రెండో ఆషెస్ టెస్టుపై స్టీవ్ స్మిత్ ఫోకస్
ఆస్ట్రేలియా స్టార్ బ్యాటర్ స్టీవ్ స్మిత్ ఈసారి ఏ చిన్న విషయాన్నీ వదిలిపెట్టకూడదనుకున్నాడు. గబ్బా వేదికగా గురువారం ప్రారంభమయ్యే పింక్–బాల్ డే–నైట్ టెస్టులో కాంతి ప్రతిబింబం తగ్గించేందుకు కంటి కింద అంటుకునే బ్లాక్ స్ట్రిప్స్ను కొత్తగా ప్రయత్నిస్తున్నాడు. ఇవి సాధారణంగా ఫుట్బాల్ క్రీడాకారులు ఉపయోగించేవి.
ఈస్ట్రన్ వెస్టిండీస్ మాజీ బ్యాటర్ శివనరైన్ చందర్పాల్ ఉపయోగించే విధానాన్ని చూసి స్మిత్ కూడా తన విదానాన్ని మార్చుకున్నాడు. గత వారం ప్రాక్టీస్లో స్ట్రిప్స్ వేసుకున్న స్మిత్ వాటిని తానే తలకిందులుగా వేసుకున్నానని తరువాత గుర్తించాడు. చందర్పాల్ను స్వయంగా మెసేజ్ చేసి మార్గనిర్దేశం కూడా తీసుకున్నానని ఆయన వెల్లడించాడు. “కాంతిని సుమారు 65 శాతం తగ్గిస్తాయట. నిన్న సరిగా వేసుకుని చూశా… నిజంగానే తేడా ఉంది,” అని స్మిత్ చెప్పాడు.
ఉస్మాన్ ఖవాజా వెన్ను నొప్పితో రెండో టెస్టుకు దూరమైన నేపథ్యంలో ఆస్ట్రేలియా ఒక మార్పు చేయాల్సి వచ్చింది. ఖవాజా స్థానంలో మధ్యవరుసలో జోష్ ఇంగ్లిష్కి అవకాశం లభించే అవకాశం ఉందని విశ్లేషకులు భావిస్తున్నారు. తొలి టెస్టులో మెరుపు ఇన్నింగ్స్ ఆడిన ట్రావిస్ హెడ్ ఓపెనర్గా కొనసాగుతాడని భావిస్తున్నారు.
అయితే జట్టు తుది జాబితాను ఆస్ట్రేలియా టాస్ వరకూ ప్రకటించదలచలేదు. ఇదే కారణంగా ప్యాట్ కమిన్స్ ఆరోగ్యం, అందుబాటు గురించి వచ్చిన ప్రశ్నలకు స్మిత్ స్పష్టమైన సమాధానం ఇవ్వలేదు. మొదటి టెస్టుకు కమిన్స్ దూరమయ్యాడు, రెండో టెస్టు జట్టులో కూడా ఆయన పేరు లేకపోయినా, నెట్ ప్రాక్టీస్లో బౌలింగ్ చేస్తూ కనిపించడంతో చర్చలు ఊపందుకున్నాయి. “నెట్స్లో బాగా బౌలింగ్ చేస్తున్నాడు. తన శరీర పరిస్థితిని ఆయనకంటే బాగా ఎవరూ తెలుసుకోరు. మ్యాచ్ దృష్ట్యా ఎలా సాగుతుందో చూడాలి,” అని స్మిత్ అన్నాడు.
డే–నైట్ టెస్టుల్లో అద్భుత రికార్డు ఉన్న ఆస్ట్రేలియా జట్టుకు గబ్బా మైదానం ఎప్పటిలాగే బలమైన కోట. గత సంవత్సరం వెస్టిండీస్ చేతిలో చిన్న తేడాతో ఓడిన మ్యాచ్ మినహా ఈ వేదికపై ఆస్ట్రేలియా దాదాపు అజేయంగా ఉంది.
ఇంగ్లండ్ అయితే 1986 తర్వాత ఇక్కడ ఆషెస్ టెస్టు గెలవలేదు. ఆస్ట్రేలియాలో టెస్టు విజయం సాధించిన దాఖలాలు కూడా 2010–11 సిరీస్ వరకే పరిమితం.
పెర్త్లో తీవ్ర విమర్శలకు గురైనప్పటికీ, ‘దాడి–దాడి–మరింత దాడి’ అనే ఇంగ్లండ్ బాజ్బాల్ వ్యూహం కొనసాగుతుందని బెన్ స్టోక్స్ ఇప్పటికే ప్రకటించాడు. అయితే ఆస్ట్రేలియా మాత్రం పరిస్థితులకు అనుగుణంగా ఆడటమే తమ బలం అని స్మిత్ చెప్పాడు.
“ఏ పరిస్థితి ఎదురైనా దానికి తగ్గట్టుగా నిర్ణయాలు తీసుకోవడం మా జట్టు బలమైన అంశం. టెస్ట్ క్రికెట్లో ఇదే ముందుకు నడిపిస్తుంది,” అని ఆయన వ్యాఖ్యానించాడు.