్పుడు, ఈ వ్యవస్థ ఆటోమేటిక్‌గా బ్రేకులను వేస్తుంది. ముఖ్యంగా మంచు, వర్షం లాంటి ప్రతికూల వాతావరణంలో ఇది చాలా ఉపయోగపడుతుంది. ఇది ఎస్ఐఎల్-4 అనే అత్యధిక భద్రతా ప్రమాణాన్ని కలిగి ఉంది.

ప్రస్తుతం భారతీయ రైల్వే కవచ్ 4.0ను మొత్తం 738 కిలోమీటర్ల ప్రధాన మార్గాల్లో ప్రారంభించింది. ముఖ్యంగా ఢిల్లీ-ముంబై మార్గంలో పల్వాల్-మధుర-నాగదా మధ్య 633 కి.మీ., ఢిల్లీ-హౌరా మార్గంలో హౌరా-బర్ధమాన్ మధ్య 105 కి.మీ. దూరం దీనిని ఏర్పాటు చేశారు. ఈ కొత్త వెర్షన్‌లో రైలు ఎక్కడ ఉందో మరింత కచ్చితంగా గుర్తించడం, స్టేషన్ల మధ్య ఆప్టికల్ ఫైబర్ కేబుల్ ద్వారా మెరుగైన కమ్యూనికేషన్ వంటి ఆధునిక సౌకర్యాలు ఉన్నాయి.

ఈ కవచ్ వ్యవస్థను ఏర్పాటు చేయడానికి రైల్వేస్ భారీగా ఖర్చు చేస్తోంది. ట్రాక్‌ల పక్కన, స్టేషన్లలో పరికరాలు అమర్చడానికి కిలోమీటరుకు సుమారు రూ.50 లక్షలు, లోకోమోటివ్‌లో యూనిట్ అమర్చడానికి ఒక్కో రైలుకు సుమారు రూ.80 లక్షలు ఖర్చవుతోంది. ఇప్పటికే 4,154 లోకోమోటివ్‌లకు కవచ్ అమర్చబడింది. రాబోయే దశల్లో మరో 9,069 లోకోమోటివ్‌లకు అమర్చడానికి టెండర్లు జారీ అయ్యాయి. ఈ విధంగా రైల్వే నెట్‌వర్క్ అంతటా భద్రతను పెంచడానికి ఈ కవచ్ వ్యవస్థను వేగంగా విస్తరిస్తున్నారు.

ఏనుగుల భద్రతకు ఏఐ టెక్నాలజీ

రైలు ప్రమాదాల నుంచి ఏనుగులను కాపాడటానికి భారతీయ రైల్వే ఇంట్రూషన్ డిటెక్షన్ సిస్టమ్ (ఐడీఎస్) అనే అధునాతన వ్యవస్థను ఏర్పాటు చేసింది. ఈ వ్యవస్థ 'డిస్ట్రిబ్యూటెడ్ అకౌస్టిక్ సెన్సింగ్ (డీఏఎస్)' సాంకేతికతను ఉపయోగించి పనిచేస్తుంది. రైలు పట్టాల దగ్గర ఎప్పుడైనా ఏనుగులు కదులుతున్నట్లు శబ్దం ద్వారా గానీ, కదలిక ద్వారా గానీ ఈ వ్యవస్థ గుర్తిస్తుంది.

ఏనుగులను గుర్తించిన వెంటనే, ఈ ఐడీఎస్ వ్యవస్థ తక్షణమే లోకో పైలట్‌లకు (రైలు డ్రైవర్లకు), స్టేషన్ మాస్టర్లకు, కంట్రోల్ రూమ్‌లకు హెచ్చరికలు పంపుతుంది. దీని వల్ల రైలు వేగాన్ని తగ్గించడం లేదా ఆపడం వంటి చర్యలు తీసుకుని, ఏనుగులను సురక్షితంగా వెళ్లనివ్వడానికి అవకాశం లభిస్తుంది. ప్రస్తుతం ఈ సాంకేతికత నార్త్ ఈస్ట్ ఫ్రాంటియర్ రైల్వేలో 141 కిలోమీటర్ల మార్గంలో అమలయ్యింది. దేశవ్యాప్తంగా మరో 981 కిలోమీటర్ల మార్గంలో ఈ వ్యవస్థను ఏర్పాటు చేయడానికి టెండర్లు జారీ చేశారు.

ఏనుగుల రక్షణతో పాటు, రైల్వే భద్రతను బలోపేతం చేయడానికి మరికొన్ని ఏఐ ఆధారిత సాంకేతికతలను కూడా రైల్వే పరీక్షిస్తోంది. సిగ్నలింగ్ వ్యవస్థల్లో లోపాలు రాకముందే ముందస్తుగా తెలుసుకోవడానికి ప్రిడిక్టివ్ మెయింటెనెన్స్‌ను ఉపయోగిస్తున్నారు. అలాగే, రైళ్లు కదులుతున్నప్పుడు వాటిలో ఏవైనా భాగాలు ఊడిపోతున్నాయా? లేవా? అని గుర్తించడానికి మెషిన్ విజన్ ఆధారిత తనిఖీ వ్యవస్థలు (ఎంవీఐఎస్), చక్రాల ఆకారాన్ని పర్యవేక్షించడానికి ఆటోమేటిక్ వీల్ ప్రొఫైల్ మెజర్‌మెంట్ సిస్టమ్స్ (ఏడబ్ల్యూపీఎంఎస్) వంటి ఆధునిక సాధనాలను కూడా రైల్వే అనుసరిస్తోంది. ఈ కొత్త సాంకేతికతల ద్వారా ప్రమాదాలను ముందే పసిగట్టి రైలు ప్రయాణాన్ని మరింత సురక్షితంగా మార్చడానికి రైల్వే ప్రయత్నిస్తోంది.

భవిష్యత్తులో ప్రమాదాలను నివారించడానికి, రైల్వే నెట్‌వర్క్‌ను ఆధునీకరించడానికి ఏఐ, మెషిన్-విజన్ సాధనాలను ఉపయోగించడం చాలా ముఖ్యమని ఈ సందర్భంగా రైల్వే మంత్రి అశ్విని వైష్ణవ్ నొక్కి చెప్పారు. ఆటోమేటిక్ ట్రైన్ ప్రొటెక్షన్ వ్యవస్థ అయిన 'కవచ్' పనిని నిజానికి 1980 లేదా 1990లలోనే పూర్తి చేయాల్సి ఉండేదని అన్నారు. ప్రపంచంలోని చాలా దేశాలు చాలా సంవత్సరాల క్రితమే ఇలాంటి వ్యవస్థలను ఏర్పాటు చేసుకుంటే, భారతదేశం మాత్రం ఇప్పుడు ఈ పనిని చేస్తోందని, దీనికి గత ప్రభుత్వాల వైఫల్యమే కారణమని ఆయన పరోక్షంగా విమర్శించారు.