రాజ్యసభ సభ్యుడిగా ఈ నెల 10న నితీశ్‌కుమార్‌‌ ప్రమాణం

బీహార్ ముఖ్యమంత్రి నితీశ్‌కుమార్ ఏప్రిల్‌ 10న రాజ్యసభ సభ్యుడిగా ప్రమాణ స్వీకారం చేయనున్నారు. ఈ విషయాన్ని బీహార్‌‌కు చెందిన భారతీయ జనతా పార్టీ నాయకుడు సంజయ్‌ సరోగి ఆదివారం తెలిపారు. ప్రమాణ స్వీకారం అనంతరం కొత్త కేబినెట్ ఏర్పాటుపై నిర్ణయం తీసుకోనున్నట్లు ఆయన చెప్పారు. ముఖ్యమంత్రి, బీజేపీ కేంద్ర నాయకత్వం, అలాగే ఎన్డీయే భాగస్వామ్య పక్షాలు కలిసి చర్చించి కేబినెట్ రూపకల్పనపై నిర్ణయం తీసుకుంటాయని పేర్కొన్నారు.

రాజకీయ పరిణామాల నేపథ్యంలో నితీశ్ కుమార్ ఇటీవల బీహార్ శాసన మండలి సభ్యత్వానికి రాజీనామా చేశారు. గత నెలలో ఆయన రాజ్యసభకు ఎన్నికైన నేపథ్యంలో ఈ నిర్ణయం తీసుకున్నారు. మార్చి 5న చేసిన ప్రకటనలో నితీశ్ కుమార్ రాష్ట్ర అభివృద్ధికి కట్టుబడి ఉన్నానని తెలిపారు. అభివృద్ధి చెందిన బీహార్ నిర్మాణమే లక్ష్యంగా పనిచేస్తానని, కొత్త ప్రభుత్వానికి సహకారం, మార్గదర్శకత్వం అందిస్తానని పేర్కొన్నారు. ఈ నిర్ణయాన్ని ఎన్డీయే నేతలు స్వాగతించారు. బీహార్ ఉప ముఖ్యమంత్రి విజయ్‌ సిన్హా మాట్లాడుతూ, రాజ్యసభలో ప్రమాణం చేయాలంటే ప్రస్తుత పదవికి రాజీనామా చేయడం రాజ్యాంగపరమైన విధానం అని తెలిపారు.

జనతా దళ్ మాజీ ఎంపీ చందేశ్వర్‌‌ చంద్రవంశీ మాట్లాడుతూ, నితీశ్ కుమార్ ఢిల్లీకి వెళ్లినా బీహార్ రాజకీయాలపై ఆయన ప్రభావం కొనసాగుతుందని చెప్పారు. జేడీయూ ఎమ్మెల్యే దులాల్‌ చంద్ర గోస్వామి కూడా స్పందిస్తూ, నితీశ్‌ కుమార్ శాసన మండలి సభ్యత్వానికి రాజీనామా చేయడం రాష్ట్రానికి నష్టం అయినప్పటికీ ఆయన రాష్ట్ర అభివృద్ధికి మార్గదర్శకత్వం అందిస్తారని తెలిపారు.

బీహార్‌లో కొత్త సీఎం ఎవరు?

బీహార్‌‌ రాజకీయాల్లో కొత్త చర్చ మొదలైంది. నితీశ్‌కుమార్‌‌ రాజ్యసభకు వెళ్తున్న నేపథ్యంలో, రాష్ట్రానికి కొత్త ముఖ్యమంత్రి ఎవరు అవుతారనే అంశం సైద్ధాంతికంగా కాక, ఇప్పుడు రాజకీయంగా వేడెక్కింది. బీజేపీలో సీనియర్ నేతలు సమ్రాట్‌ చౌదరి, నిత్యానందరాయ్‌, విజయ్‌కుమార్‌‌ సిన్హా రేస్‌లో ఉన్నారు.

రేసులో ఉన్న నేతల నేపథ్యం

సమ్రాట్‌ చౌదరి: ప్రస్తుత బీహార్ ఉప ముఖ్యమంత్రి. బీజేపీలో సీనియర్ నేతగా గుర్తింపు, రూరల్ బీహార్‌లో బలమైన రాజకీయ నాయకుడిగా ఉన్నారు. భూ సంస్కరణలు, సామాజిక సంక్షేమం వంటి అంశాల్లో అనుభవం ఉంది. ఓబీసీల మద్దతు ఎక్కువగా ఉండటం కలిసొచ్చే అవకాశంగా ఉంది. అలాగే మాస్‌ లీడర్‌‌గా కూడా పేరుపొందడం.

నిత్యానందరాయ్‌: కేంద్ర హోం శాఖ సహాయ మంత్రి. శాంతి భద్రతలు, అంతర్గత భద్రత శాఖలు చూడడంలో అనుభవం ఉంది. దక్షిణ బీహార్, మధ్య-బీహార్ ప్రాంతాల్లో మద్దతు ఉంది.

విజయ్‌కుమార్‌‌ సిన్హా: మరో ఉప ముఖ్యమంత్రి. రాష్ట్రంలో పరిపాలనా అనుభవం ఉంది. శాసనసభలో ఎలా వ్యవహరించాలో తెలిసిన నాయకుడు. కానీ అంతగా మాస్‌ లీడర్‌‌గా ఎదగలేదు.