రెండోదశ పంచాయతీ ఎన్నికల్లో 415గ్రామాలు ఏకగ్రీవం

తెలంగాణ‌లో రెండో దశ పంచాయతీ ఎన్నికలకు సమయం దగ్గర పడుతుండటంతో రాష్ట్రంలో రాజకీయం పూర్తిగా వేడెక్కింది. పల్లె, గ్రామం తేడా లేకుండా ప్రతి గ్రామంలో సర్పంచ్, వార్డు అభ్యర్థుల ప్రచారం జోరందుకుంది. నాయకులు ఇంటింటికి తిరుగుతూ ఓటర్లను ఆకర్షించేందుకు ప్రయత్నిస్తున్నారు. హామీలు, వాగ్దానాలతో గ్రామ వాతావరణం సందడిగా మారింది. ప్రధాన పార్టీల మద్దతుదారులు తమ అభ్యర్థులను గెలిపించుకునేందుకు శక్తిమేర కృషి చేస్తున్నారు. రాష్ట్రంలోని మారుమూల గ్రామాల నుంచి నియోజకవర్గ కేంద్రాల వరకు ఎన్నికల కోలాహలం స్పష్టంగా కనిపిస్తోంది.

రాష్ట్రంలో రెండో దశ గ్రామ పంచాయతీ ఎన్నికల నామినేషన్ల ఉపసంహరణ ప్రక్రియ ముగిసిన నేపథ్యంలో, ఈ విడతలో మొత్తం 415 గ్రామాలు ఏకగ్రీవంగా ఎన్నికైనట్లు అధికారులు ప్రకటించారు.రెండో విడతలో రాష్ట్రవ్యాప్తంగా మొత్తం 3,911 గ్రామాలకు ఎన్నికలు జరగాల్సి ఉండగా, 415 గ్రామాలు ఏకగ్రీవం కావడం విశేషం.ఈ ద‌శ‌లో 8,304 వార్డుల్లో కూడా ఎటువంటి పోటీ లేకుండానే సభ్యులు ఏకగ్రీవంగా ఎంపికయ్యారు.ఈ ఏకగ్రీవాలు ఎన్నికల వేడిని కొంత తగ్గించినట్టుగా అధికారులు భావిస్తున్నారు. జిల్లావారీగా చూస్తే కామారెడ్డి జిల్లా అత్యధికంగా 44 గ్రామాలు ఏకగ్రీవం కావడం గమనార్హం. దీనికి దగ్గర్లోనే నల్గొండ, నిజామాబాద్ జిల్లాలు ఉన్నాయి. ఈ రెండు జిల్లాల్లో చెరో 38 గ్రామాలు పోటీ లేకుండానే సర్పంచ్, వార్డు సభ్యుల ఎంపిక పూర్తయింది.

ఇక మరోవైపు అత్యల్ప ఏకగ్రీవాలు నమోదైన జిల్లా ఆసిఫాబాద్. ఇక్కడ కేవలం ఒక గ్రామం మాత్రమే ఏకగ్రీవంగా ఎన్నికలను ముగించుకుంది. ఏకగ్రీవాల సంఖ్య పెరగడం గ్రామాల్లో సమ్మతి, సామరస్య వాతావరణం నెలకొన్నట్లుగా భావిస్తున్నప్పటికీ, కొన్నిచోట్ల రాజకీయ ఒత్తిళ్లు కూడా ప్రభావం చూపిన అవకాశముందని పరిశీలకులు చెబుతున్నారు.మొత్తానికి, రెండో దశ పంచాయితీ ఎన్నికలు అధికార యంత్రాంగం ఏర్పాట్ల మధ్య శాంతియుతంగా సాగుతుండగా, ఏకగ్రీవాల సంఖ్య ఎన్నికల ప్రాముఖ్యతను మరో కోణంలో చూపుతున్నాయి. తొలిద‌శ‌లో స‌ర్పంచ్ 4,236 వార్డులు 37,440 ల‌కు డిసెంబ‌ర్ 11న ఉద‌యం 7నుంచి 1 గంట‌ల వ‌ర‌కు జ‌రుగనుంది. అనంత‌రం ఓట్లు లెక్కింపు జ‌రుగ‌నుంది.