రష్యా కమ్చట్కా తూర్పు తీరంలో 6.1 తీవ్రతతో భూకంపం

రష్యాలోని భూకంపాలకు నిలయమైన కమ్చట్కా ద్వీపకల్పం తూర్పు తీరానికి సమీపంలో బుధవారం మరోసారి భారీ భూకంపం సంభవించింది. నేషనల్ సెంటర్ ఫర్ సీస్మోలజీ విడుదల చేసిన ప్రకటన ప్రకారం, ఈ భూకంపం రిక్టర్ స్కేలుపై 6.1 తీవ్రతతో నమోదైంది. వరుసగా రెండు రోజుల్లో సంభవించిన రెండో పెద్ద భూకంపం ఇది. మంగళవారం కూడా ఇదే ప్రాంతంలో 6.0 తీవ్రతతో భూకంపం నమోదైంది.

నేషనల్ సెంటర్ ఫర్ సీస్మోలజీ ‘ఎక్స్’ (గతంలో ట్విట్టర్) వేదికగా పోస్ట్ చేసిన వివరాల ప్రకారం, బుధవారం ఉదయం 5 గంటల సమయంలో భూకంపం సంభవించింది. కమ్చట్కా తూర్పు తీరానికి సమీపంలో 25 కిలోమీటర్ల లోతులో భూకంప కేంద్రం ఉందని పేర్కొంది. ప్రస్తుతానికి, ఈ తాజా భూకంపాల వల్ల ప్రాణ నష్టం, ఆస్తి నష్టం జరిగినట్లు ఎటువంటి నివేదికలు అందలేదు. అయితే ఈ ప్రాంతంలో టెక్టోనిక్ ప్లేట్ల క్రియాశీలత పెరుగుతున్నందున, అధికారులు, స్థానిక ప్రజలు అప్రమత్తంగా ఉండాలని నిపుణులు సూచిస్తున్నారు.

తక్కువ లోతులో జరిగే భూకంపాలు సాధారణంగా ఎక్కువ నష్టం కలిగిస్తాయి, ఎందుకంటే అవి భూమి ఉపరితలానికి సమీపంలో ఉన్న శక్తిని విడుదల చేస్తాయి. దాంతో నేల తీవ్రంగా కంపించడం, భవనాలు కుప్పకూలడం, ప్రాణనష్టం వంటి పరిణామాలు అధికంగా సంభవిస్తాయి. లోతైన భూకంపాలు ఉపరితలానికి చేరే లోపు శక్తి తగ్గిపోతుంది కాబట్టి తక్కువ నష్టం కలిగిస్తాయి.

కమ్చట్కా ద్వీపకల్పం ప్రపంచంలో అత్యంత భూకంపాలు సంభవించే ప్రాంతాలలో ఒకటి. ఇది రష్యా తూర్పు భాగంలో ఉంది. పసిఫిక్ ప్లేట్, ఒఖోట్స్క్ మైక్రోప్లేట్‌ల సరిహద్దులో ఉంది. ఇక్కడ పసిఫిక్ ప్లేట్ భూమి కిందకి జారిపోతూ ఉండటంతో తీవ్ర ఒత్తిడి ఏర్పడి, ఆ శక్తి ఒక్కసారిగా విడుదలైనప్పుడు భూకంపాలు సంభవిస్తాయి. ఈ ప్రాంతం “పసిఫిక్ రింగ్ ఆఫ్ ఫైర్”లో భాగం కావడంతో అగ్నిపర్వతాలు, భూకంపాలు రెండూ సాధారణం.

1952లో కమ్చట్కాలో 9.0 తీవ్రత గల మహా భూకంపం సంభవించింది. ఇది 20వ శతాబ్దంలోని అత్యంత బలమైన భూకంపాలలో ఒకటి. ఆ భూకంపం వల్ల భారీ సునామీ ఏర్పడి హవాయి, దక్షిణ అమెరికా తీరాలకు కూడా చేరింది. దాదాపు 2,300 మంది ప్రాణాలు కోల్పోయారు. అలాగే 1923 (8.5 తీవ్రత), 2006 (8.3 తీవ్రత)లో కూడా భారీ భూకంపాలు చోటుచేసుకున్నాయి. ఈ భూకంపాలు తీరప్రాంతాల్లో ఆస్తినష్టం, నేలచరియలు, సునామీ ప్రభావం వంటి అనేక నష్టాలు కలిగించాయి.