రూ.2000 కోట్ల పెట్టుబడితో ఇండోర్లో హెట్టిచ్ అత్యాధునిక ప్లాంట్
జర్మనీకి చెందిన ప్రముఖ ఫర్నిచర్ ఫిట్టింగ్స్ తయారీ సంస్థ హెట్టిచ్ ఇండియా మధ్యప్రదేశ్లోని ఇండోర్లో అత్యాధునిక తయారీ కేంద్రాన్ని ప్రారంభించింది. భారతదేశంలో కంపెనీ కార్యకలాపాలు ప్రారంభమై 25 సంవత్సరాలు పూర్తవుతున్న సందర్భంగా ఈ కొత్త ప్లాంట్ను ప్రారంభించడం సంస్థ అభివృద్ధి ప్రయాణంలో మరో ముఖ్య మైలురాయిగా నిలిచింది. ఈ ప్రాజెక్ట్ ద్వారా స్థానిక తయారీ సామర్థ్యాన్ని పెంచడంతో పాటు భారత్ను గ్లోబల్ తయారీ కేంద్రంగా తీర్చిదిద్దాలనే సంస్థ లక్ష్యాన్ని మరింత బలోపేతం చేసింది.
ఇండోర్లోని హెట్టిచ్ తయారీ సముదాయంలో భాగంగా ఏర్పాటు చేసిన ఈ కొత్త ప్లాంట్ విస్తీర్ణం సుమారు 25,700 చదరపు మీటర్లు కాగా మొత్తం ఇండోర్ క్యాంపస్ విస్తీర్ణం 1,03,039 చదరపు మీటర్లు. ఈ కేంద్రంలో అత్యాధునిక సాంకేతికతతో రూపొందించిన అండర్మౌంట్ టేబల్ రన్నర్స్ తయారు చేయనున్నారు. ఇవి టేబల్ దిగువ భాగంలో అమర్చే ప్రత్యేకమైన స్లైడింగ్ వ్యవస్థలు. వీటి సహాయంతో టేబల్ మృదువుగా, శబ్దం లేకుండా సులభంగా కదలడమే కాకుండా ఆధునిక ఇంటీరియర్ డిజైన్కు అనుగుణంగా హ్యాండిల్ లేకుండా కూడా ఉపయోగించుకునే అవకాశం ఉంటుంది. ప్రీమియం ఫర్నిచర్ మాడ్యూలర్ కిచెన్లలో వీటి వినియోగం వేగంగా పెరుగుతోంది.
భారతదేశంలో హెట్టిచ్ సంస్థ ఏర్పాటు చేసిన మొదటి అండర్మౌంట్ టేబల్ రన్నర్ తయారీ యూనిట్ ఇదే కావడం విశేషం. ఈ ప్రాజెక్ట్ కంపెనీ భారత్లో చేపట్టిన సుమారు రూ.2,000 కోట్ల పెట్టుబడిలో భాగం. ఈ పెట్టుబడుల ద్వారా స్థానిక తయారీని విస్తరించడం, సరఫరా గొలుసును బలోపేతం చేయడం, అంతర్జాతీయ మార్కెట్లకు ఎగుమతులను పెంచడం లక్ష్యంగా సంస్థ ముందుకు సాగుతోంది.
ఇండోర్లో ఇప్పటికే ఉన్న హెట్టిచ్ హింజ్ తయారీ యూనిట్ సంవత్సరానికి సుమారు 6 కోట్ల హింజ్లు తయారు చేసే సామర్థ్యాన్ని కలిగి ఉంది. ఇప్పుడు ప్రారంభించిన క్వాడ్రో ప్లాంట్ ద్వారా సంవత్సరానికి సుమారు 50 లక్షల అండర్మౌంట్ టేబల్ రన్నర్స్ ఉత్పత్తి చేయనున్నారు. దీంతో భారతదేశంలో హెట్టిచ్ తయారీ సామర్థ్యం గణనీయంగా పెరగనుంది.
ఇండోర్ తయారీ కేంద్రం ప్రస్తుతం హింజ్లు, స్లైడింగ్ ప్రొఫైల్స్, అల్యూమినియం ప్రొఫైల్స్, ఎస్ఎల్16+ సిస్టమ్స్, క్యూబ్ ప్లస్ సిస్టమ్స్ వంటి ప్రీమియం ఫర్నిచర్ ఫిట్టింగ్స్ను తయారు చేస్తోంది. ఈ కారణంగా ఇండోర్ ప్లాంట్ ప్రపంచవ్యాప్తంగా హెట్టిచ్ సంస్థకు అత్యంత కీలకమైన తయారీ కేంద్రాలలో ఒకటిగా గుర్తింపు పొందింది.
ఈ కొత్త ప్లాంట్ను అత్యాధునిక ఆటోమేషన్ సాంకేతికతతో రూపొందించారు. జర్మన్ ఇంజినీరింగ్ ప్రమాణాలతో తయారు చేసిన యంత్రాలు, ఆధునిక రోల్-ఫార్మింగ్ టెక్నాలజీ సహాయంతో ఉత్పత్తుల నాణ్యతను అంతర్జాతీయ ప్రమాణాలకు అనుగుణంగా నిలబెట్టేలా రూపొందించారు.
పర్యావరణ పరిరక్షణకు కూడా ఈ కేంద్రంలో ప్రాధాన్యం ఇచ్చారు. వర్షపు నీటి సేకరణ వ్యవస్థ, సౌర విద్యుత్ ఉత్పత్తి వ్యవస్థలు, జీరో లిక్విడ్ డిశ్చార్జ్ టెక్నాలజీ వంటి పర్యావరణ అనుకూల చర్యలను అమలు చేశారు. దీని ద్వారా స్థిరమైన,పర్యావరణానికి అనుకూలమైన తయారీ ప్రక్రియలను కొనసాగించాలనే సంస్థ సంకల్పాన్ని ప్రతిబింబిస్తుంది.
ఉద్యోగ అవకాశాల పరంగా కూడా ఈ ప్రాజెక్ట్ స్థానికులకు మంచి అవకాశాలను కల్పించనుంది. ప్రస్తుతం ఉన్న హింజ్ తయారీ ప్లాంట్లో సుమారు 700 మంది ఉద్యోగులు పనిచేస్తున్నారు. కొత్త తయారీ కేంద్రం ప్రారంభంతో అదనంగా 300 ఉద్యోగాలు సృష్టించబడనున్నాయి. దీనివల్ల స్థానిక ఆర్థిక వ్యవస్థకు గణనీయమైన ప్రోత్సాహం లభించనుంది.
అదేవిధంగా, యువతకు అవసరమైన నైపుణ్యాలను అందించేందుకు హెట్టిచ్ సంస్థ ఐటీఐలు, సాంకేతిక విద్యాసంస్థలతో కలిసి ప్రత్యేక శిక్షణ కార్యక్రమాలు చేపడుతోంది. అధునాతన తయారీ రంగానికి అవసరమైన సాంకేతిక నైపుణ్యాలను అభివృద్ధి చేయడం ద్వారా స్థానిక యువతకు ఉపాధి అవకాశాలను పెంచడం లక్ష్యంగా ఈ కార్యక్రమాలు కొనసాగనున్నాయి.
ఈ సందర్భంగా హెట్టిచ్ ఇండియా, సార్క్, మిడిల్ ఈస్ట్, ఆఫ్రికా ప్రాంతాల మేనేజింగ్ డైరెక్టర్ ఆండ్రే ఎక్హోల్ట్ మాట్లాడుతూ, భారతదేశంలో సంస్థ కార్యకలాపాలు ప్రారంభమై 25 సంవత్సరాలు పూర్తయిన సందర్భంగా ఇండోర్లో కొత్త ప్లాంట్ ప్రారంభించడం తమకు ఎంతో గర్వకారణమని తెలిపారు. భారత్లో రూ.2,000 కోట్లకు పైగా పెట్టుబడులు పెట్టి స్థానిక తయారీని విస్తరించడంపై సంస్థ దృష్టి సారించిందని చెప్పారు. దేశీయ, అంతర్జాతీయ మార్కెట్లలో అండర్మౌంట్ టేబల్ రన్నర్లకు పెరుగుతున్న డిమాండ్ తమ వ్యూహం సరైన దిశలో ఉందని ఆయన పేర్కొన్నారు.
భారతదేశం ప్రస్తుతం హెట్టిచ్ సంస్థకు ప్రపంచవ్యాప్తంగా రెండవ అతిపెద్ద మార్కెట్గా మారిందని ఆయన తెలిపారు. భారత్లో తయారయ్యే ఉత్పత్తులు సార్క్ దేశాలు, మధ్యప్రాచ్యం, యూరప్, చైనా వంటి అంతర్జాతీయ మార్కెట్లకు ఎగుమతి అవుతున్నాయని చెప్పారు. ‘మేడ్ ఇన్ ఇండియా, మేడ్ ఫర్ థ వరల్డ్’ అనే దృక్పథంతో భారతదేశాన్ని గ్లోబల్ తయారీ కేంద్రంగా అభివృద్ధి చేయడమే కంపెనీ దీర్ఘకాల వ్యూహమని ఆయన స్పష్టం చేశారు.
హెట్టిచ్ సంస్థ గురించి..
హెట్టిచ్ సంస్థకు 138 సంవత్సరాల చరిత్ర ఉంది. ఇది జర్మన్ కుటుంబ యాజమాన్యంలోని సంస్థ కాగా ప్రపంచంలోనే అతిపెద్ద ఫర్నిచర్ ఫిట్టింగ్స్ తయారీ సంస్థలలో ఒకటిగా గుర్తింపు పొందింది. కంపెనీ గ్లోబల్ టర్నోవర్ 1.5 బిలియన్ యూరోలకుపైగా ఉంది.
భారతదేశంలో హెట్టిచ్ కార్యకలాపాలు కొత్త మిల్లీనియం ప్రారంభంలో మొదలయ్యాయి. గత 25 సంవత్సరాల్లో భారత ఫర్నిచర్ ఫిట్టింగ్స్ రంగంలో ఆధునిక సాంకేతికతను పరిచయం చేయడంలో సంస్థ కీలక పాత్ర పోషించింది. దేశవ్యాప్తంగా తయారీ, పంపిణీ, డిజైన్ రంగాల్లో సంస్థ బలమైన నెట్వర్క్ను ఏర్పరుచుకుంది.
హెట్టిచ్ ఉత్పత్తుల్లో ఫర్నిచర్ ఫిట్టింగ్స్, ఆర్కిటెక్చరల్ హార్డ్వేర్, బిల్ట్-ఇన్ అప్లయెన్సెస్, ఫర్నిచర్ లైటింగ్ వంటి విభాగాలు ఉన్నాయి. నివాస, వాణిజ్య అంతర్గత స్థలాల కోసం ఆధునిక ఇంటీరియర్ పరిష్కారాలను అందించడం సంస్థ ప్రధాన లక్ష్యం.
కంపెనీకి ఈటీ ఎడ్జ్ ‘బెస్ట్ బ్రాండ్స్ (2022–2025), మోస్ట్ ట్రస్టెడ్ బ్రాండ్స్ ఆఫ్ ఇండియా (2023–2026), మోస్ట్ ప్రిఫర్డ్ బ్రాండ్ 2025 వంటి అనేక ప్రతిష్టాత్మక అవార్డులు లభించాయి. అదనంగా తయారీ రంగంలో ఇండియాస్ బెస్ట్ వర్క్ ప్లేసెస్ ఇన్ టాప్ 50 జాబితాలో కూడా హెట్టిచ్ ఇండియా స్థానం సంపాదించింది.