రైతన్నలకు యూరియా పంపిణీలో 'యాప్' కష్టాలు
తెలంగాణ రాష్ట్రంలో సాగు పనులు ముమ్మరంగా సాగుతున్న వేళ, రైతులకు యూరియా కొరత కొత్త తలనెప్పులు తెచ్చిపెడుతోంది. ఎరువుల పంపిణీలో పారదర్శకత పెంచేందుకు అక్రమాలను అరికట్టేందుకు వ్యవసాయ శాఖ ప్రవేశపెట్టిన ‘ఫెర్టిలైజర్ యాప్’ క్షేత్రస్థాయిలో విఫలమవుతుండటంతో అన్నదాతలు మండిపడుతున్నారు.
నిజమైన రైతులకు సక్రమంగా ఎరువులు అందాలనే ఉద్దేశంతో ప్రభుత్వం రేషన్ పద్ధతిని అమలు చేస్తోంది. దీని ప్రకారం ఒక్కో రైతుకు ఎకరాకు గరిష్టంగా మూడు బస్తాల వరకు పంపిణీ చేయాలని నిబంధన విధించారు. అయితే, ప్రస్తుతం అమలులో ఉన్న యాప్లో తరచూ సాంకేతిక సమస్యలు తలెత్తుతున్నాయి. పొలాలు నాట్లు వేసే కీలక దశలో యూరియా ఎంతో అవసరం. అటువంటి సమయంలో ఎరువుల కోసం రోజుల తరబడి క్యూ లైన్లలో నిలబడటం వల్ల సాగు పనులు కుంటుపడుతున్నాయని రైతులు ఆరోపిస్తున్నారు.
ప్రభుత్వానికి రైతుల డిమాండ్
రాష్ట్రం ప్రవేశపెట్టిన యాప్ ద్వారా యూరియా పంపిణీ విధానం రైతులకి సౌకర్యంగా కాకుండా సమస్యగా మారింది. యాప్ ద్వారా పంపిణీ ప్రక్రియను సరళీకృతం చేయాలని, లేదా ప్రత్యామ్నాయ పద్ధతుల ద్వారా ఎరువులను తక్షణమే సరఫరా చేయాలని రైతులు కోరుతున్నారు. ఈ సమస్యపై విపక్షాలు కూడా అసెంబ్లీలో గళమెత్తాయి. సాంకేతికత పేరిట రైతులను ఇబ్బంది పెట్టకుండా, నాట్ల సమయానికి తగినంత యూరియా నిల్వలను అందుబాటులోకి తేవాలని వారు డిమాండ్ చేస్తున్నారు.
యూరియా కోసం పొలాలను వదిలేసి తిరుగుతున్న రైతులు
ములుగు జిల్లా, వెంకటాపూర్ మండలం నల్లగుంటలో రైతులు యూరియా కొరత కారణంగా పొలాల్లో పనులను నిలిపివేయడం జరిగింది. ఎకరానికి కేవలం ఒక బస్తా మాత్రమే అందుతుందని విన్న రైతులు పీఏసీఎస్ కేంద్రాల చుట్టూ ఉదయం నుండే పడిగాపులు చేస్తున్నారని తెలిపారు. ఎకరాకు ఒక్క బస్తా సరిపోదు. పొలాలు పాడవుతున్నాయి, అని మహిళా రైతులు ఆవేదన వ్యక్తం చేస్తున్నారు.
ప్రస్తుతం రాష్ట్రంలో 2.48 లక్షల మెట్రిక్ టన్నుల యూరియా నిల్వలు:
రాబి సీజన్ (డిసెంబర్-జనవరి) సాగు పనులు వేగవంతం కావడంతో, ఎరువుల కొరత తలెత్తకుండా ప్రభుత్వం ముందస్తు చర్యలు చేపట్టింది. ప్రస్తుతం రాష్ట్రవ్యాప్తంగా గోదాములు, డీలర్ కేంద్రాలలో కలిపి మొత్తం 2.48 లక్షల మెట్రిక్ టన్నుల యూరియా బఫర్ స్టాక్గా అందుబాటులో ఉన్నట్లు అధికారులు అధికారికంగా ప్రకటించారు. రాబోయే వారాల్లో ఈ నిల్వలను మరింత పెంచేందుకు చర్యలు తీసుకుంటున్నట్లు వ్యవసాయ శాఖ తెలిపింది. డిసెంబర్ చివరి నాటికి అదనపు స్టాక్ను సిద్ధం చేయడం ద్వారా రైతులకు ఎరువుల ఇబ్బంది లేకుండా చూస్తామని అధికారులు వెల్లడించారు కానీ రాష్ట్రంలో రైతులకు యూరియా అందడంలేదు.
ప్రస్తుత రబీ (2025–26) సీజన్ కోసం కేంద్ర ప్రభుత్వం తెలంగాణకు 10.40 లక్షల మెట్రిక్ టన్నుల యూరియాను కేటాయించింది. ఇందులో ఇప్పటికే 2.15 లక్షల మెట్రిక్ టన్నుల (సుమారు 47.7 లక్షల బస్తాలు) నిల్వలు సిద్ధంగా ఉన్నాయని అధికారులు తెలిపారు. రాష్ట్రంలో ఎరువుల కొరత లేదని, స్టాక్ పరిపూర్ణంగా అందుబాటులో ఉందని ప్రభుత్వం స్పష్టం చేసింది. రైతులు ఎలాంటి ఆందోళన చెందాల్సిన అవసరం లేదని, అవసరానికి తగ్గట్టుగా నిల్వలను పంపిణీ కేంద్రాలకు తరలిస్తున్నామని వ్యవసాయ శాఖ వెల్లడించింది. ఎరువుల కోసం క్యూ లైన్లలో నిలబడాల్సిన పనిలేదని, సరఫరా సజావుగా సాగుతుందని భరోసా ఇచ్చింది.
కేంద్ర ఖరీఫ్ లో 2025: అంచనాకు మించి యూరియా సరఫరా
2025 ఖరీఫ్ సీజన్లో తెలంగాణ రైతాంగ అవసరాల కోసం యూరియా సరఫరాను ప్రభుత్వం విజయవంతంగా పూర్తి చేసింది. ఈ సీజన్లో రాష్ట్రవ్యాప్తంగా సుమారు 9.80 లక్షల మెట్రిక్ టన్నుల యూరియా అవసరమవుతుందని వ్యవసాయ శాఖ ప్రాథమికంగా అంచనా వేసింది. రైతుల నుంచి డిమాండ్ పెరిగినప్పటికీ, కేంద్రం, రాష్ట్ర ప్రభుత్వాల సమన్వయంతో అంచనా వేసిన దానికంటే ఎక్కువగా, అంటే మొత్తం 10.28 లక్షల మెట్రిక్ టన్నుల యూరియాను సరఫరా చేసినట్లు అధికారిక గణాంకాలు వెల్లడిస్తున్నాయి. దీనివల్ల రాష్ట్రవ్యాప్తంగా ఎక్కడా ఎరువుల కొరత తలెత్తకుండా సాగు పనులు సాఫీగా సాగాయని ప్రభుత్వం పేర్కొంది.
బీఆర్ఎస్ vs కాంగ్రెస్.. సమస్య ఎక్కడ?
తెలంగాణ రైతాంగాన్ని దశాబ్ద కాలంగా వేధిస్తున్న ప్రధాన సమస్యల్లో యూరియా పంపిణీ ఒకటి. గత బీఆర్ఎస్ ప్రభుత్వం, ప్రస్తుత కాంగ్రెస్ ప్రభుత్వాల హయాంలో ఈ సమస్య తలెత్తినప్పటికీ, దాని స్వభావం, తీవ్రతలో వ్యత్యాసాలు కనిపిస్తున్నాయి.
బీఆర్ఎస్ పాలన (2014-2023): సీజనల్ ఇబ్బందులు
బీఆర్ఎస్ హయాంలో యూరియా సమస్య ప్రధానంగా వరి సాగు విస్తీర్ణం అనూహ్యంగా పెరిగినప్పుడు లేదా రైలు రాక ఆలస్యమైనప్పుడు మాత్రమే తలెత్తేది.అప్పట్లో సమస్య కేవలం కొన్ని జిల్లాలకో లేదా 2-5 రోజులకో పరిమితమయ్యేది. ముందస్తు నిల్వలు జిల్లా వారీ సర్దుబాటు ద్వారా ప్రభుత్వం పరిస్థితిని వేగంగా అదుపులోకి తెచ్చేది. దీనివల్ల రైతుల్లో అసహనం ఉన్నా, అది పెద్ద ఎత్తున రాజకీయ ఉద్యమంగా మారే పరిస్థితి తక్కువగా ఉండేది.
ప్రస్తుత కాంగ్రెస్ పాలన (2023-నేడు): పంపిణీ గందరగోళం
ప్రస్తుత ప్రభుత్వ హయాంలో స్టాక్ అందుబాటులో ఉన్నప్పటికీ, పంపిణీ విధానంలోని లోపాల వల్ల సమస్య తీవ్రంగా కనిపిస్తోంది. కొత్తగా ప్రవేశపెట్టిన 'ఫెర్టిలైజర్ యాప్'లో సాంకేతిక లోపాలు, వేలిముద్రల సమస్యల వల్ల పంపిణీలో జాప్యం జరుగుతోంది. ఒక్క ఎకరాకు ఒక్క బస్తా మాత్రమే ఇవ్వాలనే నిబంధన రైతుల్లో తీవ్ర అసంతృప్తిని కలిగిస్తోంది. దీనివల్ల పీఏసీఎస్ కేంద్రాల వద్ద రైతులు వారం రోజుల పాటు వేచి ఉండాల్సిన పరిస్థితి వస్తోంది.
ఏది ఎక్కువ?
బీఆర్ఎస్ కాలంలో సమస్యలు స్థానికంగా, తక్కువ రోజులు ఉంటే, కాంగ్రెస్ హయాంలో అవి ఎక్కువ కాలం, ఎక్కువ శబ్దంతో మీడియాలో చర్చకు వస్తున్నాయి. ప్రభుత్వ వద్ద సరిపడా నిల్వలు (ప్రస్తుతం 2.48 లక్షల మెట్రిక్ టన్నులు) ఉన్నప్పటికీ, 'యాప్స, 'నియంత్రణలు' రైతుకు నేరుగా అందడంలో అడ్డంకులుగా మారాయి. అందుకే ప్రస్తుతం గ్రౌండ్ లెవల్లో అసౌకర్యం ఎక్కువగా కనిపిస్తోంది.