రూ.11,500 కోట్లకు పైగా విలువైన 13 పెట్టుబడి ప్రతిపాదనలకు ఏపీ కేబినెట్ ఆమోదం

ఆంధ్రప్రదేశ్ ముఖ్యమంత్రి నారా చంద్రబాబు నాయుడు అధ్యక్షతన శుక్రవారం జరిగిన రాష్ట్ర మంత్రివర్గ (కేబినెట్) సమావేశం పలు కీలక నిర్ణయాలు తీసుకుంది. రాష్ట్రవ్యాప్తంగా దాదాపు 31,000 మందికి పైగా నిరుద్యోగులకు ఉద్యోగ అవకాశాలు కల్పించేలా, రూ.11,500 కోట్లకు పైగా విలువైన 13 భారీ పెట్టుబడి ప్రతిపాదనలకు కేబినెట్ గ్రీన్ సిగ్నల్ ఇచ్చింది. వీటితో పాటు, సమాజంలో తీవ్ర చర్చనీయాంశంగా మారిన సోషల్ మీడియా దుర్వినియోగంపై కేబినెట్‌లో సుదీర్ఘమైన, సమగ్రమైన చర్చ జరిగింది.

సమావేశం ముగిసిన అనంతరం సమాచార, పౌర సంబంధాల శాఖ మంత్రి కొలుసు పార్థసారథి మీడియా ప్రతినిధులకు కేబినెట్ వివరాలను వెల్లడించారు. ఇటీవల జరిగిన 19వ రాష్ట్ర పెట్టుబడుల ప్రోత్సాహక బోర్డు (ఎస్‌ఐపీబీ) సమావేశంలో ఆమోదం పొందిన మొత్తం 13 పెట్టుబడి ప్రతిపాదనలను కేబినెట్ యథాతథంగా ఆమోదించిందని మంత్రి పార్థసారథి తెలిపారు. ఈ ప్రాజెక్టులకు భూకేటాయింపులు, ప్రోత్సాహకాలు రాష్ట్ర ప్రభుత్వం అమలు చేస్తున్న పారిశ్రామిక విధానాల ప్రకారం అందజేయనున్నట్లు చెప్పారు. వీటి ద్వారా రూ.11,569.91 కోట్ల పెట్టుబడులు రాష్ట్రానికి రానుండగా, 31,431 ఉద్యోగాలు సృష్టించబడతాయి. రాష్ట్ర పారిశ్రామిక అభివృద్ధికి ఇవి కీలకంగా మారనున్నాయని పార్థసారథి పేర్కొన్నారు.

ఈ పెట్టుబడులలో ప్రధానంగా తిరుపతి జిల్లా శ్రీసిటీలోని తన ప్రస్తుత తయారీ కేంద్రాన్ని విస్తరించేందుకు ‘మొండెలెజ్ ఇండియా ఫుడ్స్ ప్రైవేట్ లిమిటెడ్’ ముందుకు వచ్చింది. ఈ సంస్థ రాష్ట్రంలో రూ.1,801 కోట్ల భారీ పెట్టుబడి పెట్టనుంది. ప్రభుత్వ పారిశ్రామిక విధానాల ప్రకారం ఈ ప్రాజెక్టుకు టెక్నాలజీ అప్‌గ్రేడేషన్, ఫిక్స్‌డ్ క్యాపిటల్ ఇన్వెస్ట్‌మెంట్, పవర్ సబ్సిడీ, విద్యుత్ సంబంధిత రాయితీలు లభిస్తాయి. ఈ విస్తరణతో కోకో ఆధారిత చాక్లెట్ల తయారీ రంగంలో ఆంధ్రప్రదేశ్ దేశంలోనే అగ్రగామి రాష్ట్రంగా ఎదుగుతుందని మంత్రి పార్థసారథి ఆశాభావం వ్యక్తం చేశారు.

సోషల్ మీడియా దుర్వినియోగంపై ఉక్కుపాదం

ఈ కేబినెట్ సమావేశంలో సోషల్ మీడియా దుర్వినియోగంపై ప్రభుత్వం ప్రత్యేకంగా దృష్టి సారించింది. సోషల్ మీడియా అనేది సమాజానికి ఉపయోగపడేదైనప్పటికీ, ప్రస్తుత రోజుల్లో అది ఒక "వ్యాధి" లాగా మారి హాని కలిగిస్తోందని మంత్రి ఆందోళన వ్యక్తం చేశారు. ప్రభుత్వాల పనితీరును, ప్రజల ఆలోచనా విధానాన్ని ఇది తప్పుదోవ పట్టిస్తోందని, ఇది కేవలం ఏపీ లేదా భారతదేశ సమస్య మాత్రమే కాదని, ప్రపంచవ్యాప్తంగా ఉన్న సమస్య అని పేర్కొన్నారు. దీనిని అరికట్టేందుకు ఇప్పటికే పలు దేశాలు చట్టాలు తెచ్చాయని గుర్తుచేశారు.

జవాబుదారీతనం లేని సోషల్ మీడియా

గతంలో వార్తాపత్రికలు, టీవీ ఛానళ్లు వంటి మీడియా సంస్థలకు గుర్తింపు పొందిన యాజమాన్యాలు ఉండేవి. వారు ప్రసారం చేసే సమాచారానికి చట్టపరంగా జవాబుదారీగా ఉండేవారు. ఒకవేళ పొరపాట్లు జరిగితే ప్రజలు చట్టపరమైన పరిష్కారం కోరే అవకాశం ఉండేది. కానీ నేటి సోషల్ మీడియా ఎలాంటి నైతిక ప్రమాణాలు, జవాబుదారీతనం లేకుండా నడుస్తోందని మంత్రి ఆరోపించారు. కొంతమంది వ్యక్తులను వ్యక్తిగతంగా టార్గెట్ చేయడానికి, వారి క్యారెక్టర్ అస్సాసినేషన్ (చరిత్ర హీనం) చేయడానికి, ప్రభుత్వంపై తప్పుడు ప్రచారాలు వ్యాప్తి చేయడానికి దీనిని వాడుతున్నారని మండిపడ్డారు.

టాస్క్‌ఫోర్స్, రెస్పాన్స్ సెల్ ఏర్పాటు

ఈ సమావేశంలో డైరెక్టర్ జనరల్ ఆఫ్ పోలీస్ (డీజీపీ) హరీష్ కుమార్ గుప్తా, ఇతర ఉన్నతాధికారులు ఈ అంశంపై సుదీర్ఘంగా చర్చించారు. ద్వేషాన్ని, తప్పుడు సమాచారాన్ని వ్యాప్తి చేస్తూ ప్రజలను రెచ్చగొట్టేలా వ్యవహరిస్తున్న సోషల్ మీడియా హ్యాండిళ్లను గుర్తించడానికి ఆధునిక ఫోరెన్సిక్ సాంకేతికతలను ఉపయోగించాలని ముఖ్యమంత్రి చంద్రబాబు అధికారులను ఆదేశించారు.

సోషల్ మీడియా దుర్వినియోగాన్ని అడ్డుకోవడానికి రాష్ట్ర స్థాయిలో ఒక ప్రత్యేక ‘సోషల్ మీడియా రెస్పాన్స్ సెల్’ ను ఏర్పాటు చేయాలని, తప్పుడు ఆరోపణలను తిప్పికొట్టడానికి ఒక ‘టాస్క్‌ఫోర్స్’ ను రంగంలోకి దించాలని సీఎం ఆదేశించారు. కొందరు రాజకీయ పార్టీల నాయకులు, వారి మద్దతుదారులు దీని వెనుక ఉన్నట్లు అనుమానిస్తున్నామని, బాధ్యులను ఇంకా పూర్తిగా గుర్తించాల్సి ఉందన్నారు. నిందితులను గుర్తించి, వారిపై కఠిన చర్యలు తీసుకునేందుకు ఒక ఖచ్చితమైన విధివిధానాన్ని రూపొందించాలని సీఎం ఆదేశించారని, దీనిపై పూర్తి విచారణ జరిపి వాస్తవాలను త్వరలోనే ప్రజల ముందు ఉంచుతామని మంత్రి పార్థసారథి వివరించారు.