రిపబ్లిక్ డే శుభాకాంక్షలు తెలిపిన పాక్–ఇండియా బిజినెస్ కౌన్సిల్

భారతదేశ 77వ గణతంత్ర దినోత్సవాన్ని పురస్కరించుకుని పాక్–ఇండియా బిజినెస్ కౌన్సిల్ (పీఐబీసీ) భారత ప్రజలకు శుభాకాంక్షలు తెలిపింది. ఇరు దేశాల మధ్య ఉన్న పెండింగ్ సమస్యలను పరిష్కరించేందుకు ఆలస్యం చేయకుండా సంభాషణలు పునఃప్రారంభించాలని పిలుపునిచ్చింది. భారత్–పాకిస్థాన్ మధ్య వాణిజ్య, వ్యాపార సంబంధాలను బలోపేతం చేయడమే లక్ష్యంగా పనిచేస్తున్న ద్వైపాక్షిక థింక్‌ట్యాంక్ అయిన పీఐబీసీ ఈ సందర్భంగా ప్రకటన విడుదల చేసింది. పీఐబీసీ చైర్మన్ నూర్ మహ్మద్ కసూరీ మాట్లాడుతూ, మౌలిక సదుపాయాలు, సాంకేతిక రంగం, పరిశ్రమల అభివృద్ధిలో భారత్ సాధించిన ‘గణనీయమైన పురోగతిని’ ప్రశంసించారు. సమీప భవిష్యత్తులో భారత్ ప్రపంచంలో మూడో అతిపెద్ద ఆర్థిక వ్యవస్థగా అవతరించేందుకు సిద్ధంగా ఉందని ఆయన పేర్కొన్నారు. భారత్, పాకిస్థాన్‌తో పాటు ఇతర పొరుగు దేశాలు కలిసి పనిచేస్తే సమగ్ర వృద్ధి, ఆవిష్కరణలు, భవిష్యత్ సవాళ్లను ఎదుర్కొనే నైపుణ్యంతో కూడిన మానవ వనరుల అభివృద్ధి సాధ్యమవుతుందని కసూరీ అభిప్రాయపడ్డారు.

భారత్ 77వ గణతంత్ర దినోత్సవాన్ని జరుపుకుంటున్న ఈ సమయంలో, శాంతి, సౌభాగ్యం, బలమైన ప్రాంతీయ సంబంధాలతో కూడిన ఉమ్మడి భవిష్యత్తును మనం ఊహించుకోవాలని ఆయన అన్నారు. గ్లోబల్ సౌత్ దేశాలు వాతావరణ మార్పు, పేదరికం, ఆకలి, వ్యాధులు, విద్యలో అసమానతలు వంటి సవాళ్లను కలిసి ఎదుర్కోవాల్సిన అవసరం ఉందని చెప్పారు. సరిహద్దులు దాటిన వేదికలు, ఫోరమ్‌లు ఏర్పాటు చేయడం ద్వారా నిర్మాణాత్మక భాగస్వామ్యం, ఆర్థిక సహకారం, స్థిరమైన అభివృద్ధి సాధ్యమవుతుందని కసూరీ తెలిపారు.

ఇరు దేశాల నాయకత్వం సంభాషణ, సహనం, దీర్ఘకాలిక శాంతిని ప్రోత్సహించాల్సిన బాధ్యత కలిగి ఉందని ఆయన అన్నారు. పాకిస్థాన్, భారత్ ప్రజల మధ్య గాఢమైన సాంస్కృతిక, భాషా, భావోద్వేగ సంబంధాలు ఉన్నాయి. ఇవి పరస్పర అవగాహన, సహకారం ద్వారా మరింత బలపడాలని పేర్కొన్నారు. రాజకీయ విభేదాలు ప్రాంతీయ స్థిరత్వం, ఉమ్మడి అభివృద్ధి లక్ష్యాలను మసకబార్చకూడదని ఆయన స్పష్టం చేశారు. ఉపాధి కల్పన, సమాజాల అభ్యున్నతికి సంయుక్త పరిశ్రమలు, వాణిజ్యం, పర్యావరణ కార్యక్రమాలు అవసరమని సూచించారు. శాంతియుత సహజీవనం, ఆర్థిక భాగస్వామ్యమే ప్రాంతీయ స్థిరత్వానికి, ప్రజల సంక్షేమానికి ఉత్తమ మార్గాలని అన్నారు. అలాగే, ఇరు దేశాల రాజకీయ నాయకులు, పౌర సమాజం, మీడియా నిర్మాణాత్మక దృక్పథాన్ని అవలంబించి, పోటీ భావనకు బదులు సమరసత వైపు అడుగులు వేయాలని ఆయన పిలుపునిచ్చారు. భారత్–పాకిస్థాన్‌ల మధ్య స్థిరమైన శాంతి నెలకొంటే దక్షిణాసియాలోని లక్షలాది మందికి ఆర్థిక అవకాశాలు, స్థిరత్వం లభిస్తాయని తెలిపారు.