రేపు తెలంగాణ కేబినెట్ సమావేశం

తెలంగాణ రాష్ట్ర మంత్రివర్గం రేపు కీలక సమావేశం నిర్వహించనుంది. అయితే, ఈసారి కేబినెట్ భేటీ ఎప్పటిలాగా హైదరాబాద్‌లోని సచివాలయంలో కాకుండా, ములుగు జిల్లాలోని మేడారంలో జరగనుండటం విశేషం. ముఖ్యమంత్రి రేవంత్ రెడ్డి నేతృత్వంలోని ఈ సమావేశం ఆసియాలోనే అతిపెద్ద గిరిజన జాతర అయిన సమ్మక్క-సారలమ్మ మహాజాతర నేపథ్యంలో అక్కడ ఏర్పాటు చేయాలని ప్రభుత్వం నిర్ణయించింది.

సాధారణంగా పరిపాలనా కేంద్రమైన సచివాలయానికే పరిమితమయ్యే క్యాబినెట్ భేటీని, ప్రజలకు మరింత చేరువగా, క్షేత్రస్థాయిలో నిర్వహించడం ఇదే తొలిసారి. జాతర ఏర్పాట్లు, భక్తుల సౌకర్యాలు మరియు స్థానిక అభివృద్ధి పనులపై ఈ భేటీలో కీలక నిర్ణయాలు తీసుకునే అవకాశం ఉంది.రేపు సాయంత్రం 5 గంటలకు మేడారంలోని హరిత హోటల్‌లో ముఖ్యమంత్రి రేవంత్ రెడ్డి అధ్యక్షతన ఈ కేబినెట్ భేటీ నిర్వహించనున్నారు. ముఖ్యమంత్రి, ఉప ముఖ్యమంత్రితో పాటు మంత్రులందరూ ఈ భేటీలో పాల్గొంటారు. వీరితో పాటు ప్లానింగ్ బోర్డు వైస్ చైర్మన్, ప్రభుత్వ సలహాదారులు, సిఎస్ కె. రామకృష్ణ రావు కీలక శాఖల కార్యదర్శులు హాజరవుతారు.

రాష్ట్ర ప్రభుత్వ నూతన పథకాలు, సంక్షేమ కార్యక్రమాల పురోగతి, ఫ్లాగ్‌షిప్ ప్రాజెక్టుల అమలుపై ఈ సమావేశంలో కీలక నిర్ణయాలు తీసుకోనున్నారు.సమ్మక్క-సారలమ్మ మహాజాతర సమీపిస్తున్న వేళ, క్షేత్రస్థాయిలో ఏర్పాట్లను సమీక్షించడంతో పాటు పాలనను ప్రజలకు చేరువ చేయడమే ఈ భేటీ ప్రధాన ఉద్దేశం. రాష్ట్ర అభివృద్ధి, సంక్షేమ పథకాల సమర్థతను సమీక్షించే ఈ సమావేశం, తెలంగాణ ప్రజల ప్రయోజనాల దృష్ట్యా అత్యంత కీలకంగా మారనుంది.

ఈ నిర్ణయం ద్వారా మేడారం జాతరపై ప్రభుత్వానికి ఉన్న చిత్తశుద్ధిని చాటిచెప్పడమే కాకుండా, పరిపాలనను జిల్లాలకు తీసుకెళ్లే ప్రయత్నంగా విశ్లేషకులు భావిస్తున్నారు. మంత్రులందరూ ఆ రోజు మేడారంలో పర్యటించి, అమ్మవార్లను దర్శించుకున్న అనంతరం ఈ సమావేశంలో పాల్గొంటారు.