రేపు భారత్‌కు ఫిన్లాండ్‌ అధ్యక్షుడు అలెగ్జాండర్‌ స్టబ్‌

ఫిన్లాండ్ అధ్యక్షుడు డాక్టర్ అలెగ్జాండర్ స్టబ్ రేపటి (మార్చి 4) నుంచి నాలుగు రోజుల పాటు భారతదేశంలో అధికారికంగా పర్యటించనున్నారు. అధ్యక్షుడిగా బాధ్యతలు చేపట్టిన తర్వాత ఆయన భారత్‌కు రావడం ఇదే తొలిసారి. ఈ పర్యటనలో భాగంగా దేశ రాజధానిలో జరగనున్న ప్రతిష్టాత్మక '11వ రైసినా డైలాగ్ 2026'లో ఆయన ముఖ్య అతిథిగా పాల్గొని, కీలక ప్రసంగం చేయనున్నారు. స్టబ్‌తో పాటు ఆ దేశ మంత్రులు, ఉన్నతాధికారులు, ప్రముఖ వ్యాపారవేత్తలతో కూడిన ఉన్నత స్థాయి ప్రతినిధి బృందం కూడా భారత్‌కు రానుంది.

ప్రధాని మోడీతో భేటీ

పర్యటనలో భాగంగా ప్రధాని నరేంద్ర మోడీతో అలెగ్జాండర్ స్టబ్ సమావేశం కానున్నారు. ఈ సందర్భంగా ఇరు దేశాల మధ్య రక్షణ, సాంకేతికత, వాణిజ్యం వంటి పలు కీలక రంగాలలో సహకారాన్ని మరింత పటిష్టం చేయడంపై చర్చలు జరపనున్నారు. వీటితో పాటు ప్రాంతీయ, అంతర్జాతీయ అంశాలపై, బహుపాక్షిక వేదికలపై పరస్పర సహకారంపై ఇరువురు నేతలు అభిప్రాయాలను పంచుకోనున్నారు. గౌరవ సూచికంగా ఫిన్లాండ్ అధ్యక్షుడికి ప్రధాని మోడీ విందు ఇవ్వనున్నారు.

రాష్ట్రపతి ముర్ముతో సమావేశం

రాష్ట్రపతి ద్రౌపది ముర్ముతో కూడా అలెగ్జాండర్ స్టబ్ భేటీ కానున్నారు. అలాగే ఉపరాష్ట్రపతి సి.పి. రాధాకృష్ణన్, విదేశాంగ మంత్రి డాక్టర్ ఎస్. జైశంకర్ ఆయనను కలిసి పలు అంశాలపై చర్చించనున్నారు. ఢిల్లీ పర్యటన అనంతరం ఆయన వాణిజ్య రాజధాని ముంబైకి వెళ్లనున్నారు. అక్కడ మహారాష్ట్ర గవర్నర్, ముఖ్యమంత్రితో భేటీ కావడంతో పాటు, భారతీయ వ్యాపార దిగ్గజాలతో సమావేశమవుతారు. ముంబై విశ్వవిద్యాలయంలో విద్యార్థులను ఉద్దేశించి ఆయన ప్రసంగించనున్నారు.

బలపడుతున్న మైత్రి

భారత్, ఫిన్లాండ్ దేశాల మధ్య ఎప్పటి నుంచో మంచి స్నేహ సంబంధాలు ఉన్నాయి. ఐరోపా దేశాల్లో భారత్‌కు ఫిన్లాండ్ ఒక నమ్మకమైన భాగస్వామి. గత నెలలోనే ఆ దేశ ప్రధాని పెట్టెరి ఓర్పో భారత పర్యటనకు రాగా, ఇప్పుడు ఏకంగా అధ్యక్షుడే స్వయంగా వస్తుండటం ఇరు దేశాల మధ్య ఉన్న బలమైన బంధానికి నిదర్శనం. ఈ పర్యటన వల్ల రెండు దేశాల మధ్య వ్యాపార సంబంధాలు మెరుగుపడటమే కాకుండా, సాంకేతిక రంగంలోనూ సహకారం పెరుగుతుందని విదేశాంగ శాఖ భావిస్తోంది.