రేపు ఇజ్రాయెల్ పర్యటనకు ప్రధాని మోడీ.. నెతన్యాహుతో కీలక భేటీ

భారత ప్రధానమంత్రి నరేంద్ర మోడీ ఈ నెల 25, 26 తేదీల్లో ఇజ్రాయెల్‌లో పర్యటించనున్నారు. ఈ పర్యటన భారత్-ఇజ్రాయెల్ దేశాల మధ్య ఉన్న స్నేహాన్ని, సహకారాన్ని మరింత ఉన్నత స్థాయికి తీసుకెళ్తుందని ఆయన పేర్కొన్నారు. పరస్పర నమ్మకం, కొత్త ఆవిష్కరణలు, అలాగే శాంతి, అభివృద్ధి కోసం కలిసి పనిచేయడమే ఇరు దేశాల వ్యూహాత్మక భాగస్వామ్యానికి అసలైన పునాదులని ప్రధాని మోడీ స్పష్టం చేశారు.

చారిత్రాత్మక పర్యటన: నెతన్యాహు

ఈ పర్యటనకు ముందు ఇజ్రాయెల్ ప్రధాని బెంజమిన్ నెతన్యాహు తన కేబినెట్ సమావేశంలో మాట్లాడుతూ, ప్రధాని మోడీ రాకను 'చారిత్రాత్మకమైనది'గా అభివర్ణించారు. "ఈ బుధవారం నా ప్రియమిత్రుడు నరేంద్ర మోడీ ఇజ్రాయెల్‌కు రావడం ఎంతో సంతోషాన్నిస్తోంది. భారత్-ఇజ్రాయెల్ బంధం రెండు దేశాల నాయకుల మధ్య ఉన్న ఒక శక్తివంతమైన కూటమి" అని ఆయన పేర్కొన్నారు. తమ భాగస్వామ్యం కేవలం వాణిజ్యానికే పరిమితం కాకుండా ఆవిష్కరణలు, భద్రత, ఉమ్మడి వ్యూహాత్మక దార్శనికతతో కూడినదని నెతన్యాహు స్పష్టం చేశారు. ఏఐ నుండి ప్రాంతీయ సహకారం వరకు అన్ని రంగాల్లోనూ తమ భాగస్వామ్యం కొత్త పుంతలు తొక్కుతోందని, జెరూసలేంలో మోడీని కలుసుకోవడానికి తాను ఆసక్తిగా ఎదురుచూస్తున్నానని ఆయన వెల్లడించారు.

2017 తర్వాతఇజ్రాయెల్ కు..

భారత ప్రధాని నరేంద్ర మోడీ చివరిసారిగా 2017 జూలైలో ఇజ్రాయెల్‌ను సందర్శించారు. ఆ పర్యటన ఇరు దేశాల సంబంధాల్లో ఒక కీలక మలుపు. అప్పటి వరకు ఉన్న దౌత్య సంబంధాలను ఆయన ‘వ్యూహాత్మక భాగస్వామ్యం’ స్థాయికి పెంచారు. ఆ చారిత్రాత్మక పర్యటనకు ప్రతిస్పందనగా 2018 జనవరిలో ఇజ్రాయెల్ ప్రధాని నెతన్యాహు భారత్‌లో పర్యటించారు. తిరిగి ఇప్పుడు ప్రధాని మోడీ జెరూసలేం పర్యటనకు వెళ్తుండటంతో, ప్రాంతీయ భద్రత, ఆర్థిక సహకారంపై ఇరు దేశాలు మరింత స్పష్టమైన అడుగులు వేయనున్నాయి.

అగ్రనేతల మధ్య నిరంతర సంప్రదింపులు

2025 నుంచి 2026 ప్రారంభం వరకు ఇరు దేశాల ప్రధానులు నిరంతరం సంప్రదింపులు జరుపుతూ, పశ్చిమాసియాలో చోటుచేసుకుంటున్న పరిణామాలు, ముఖ్యంగా ఇరాన్-ఇజ్రాయెల్ మధ్య ఉద్రిక్తతలు, ప్రాంతీయ స్థిరత్వంపై చర్చించారు. 2025 డిసెంబర్‌లో విదేశాంగ మంత్రి డాక్టర్ ఎస్. జైశంకర్ ఇజ్రాయెల్ పర్యటన సందర్భంగా, 2026 సంవత్సరానికి గానూ ఒక ఉమ్మడి కార్యాచరణ ప్రణాళికను ఆమోదించారు. తాజా పర్యటనలో భాగంగా ఈ ప్రణాళిక అమలు, రక్షణ రంగ సహకారంపై నేతలు కీలక నిర్ణయాలు తీసుకోనున్నారు.

వ్యవసాయం, సాంకేతికతలో భాగస్వామ్యం

రాజకీయ సంబంధాలే కాకుండా వ్యవసాయం, నీటి యాజమాన్యం, సైన్స్ అండ్ టెక్నాలజీ, ఆరోగ్యం, ఆవిష్కరణల రంగాల్లోనూ ఇరు దేశాలు అద్భుతమైన పురోగతిని సాధిస్తున్నాయి. ముఖ్యంగా ఆరో ఇజ్రాయెల్-భారత్ వ్యవసాయ కార్యాచరణ ప్రణాళిక (2024-2026) ప్రస్తుతం అమల్లో ఉంది. దేశవ్యాప్తంగా ఉద్యానవనం, తేనెటీగల పెంపకం వంటి రంగాల్లో 43 ‘సెంటర్స్ ఆఫ్ ఎక్సలెన్స్’ ఏర్పాటుకు ఆమోదం లభించింది. ఇజ్రాయెల్ అత్యాధునిక సాంకేతికతను భారత రైతులకు అందించడం ద్వారా ఉత్పాదకతను పెంచడం ఈ పర్యటనలోని ముఖ్య ఉద్దేశ్యం.

బలమైన ప్రజా సంబంధాలు

ఇరు దేశాల మధ్య ప్రజా సంబంధాలు, సాంస్కృతిక వారసత్వం బలమైన స్తంభాలుగా ఉన్నాయి. ఇజ్రాయెల్‌లో సుమారు ఒక లక్షకు పైగా భారతీయ సంతతికి చెందిన యూదులు నివసిస్తుండగా, 42 వేల మందికి పైగా భారతీయులు అక్కడ ఉద్యోగాలు చేస్తున్నారు. టెల్ అవీవ్‌లోని ఇండియన్ కల్చరల్ సెంటర్ ద్వారా యోగా, ఆయుర్వేదం, భారతీయ సంస్కృతికి ఇజ్రాయెల్‌లో రోజురోజుకూ ఆదరణ పెరుగుతోంది. ఇరు దేశాల ప్రజల మధ్య ఉన్న ఈ అనుబంధమే దౌత్య సంబంధాలను మరింత బలోపేతం చేస్తోంది.

అంతర్జాతీయ వేదికలపై ఉమ్మడి వ్యూహం

అంతర్జాతీయ వేదికలపై కూడా భారత్-ఇజ్రాయెల్ కలిసి అడుగులు వేస్తున్నాయి. ముఖ్యంగా భారత్, ఇజ్రాయెల్, యునైటెడ్ అరబ్ ఎమిరేట్స్, అమెరికా కలిసి ఏర్పాటు చేసిన 'ఐ2యూ2' గ్రూపింగ్, ఇరు దేశాల ఉమ్మడి వ్యూహాత్మక దార్శనికతకు ప్రతీకగా నిలుస్తోంది. భవిష్యత్తులో ఇండో-పసిఫిక్ ప్రాంతంలో స్వేచ్ఛాయుత, పారదర్శకమైన వాతావరణం కోసం ఇరు దేశాలు కలిసి పనిచేసేందుకు కట్టుబడి ఉన్నాయని ఈ పర్యటన మరోసారి చాటిచెబుతోంది.